Tesalonika
Nimi Sembe
Paulusti Mome Toro Pibogha Phendepne
El nenerop yubu palilamap
Paulusti Tesalonika nimi sembe ik selek sum mome toro pibekpa, kembaekti sik senelamek. Sik senelamek aghana, seklenne seklelamekpa, ora nimiri, “Yesus mog so'oag samoro yaoba, wene wamapne eldi laplorop nimi agha wamap,” aro ambarelamsiek (2 Tesalonika 2:2). “Yesus samoro yaoba, wene wamap,” aro ambarelamsiekpa, as Tesalonika nimi seklelamekne sembe, “Welaro wamukap?” aro wana ophag agha hail dalamek.
As Tesalonika nimi seklelamekti, hail dalamekti, “Yesus samoro yaoba, wene seklelamapne mo tipto seklelamukap te?” aro wana ophag alamekpa, “Orolena yubu ene sik sembaheng kom,” aro Paulusti sinag mome toro pibog. Paulusti tibin nenero ambarelamsiogti, “Yesus anam samoro yan komag, Allah yubu ingisaptop nimi nubunge nhon lag tale taneogna, Yesus samoro yalul. Yaleri Allah yubu ingisaptop nimi nenekoap, Kristusap aisa nenerop nimi tanekoap lunuro opsilul,” aro tibin nenero mome toro pibog.
Mome neneag Paulusti Tesalonika nimi nen wenelamsiogti, “Yesus samoro yalulne nang-nangaro tilapmundi, sol mali tan koma, sol wali uro saeri ero tolamlulom,” aro wembahiog. Apna nen wenelamsiogti, “A'undi, ‘Sololamna,’ semban koma tipto walia ulamlulom,” aro mome eneag wembahiog.
Paulusti Tesalonika nimi sembe mome toro pibogha phendepne lomag wamlange
1:1-2 - Paulusti as Tesalonika nimi kipsiogha
1:3-12 - Paulusti Tesalonika nimiag, “A'un wali uro Kristusag wana paliro ulamlom,” aro omekto ambatsiogha
2:1-17 - Kristus nen samoro yanepne sembe ambatsiogha
3:1-15 - Kristusag wana palirop nimiri ulamnepne sembe ambatsiogha
3:16-18 - Mome komobanebag kipsiogha