Wenehirop yubu komoptopne ambarogha
3
Andi Allah yubu ambatto wenelamsimenne ka'elamik nimi el nenelamsimenba,
nimi nubunangap,
mog so'o saelba urop nangapti yubu lelamikne Yesusag wana palirop nimiri ka'elamikti,
noropto saelbamukang.
Nen tipto ambarelamsululam nena,
“A'un wea ulapmundi,
a'undi nia ni walinge uanepne ulamlulom,”
aro ambatsululam.
2 Andi sin ambareamsimenba,
nimi san tilipsirop yubu lepsukang kom.
Nimi etneap babe waptan koma wamikti,
win-win aro lero ulamsiikti,
wana mamleba wamukang.
3 Samenag sa'a-sa'a walinge el tangto seneragna koma limituk uro wamuburi,
yubu sia paliropne neleban koma ina selepne toman palamubu.
Nundam nimiri seneragnari nu arukna nembamsiogpa,
sa'a-sa'a sembe wana sesog uro seneraglamuburi,
“Na wanaag bobo walelalne nene agto yaboho,”
senelamuburi salelamsibu.
Nimiringe babe,
“Naringe og wamso,”
senelamuburi,
nimiag yo palilamsiburi,
yonge aghabog ulamubu.
Ora nimi sembe o'ona sembahin koma hausag senelamsibuba,
sindi babe nu sembe hausag senelamsiek.
O'ona seneptan koma nu mamun hausag senel dalamubu aghana,
4 Allah nu mog so'oag nimi Talulamsilne ponekori,
“Walia uahineri yepsinun,”
aro o'ona senelamsiog.
O'ona senelamsiogti,
“Walia uahineri yepsinun,”
senelamogne neneko nunag lag nembatsiog.
5-6 Nunag lag nembatsiogti,
nu taulbahiog nena,
nuri wana porogneag agha elag walia ulamubunge sembe nu taulbahiog kom aghana,
elba eldi nu yareag sembahiogti,
nu taulbahiog.
Nu taulbahiog nena,
Allahri Eldamne Yame Walinge neneko maiknoro lo'oe tan koma siriro la'iniropne saog uro nunag tarelamsildi,
Yesus Kristus nu talulamsilne poneko pere agha tarelamsil.
Allah Eldamne Yame Walingeri nu a'alero nu wana seneragna wendogne nembahiogti,
nu nimi wendogne nembahiog.
Allahri Eldamne Yame Walinge nunag tarelamsildi,
nu a'alero nimi wendogne nembahiog andarina,
7 Allahri nunag wana yorolamsilneag agha wana porog nimi nenelamsildi,
Allah elmabo nenelamsil.
Ane sembe Allahri,
“Namabo sembe ya'ag kamag uro unne tatsinun,”
aro salag pibogne neneko,
“Nunag babe talul,”
aro nang-nangaro tilamap.
8 Yubu ambatsinne neneko otsikne agha lemna.
Ane sembe yubu so'opto ambarelamsimen andarina,
Allahag sikne aro wana palilamang nimiri sol wali,
wali uro salero ul palamikne toman agha sik walingeog ulamukang.
Yubu so'opto ambatsimenba,
nimi ni wali nenep tanepne agha ulamikti,
nimi maikno yeplamsiikpa,
sin wali wamukang.
9 Aghana yubu nenep tangka uro yabinep komne sembe lel dalamika peramag sekel abaheng kom.
Yahudi nimiri mangarobari yingkiropne lelelamekne sembe nimi waptangto talamikti,
Musari aruksirop yubuag agha kiliro wal dalamikne ni ane salik-malik yepsinep komne sembe lelamukang.
Ane sembe,
nimiri tam ane sembe lelamik tanena,
anna nelepto lepseng kom.
10 Yepsinep komne waptangtop yubu ene suknulamlaba,
nimi taneko telekel dalamang.
Ane sembe suknulamla nimi ene ik nhon to,
ik phende to wembapmen pagha,
ka'ebale kom tanena,
an el peramag wamseng kom.
11 An el uro wamnep nena,
nimiri undop nimi kembi agha el ina selepne toman palamlari,
malia ulamlange sembanep.
Ina selepne toman palamlari,
malia ulamla ane sembe,
undop nimi peramag wamseng kom.
Paulusti mome komobanebag kipsiogha
12 Na pineri,
“Khao li wamlul ko'o enekoag as soro kalurop as Nikopolis wamnun,”
aro tam karebano.
Ane sembe nari Artemas to,
Tikhikus to anag pogholaneba,
anag yale tanena,
an men phea na wamneag yalulam.
13 Nungkabo phende,
Apolosap,
Musari aruksirop yubu amohiropne Zenas ponekoap nen ina tipto palamtukang.
Ina palamdikag sinag kwema uahileag tina,
sik wali uro yepsululam.
14 Nuri nimi Allahri wepsirop nimi taneko awe tomna koma ambengka uro wamikne sunsunum kom.
Ane sembe ambatto wembamsimenba,
sin wali uro ka'elamikti el talamukang.
Sin el tanep nena,
“Kwema uahileag” aro sindam nimi saeri ul piro wero mero tero wamikti,
walinge agha ul dalamukang.
15 Nungkabo ni tane nanap nhon wamang nimiri an sembe,
“Nungkae,”
aro kiplangkeang.
Nungkabo tane wamang nimiri Yesusag sikne aro wana palirop nu o'ona senelamsiang nimi taneko an yaghag wamangne kiplamsiangpa ambatsululam.
“Nu Saelba Uhiropne ponekori wana a'unag yorolamsileri,
yepto paiamsilul,”
aro a'un sembe molbarelamsin.
Abenda.