Timotius
Sembe
Paulusti Mome Toro Pibogha Selekne
El nenerop yubu palilamap
Timotius ponekona, ili Yunaningeri Yahudi kel tobogpa, elme Timotius mangkaog. Timotius as Listra wamogti, Allahag wana palilamogpa, Paulus as Listra yaogti haiptarek. Haiptarekpa nimi maiknori Timotius sembe, “Wana wali,” aro maiplamekpa, ka'ebaogti Paulusti, “Elap nhon yubu ambatto tongolameberi yeplamnelul,” aro awe nikne toro tongolamek (Pogsiog Nang 16:1-3).
Paulusti Timotius, “As Efesus nimi yubu ambatto yae paiamsilul,” aro sekirogti, amik sum yubu nene Timotius sembe, “Yubu wenero ambatneri, wana mikip nembanun,” aro mome toro pibog. Timotius as Efesus wamogpa, Efesus nimi Kristusag wana paliro winip tangtop nimi nhon-nhondi sengkwanektop yubu ka'elamek. Sengkwanektop yubu ambarelamsiek nimi tanekori Yunani nimiri seneraglamekne kilbi agha, Yahudi nimiri ul piropneap nikag nenero ma'alamekti, sengkwanektop yubu ambarelamsiek. Sengkwanektop yubu ambarelamsiek yubuna, “Nengabori kelabo tomnep komdi, teroba nene nhon, nene nhon tenep komdi, ot tognorop yubu el tahabe taneogna, wali nenep tanep,” aro ambarelamsiek. Sengkwanektop yubu ene sembe, “Yae togtangto wapmendi, sik yubu nene agha ambarelamsululam,” aro Paulusti Timotius wenero mome toro pibog. Timotius sembe mome toro pibog yubu enena, “Timotiusti Efesus nimiag tipto ambatsilul,” aro Paulusti mome toro pibog.
Yubu neneag Kristusag wana palirop nimi winip tangto ulamnepne sembe ambatsiog. Apna Kristusag wana palirop nimi yae paia uhirop nimiap, yepto tongohirop nimiap sekitsinep nimi sembe babe, sin nimi tanekori ulamnepne sembe babe Paulusti yubu kiki telekto ambatsiog. Komoptobagna, Paulusti Timotius el nenelamogti, “Yesus Kristusti arukna wamlamdi, elag wana palirop nimi andi yepsinepneog wamlam,” aro el nenero ambatsiogti wembahiog.
Paulusti Timotius sembe mome toro pibogha selekne lomag wamlange
1:1-2 - Paulusti Timotius kibogha
1:3—3:16 - Kristusag wana palirop nimiri winip tangto ulamnepne sembe ambatsiogha
4:1—6:21 - Timotiusti awe toro ulamnepne sembe Paulusti wembahiogha