Timotius
Sembe
Paulusti Mome Toro Pibogha Phendepne
El nenerop yubu palilamap
Paulusti Timotius sembe mome toro pibog yubu phendepne ene wenehirop yubu maikno mome toro pibog. Samenag Paulusti Timotius as Efesusa sekirog nena, Paulusti yubu toraptop nimiri as Efesus wamek nimiag sengkwanektop yubu ambarelamsiekpa, “Timotiusti Yesusag wana palirop nimi ambarelamsileri, yae paiamsilul,” aro Paulusti Timotius sekirog. Timotius as Efesus wamogti, yubu ambarelamsiogpa, yubu toraplamekpa, eka'uk wamog. Eka'uk wamogpa, Paulusti nen samoro as Efesus yaog aghana, eldi yubu toraptop nimi nhon Aleksander ponekori Paulus pan khebaogpa (2 Timotius 4:14), mog so'o saelba uhirop nimi tanekori Paulus saelbaekti, haing sae kaupto kop aeag tobongkibek. Kop aeag tobongkibek ae aneko as Efesus wamogpa, so'o aneko Roma nimiri saelbamsiek ane sembe, “Roma nimi sembe yubu lenne ponekori tam karebalul,” aro Paulus as Roma poa piek. Paulus as Roma kop aeag wamogti, “Ya'ag omnukang,” sembaogti Timotiusag yubu ene mome toro pibogti, “Elem uro yalulam,” aro molbaog.
Paulus weag kop aeag wamogpa, as Efesus wamek nimi tanekori eldi yubu toraplamekti, sengkwanektop yubu ambarelamsiekpa, Timotius ponekori wanaag, “Huanundi sololamna,” aro wana ikin wamog. Wana ikin wamogpa, Paulusti yubu eneag, “An ya'ag opkeika babe, sol wali, wali uro sik yubu mo tipto ambarelamsululam,” aro wenero mome toro pibog. Mome eneag Paulusti Timotius el nenelamog nena, Yesus anam samoro yan komag orolena yubu ambatsirop nimiap, pan khesirop nimiap, haing kunuhirop nimiap maikno talamikti, “Kristusag wana palirop nimi seklebaik,” aro malia ulamsukang. “Malia ulamsiikpa, sik yubu sae limna koma wana khaplapmundi, Kristusag wana palilamlulom,” aro wenero mome toro pibog.
Paulusti Timotius wenero ambarelamogti, “An me olog wamlumag agha Allah yubu mome toro pairopne el talum. Allah yubu mome toro pairop mome eneri nu yeplamsileri, mikip nenelamsilul. Nimiri, ‘Ka'ebaukap,’ sembaika babe, ‘Karong,’ sembaika babe andi, ‘Allah yubu amoro ambarelamsinun,’ aro wea ulapmendi, lag phoro ambatto wenelamsululam,” aro Timotius wenero mome toro pibog.
Paulusti Timotius sembe mome toro pibogha phendepne lomag wamlange
1:1-2 - Paulusti Timotius kibogha
1:3—2:26 - Paulusti Timotiusag, “Wana mikip tamendi ulamlulam,” aro wenero ambarogha
3:1—4:5 - Paulusti Timotiusag, “Seklelapmenag babe sol wali uro awe tolamlulam,” aro wenero ambarogha
4:6-18 - Paulus eldamne wamogne sembe ambarogha
4:19-22 - Paulusti mome komobanebag kipsiogha