Titus
Sembe
Paulusti Mome Toro Pibogne
Paulusti Titus kibogha
1
Titus naba name!
Mome ane na Paulus Allah arukna wamnangeri an sembe palilamna.
Na Allah arukna wamnangena,
Allahri Yesus wepto poghogne Kristus ponekori na wepto,
“Ambatto tongolamsululam,”
aro pogneog.
Nari ambatto tongolamsin nena,
“Sik yubu neneko el taikti,
Allahri wepsiog nimiri Yesusag sikne aro wana palilamikti,
Allahri senenne sunsunum uro ulamukang,”
aro Yesusti na pogneogpa,
yubu ambatto poa tongolamsin.
2 Anam imap so'oap sumban komag agha Allahri ya'ag kamag uro unne sembe salag lero pibog.
Orolenange lemnep komne poneko Allahri salag pibog ane sembe,
“Ya'ag kamag uro wamukap,”
aro nang-nangaro tilamapne sembe Yesus yubu ambatto tongolamsin.
3 Allahri samenag seneraghog nena,
“Ko'o wepnange anekoag Yesus yubu ka'ebaukang,”
sembaogne sunsunum uro Allah nu talulamsilne ponekori nanag,
“Yesus yubu ambatsululam,”
aro na saeag awe piboba ambarelamsin.
4 Name Titus,
nari Yesusag sikne aro wana palilamna saog uro andi babe nari ambarelangkenne nelepto elag sikne aro wana palilamlam.
Ane sembe an sik uro naba name senelamna.
“Nuni Allahap,
nu Talulamsilne Yesus Kristusap abenekori wana anag yororo walia ulangkirikpa,
wana aingniro wamlulam,”
senelamnari an sembe molbarelangken.
Titus Kreta so'oag ulamnepne sembe Paulusti ambarogha
5 Nari an mag kanero longorop mog so'o Kreta laploa yaghenongena,
nuri Yesus sembe awe tolamnomori,
“Sirikag wamlange andi komopto tolamlulam,”
aro laploa yagheno.
Ane sembe andi as ni Kreta mog so'oag ubu paiamlange sunsunum uro Yesusag seneragtop nimi wenero paia uhirop nimia ebahimendi,
ambatkenonge sunsunum uro toro seki-seki yabihilulam.
6 Allah elmabo wenero paiamsinep nimi wepsululam nimina,
nimiri yubu sikne agha,
“Malia ulamla” aro elag tam pimnep koma wamle taneogna,
Allah elmabo wenero paia uhiropne wamnep.
Allah elmabo wenero paiamsinep nimi eneko kelabo ot nhonog toamnep.
Sikin mabo salik-malik ul pin koma sikini yubu ka'ebaikti,
sikin mabori babe Yesusag sikne aro seneraglamik nimi agha kembahimendi,
ambatkenonge sunsunum uro wepsululam.
7 Allah elmabo paia uhiro saelbamsukang nangna,
Allah elmabo o'oro paia ulamsiang ane sembe,
malia uropne elag tam pimnep kom nimi,
metmereng arop kom nimi,
men phea nimiag wahirop kom nimi,
mag yongeri wana tohirop kom nimi,
nimiap kame tarop kom nimi,
kal ma'aldi wana torop kom nimi agha wepsululam.
Lemnange nene irikna phibom agha wamik nimi wepsinep kom.
8 Allah elmabo paia uhirop nimi sekitsululam nimina,
eldi aeag nimi wa'al ananne sembe ina kubamlul.
Walinge ulamnaba yeng senero walinge uro yabanne sembe yeng uro wamlul.
Wana hekto seneragha urop nimi,
wana porog uro urop nimi,
Allahri seneropne sunsunum uro urop nimi,
salik-malik urop kom nimi agha wamukang.
9 Wamnep nimi sekitsululam nena,
Yesusag sikne aro wana palirop yubu sikne ambarelamsiap yubu sunsunum uro mikip uro saelbamik nimi agha sekitsululam.
Eldi sik yubu walinge neneko mikip uro saelbanepneog wamle andarina,
nimi wana mikip nenehinne babe,
elag yubu torapto lelamik nimi amoro wembahinep yubu babe,
sikne lag nenero ambarelamsilul.
10 Elag yubu torapto lero uanep nimina,
nengabo kon karepnange sembe mikip saelba urop nimi,
nimi sisa Yahudi nimi taneko maikno orolenange agha lelamang.
Sindi seneraglamang nena,
“Yesus yubu umag wamukap kom,”
aro yubu kamola parektop yubu maikno lelamang.
11 Sin kon karepnange sembe orolenange ambatsirop nimi tanekori ora nimiri ae lomag taneko wa'ina,
“Kamna tatsiseng,”
aro sik komne ambarelamsiangdi,
nimi wana samsamolamsiang.
Ane sembe,
“Nen ekel ina ambatto wana samsamomna nenelopsukang kom,”
aro sinag tangoro wenero ambatsinep nimi wepsimendi,
orolenange ambatsirop nang taneko pam lepsululom.
12 Samenag sin Kreta nimi nubunge nhon memari yubu silimu tipto leploa saog uro sindam nimi wameka sembe lebog.
Yubu lebog nena,
“Kreta nimina,
nimiag yubu orolenange leropti,
si yoaba yonge saog uro uropti,
nia mangkina uan koma tena aboap uro terop nimi agha wamang,”
seog.
13 Kreta nimi eneri lag nenero ambatsiog nena,
sikne andagha ambatsiog.
Ane sembe andi sin yubu mikip uro wenelamsululam.
Wenelamsimenba sindi Yesusag sikne aro wana paliropne sembe sikne agha saelbamikti seneraglamukang.
14 Kreta nimiri wene orolenange seneraglamangne,
“Lipsukang,”
aro ambarelangken.
Yahudi nimiri sikne wa'epto naghi agha nimi yana sembe lelero neplamangdi,
“Undo-undo ulamlulom,”
aro aruklamsiangba,
Kreta nimiri ka'elamangdi,
sik senelamang.
“Kreta nimiri sik komne neneko lipsukang,”
aro wembamsululam.
15 Sembenga wanaag wamnepne Yesusag wana palirop nimi sembe Allah Yamerib a'alero lubatsiog ane sembe,
a'alero lubatsiog nimi enekori nia mangkina wamlange wana walingeag agha toro tenep.c
Aghana sin Yesusag sikne aro wana palirop kom nimi taneko sembenga wanaag kalup tangtop nimi wamang.
Sin nimi tanekona,
sindi usoghag seneragna babe,
sindi wanaag seneragnange babe sindi malingeog uro seneragtop.
Ane sembe,
sa'a-sa'a tero ulamnepne sembe babe Allahri sin wali sembahinep kom.
16 Sindi lelamangdi,
“Nu Allah sembe yabo telekto el wamapti,
elap sae tiptangto wamap,”
alamang aghana,
sindi seneragto ulamangneri,
“Allahap sae tiptangto wamang kom,”
aro el nenelamsil.
Sin sembe popmagha sirikti,
sindi wanaag agha walinge nhon babe uanep kom saog wamlaba,
Allahri senerop komneog ulamang.