Paulusti Titusag, “Yesusag wana palirop nimi a'ero-a'ero wenelamsululam,” aro ambarogha
2
Aghana an Titus,
andi nimiag yubu lelamlulam nena,
sik yubu walinge ambarelamsiapne sunsunum uro yubu sikne agha ambarelamsululam.
2 Andi kabuni sabal saog nimi ambatto wenelamsimenba sindi,
“Malia uaukap,”
seneropne libikpa,
yog nimiri,
“Wali,”
aro maipnepne sunsunum uro wana hektopneag agha seneragto ulamukang.
Allah yubu sikne agha salero seneraglamikti,
nimiag wanari o'ona senelamsiikti,
seneragna walingeag agha seklenne lag talamlea babe wana khapto wamukang.
3-4 Kelabo sabal saog kelaboag babe andi ambatto wenelamsimenba,
sindi wana seneragnari ul palamik nena,
Allahri seneropne mo sunsunum uro ul palamikti,
nimi san tilipsirop yubu lelamukang kom.
Mag yongeri wana tohirop kom kelabo wamikti,
sindi saren kelaboap,
me yag kelabo agha sabal tan kom kelaboap walinge agha amolamsukang.
Sabal saog kelabori sabal tan kom kelabo amolamsiikpa,
sindi sikina'ange yaboag o'ona senelamsiikti,
sikin mabo o'ona senelamsukang.
5 Sabal saog kelabori sin sabal tan kom kelabo ambatto wana hekamsileba,
sikin mangkelabo wana hekto el uro wamikti,
malia uan koma walingeog ul palamukang.
Sikina'ange yabori yubu ka'eamikti,
ae lomag unne o'oro walia ulamsiikti,
sikina'ange yabo umag wamukang.
Undo wamikpa,
kemelamsiikti nimi nhondi babe Allah yubu mali aro san tiliplamukang kom.
6 Kabuni mabo babe wana hekto el uro wamukang aro wenelamsululam.
7 Andi seneragna wanari sa'a-sa'a ulapmenag,
“Sindi imneikti,
nanag nelepto ulamukang,”
senenneag agha walinge aghabog ulamlulam.
Andi amona amolamsimenne sembe keyagman uro sembaheng kom.
Allah yubu amolamsimen tanena,
lendepna koma otsikne agha sol wali,
wali uro amolamsululam.
8 Yubu sikne wana hekahinepne agha wenelamsimenba,
nunag yubu toraplamsiang nimiri babe ka'ebaikti,
“Orolenange lepla komdi,
walia ulamla,”
sembaukang.
Undo sembaikti,
nuri yubu ambatto ulamapne sembe sindi nu yubu nepsinep komdi,
ali sembaukang.
9-10 Nari yeng senelamnangena,
“Allahri nu Talulamsilne poneko sembe ambarelamsiap yubu neneko nimiri ka'ebaikti,
wali aro sik sembaukang,”
senelamna.
Ane sembe nimi arukna tangtop wamang nimiag babe amoro ambatsimen andarina,
sikini yabori aruksirop yubu ni ka'elamikti,
sikini yabo umag agha ulamukang.
Undo unulamikti,
nimi arukna wamik nimiri sikini yabo wana wali nenelamsukang.
Sikini yaboag yubu ingisapto lemna koma,
haoghaba sikini yaboringe tomna koma wamikpa,
ora nimiri kemelamsiikti,
el uro wamukang.
El uro wamik nena,
“Nimi arukna tangtop nimi Yesusag sikne aro wana palilamang nimiri sol wali uro awe tolamang.
Ni tam paiamangne wali uro yae wamangdi,
nimi sikne wamang,”
sembaukang.
Undo senelamikti,
sindi babe Allah nu Talulamsilne poneko sembe,
“Yubu walinge neneko ka'ebahane,”
senelamukang.
11 Allah nu Talulamsilne ponekona,
mog so'oag nimiag wana yororo walia ulamsildi,
nimiri malia uropneag agha taulbahinepne nimi niag lag nembatsiog.
12 Allahri nunag wana yororo talulamsil yubu enekori nu el nenero wenelamsil.
Nu el nenelamsil nena,
mog so'oag nimiri,
“Wanaag bobonge agto yaboho,”
seneropne neneko Allahri seneropneap sunsunum uro wamla kom.
Ane sembe nu wene mog so'o aneag ul palamap nena,
mog so'oag nimiri seneragto ul piropne wa'epto laplobi agha nuri wana hektopneag agha Allahri seneropne sunsunum uro wana porog uropne mo ul palamap.
13 Nuri wene undo ul palamapti,
wana awi uro nang-nangalamap nena,
“Allah nubu sirikne nu Talulamsilne Yesus Kristus poneko eldamne imang warerop sirikneag agha yalulne tibaukap,”
aro wana awi uro tiro nang-nangalamap.
14 Nuri samenag Allahri iriksirop yubu ingisapto malingeog ulamububa,
malingeri nu sae kaubamsiog.
Sae kaubamsiog aghana,
Yesus ponekori,
“Kamna top taneri,
sae lopsinun,”
aro eldamne nu sembe paip tangto tebaog.
Eldamne nu sembe paip tangto tebaog nena,
“Nari wepsirop nimi taneko sembe sembenga sindi wanaag wamlange lupto a'elbahineba,
nari o'om nimi wamukang,”
aro nu sembe tebaog.
Yesusti nu elag sikne aro wana palirop nimi sembe,
“Nari o'om nimi,”
sembamsil ane sembe nu sop-sop,
“Walingeog uahabe,”
senelamapti wana yeng uro walingeog ul palamap.
15 Yesusti nu eldamneringe nembahiog ane sembe,
nia ane ambatkenne nen tipto ambarelamsululam.
Ambarelamsimendi andi yubu ka'elamik nimi andamne imangapti wembamsululam.
Wenero ambarelamsimenba,
nimi nhondi babe an sembe teba'en sembagheheng kom.