Timotius
Sembe
Paulusti Mome Toro Pibogha Selekne
Paulusti Timotius kibogha
1
1-2 Timotius naba name.
Na Paulusti samenag Allahri wepto poghogne Kristus Yesusag sikne aro wana palilamna saog uro andi babe elag sikne aro wana palilamlam.
Ane sembe,
an naba name taptopne saog wamlamba kiplangken.
Nuri Kristus Yesus ponekoag wana paliro,
“Nu Allahap ma'asinne ponekori nu toro pipsilul,”
aro nang-nangalamap.
Nu talulamsilne Allah ponekori aruktop yubu sunsunum uro Yesus Kristusti na Paulus wepto pogneogpa,
eldi yubu ambatto tongolamsindi,
mome ane an sembe toro palilamna.
“Nuni Allahap,
nu Saelba Uhiropne Yesus Kristusap abenekori wana anag yororo walia ulangkirikti,
yareagti yeplangkirikpa,
wana aingniro wamlulam,”
senelamnari an sembe molbarelangken.
“Orolena yubu ambatsirop nimi irikahilulam,” aro Paulusti wenero ambarogha
3 Na samenag Makedonia so'oag tipto palamnori,
anag moloro ambatkenonge sunsunum uro,
“An as Efesus wamlulam,”
sembamna.
“An Efesus wapmendi ulamlulam,”
senelamnangena,
nimi etpareri Allah yubu kilbi agha sik komne ambatsiong nimi tanekoag,
“Undop yubu ambatsululom kom,”
aro irikahilulam.
4 Sindi kom nepna neptop yubuap,
nimi mangaroba yingkiroba lelektop yubuap ambarelamsiong yubu ene sembe nimiri saekag lemnep komdi,
sop-sop yubu ene sembe lel dalamangne nene,
“Kom talul,”
aro wenelamsululam.
Allahri awe nuri sa'oag pipsiogti,
“Nanag sikne aro wana palilapmunne toman agha nari awe tolamlulom,”
aro nunag pipsiog.
“Awe tolamlulom,”
aro nuri sa'oag pipsiog aghana,
sindi ambarelamsiong yubu eneri nimi wana wag nenelamsiangba Allahri,
“Awe tolamlulom,”
seogne sunsunum uro ulamang kom.
5 Nari,
“Undo ambatsiseng kom,”
aro iriklamsin nena,
“O'ona senel dalamukang,”
senelamnari yubu nene ambatken.
Nari yeng senelamnangena,
nimi wanaag sembenga orog nimi wamikti,
sindi wanaag sik uro,
“Walingeog uan,”
senelamikti wanaag agha Yesusag sikne aro wana palilamukang.
Undo unulamik tanena,
“Allah o'ona senelamikti,
sin mamun o'ona senel dalamukang,”
senelamnari yepsinep kom yubu ambatsirop nang tane wenero iriklamsin.
6 “Nia undo-undo wali uro ulamlulom,”
aro wenelamsin aghana,
nimi etpareri nari wenehirop yubu ene wail ibarelamongdi,
Allahap nimiap o'ona seneptangtopne lipsiong.
Sin mamun uro yabinep komne sik komne agha lelamang.
7 Sin nimi taneko,
“Musari arukahiog yubu amoro ambatsirop nimi tahabe,”
aro ambarelamsiang.
Sindi yubu kiki telekto el uro ambatsirop nang wamloa saog aghana,
yubu tam sirikagne ekondi,
yubu kiki pamag agha lanalamangne babe lomag wamlange sinna ekon.
8 El uro wamap nena,
Allahri samenag Musari aruksirop yubu nenena wali.
Wali aghana,
ot nimiri Musari aruksirop yubu sik uro saelbamnari,
sunsunum uropne mo ulamna tanena,
sik uro wali sembanep.
9 Nen nhon el wamap nena,
Musari irikto arukahiog yubu enena nimi wali uro ul pirop nimi sembe mome toro pibog kom.
Musari arukahiog yubu enena irikna ingisaplorop nimi sembe,
Allah wail ibatto urop nimi sembe,
Allah omektop kom nimi sembe,
malia urop nimi sembe,
Allahri senenne semban koma urop nimi sembe,
salik-malik uro ul pirop nimi sembe Musari iriktop yubu mome toro pibog.
Sin undo urop nimiri nimi olamsiangdi,
sikini sikinin ohirop nimi sembe Musari irikto arukahiog yubu mome toro pibog.
10 Kelabo nengabo toptan komag agha walep tangto malia urop nimi wamang.
Ora nimiri malia urop nena,
sin mamun salik-malik uro,
“Uahaneme,”
senenneag agha kabuniap-kabuniap elkel ela'ange nenep tangka wamloa saog uro,
kelaboap-kelaboap ela'ange elkel nenep tangka wamloa saog uro walep tangtop nimi wamang.
Nimi sae kaupto,
pham to,
kam to nenelamsiloa saog uro kamna kapto tolamangdi,
ora nimiri saeag tarelamsiang.
Orolena lerop nimi wamang.
Sikne nikniro,
“Eldi undo unuaoba imno,”
aro orolenange lerop nimi wamang.
Nimi maiknori Allah yubu sikne amohirop yubu sunsunum uro uan koma malia ulamang.
Ni undop nimi tane sembe Allahri iriktop yubu arukahiogne sunsunum uro Musari mome toro pibog.
11 “Wana walinge,”
aro omeklamapne Allah ponekori eldamneri sik yubu neneko nanag ambatneogti,
“Allah nubu sirikne ponekori yubu walinge ambarelamsululam,”
aro nari saeag pibog.
Nari saeag pibog ane sembe,
Allah yubu sikne sunsunum uro yubu walinge sik uro tipto ambarelamsin.
“Allahri wana waliri taulbaneo,” aro Paulusti ambatsiogha
12 Yesus Kristus nu Saelba Uhiropne ponekori na sembe,
“Nari arukna sol walinge,”
sembaneori sekitneo.
Eldi,
“Nari awe sol wali uro webatnelul,”
aro sekitneori,
nari nong mikip nenelamneoba,
eldi awe nari tolamna.
Eldi na sembe wali senelamneoa sembe Yesus nu Saelba Uhiropne ponekoag wana yororo,
“Naba naniong,”
aro kiplamna.
13 Samenag nari Yesus san tilipto,
“Elag seneragtop nimi seklebaik,”
aro yo uro olamsisi.
Nadamne maiptangto yog nimi olamsisi aghana,
samenag na anam Yesusag sikne aro seneraghamsi komdi,
nari ulamsinge na babe ekonne agha ulamsi.
Ane sembe na yareag sembamneogne sembe
14 nu Saelba Uhiropne ponekori nanag wana yororo maikno uro yepneog.
Nanag wana yororo yepneog nena,
elag sikne aro wana paliro seneragnangeap,
o'ona senehinneap tatneog.
Yesus Kristusap ma'ap tangtop nimiag tatsinepne sunsunum uro mag ikloa saog uro nanag maikno uro pelengero tatneog.
15 Yubu kiki otsikne agha lag phoro lemnuan.
Nimi nenneri babe malia urop aghana,
nanagha yonge mali sirikne ulamsinge poneko na wamna.
Malia sirikne ulamsi aghana,
Kristus Yesus yaog nena,
“Malia urop nimi wali nenero taulbahinun,”
aro mog so'oag yaog.
Nari ot sik yubu nene ambatsin ane sembe,
sikne aro to'opto seneraglapmundi saelbamlulom.
16 Ora nimiri malia ulamang aghana,
nari agha mali sirikne maikno ulamsi.
Na Paulusti malia ulamsinge sembe Yesus ponekori nanag tam pimnep aghana,
el nong ningkiag agha na malia uropne pone sembe wana paiamogti,
yareag sembaneog.
Kristus Yesus ponekori samenag seneraglamogti,
“Paulus yareag sembaneri,
el omna koma wana paiamneba,
yog nimiri ibukang.
Ibik nimi tanekona,
na Yesusti wana paiamnange sembe el taikti,
sindi babe na Yesusag sikne aro wana pimnep andarina,
ya'ag kamag uro unne tatsinun,”
aro seneraghog.
Wene aro seneraghogti,
na Paulus yareag sembaneog.
17 El ya'ag wamlange ponekori samenag wamek nimiap,
nu wamap nimiap,
wamukang nimiap salero paiamsil.
Nu mog so'oag nimiri el ililamap kom aghana,
elna nu sembe yubu sia leropne,
ya'ag tebanep komne,
Nuni Allah ot nhonogne wamla.
El aghabog papna koma paliag nenero,
“Nuni,”
aro kipto omeklamebe paghabog kipto omeklamukap.
Sikne agha saekag lebap.
Timotiusti awe tomnepne
18 Naba name Timotius!
Samenag Allah Yameri nimi nhon-nhondi wanaag anag amik uro yabinepne sembe yubu pibongba,
sindi anag Allah yubu silimu tipto ambatkeong.
Tipto ambatkeong yubu sunsunum uro,
“Ulamlulam,”
aro awe nene an saeag palilamna.
Anag ambatkeong yubu enekori mikip nembagheleba,
yubu eneko sunsunum uro sol wali uro ul palamlulam.
Andi ulamlulam nena,
yin salerop nangdi mal talamloa saog uro wana nhonog uro walingeag agha malinge luknuro yubu ambarelamsululam.
19 Ambarelamsimendi Yesusag sikne aro wana paliro ulapmendi,
andi wanaag,
“Sikne aghabog uanun,”
seneropne sunsunum uro walingeog ulamlulam.
Samenag nimi etpare Yesusag sikne aro seneraglamong aghana,
sindam nimiri wanaag agha seneragtopneri wa'epto poa pihio.
Wa'epto poa pihioba sindi,
“Sik uro uropne walinge aghabog uahane,”
aro seneraglamong komdi,
sindi wanaag agha Yesusag sikne aro seneragnange teba'en nembaong.
20 Sin Yesusag seneragnange teba'en nenep tarong nimi abenekona,
Aleksanderap Himeneusap.
Sin phende abeneko sembe nari tam pelengero,
“El tarukang,”
aro phia sikini nubunge saeag pipsino.
“Sin nimi abeneko el tanep nena,
‘Allah san tilibanep kom,’
aro el tarukang,”
sembanori phia saeag pipsino.