Tesalonika
Nimi Sembe
Paulusti Mome Toro Pibogha Selekne
El nenerop yubu palilamap
As Tesalonika aneko Roma nimiri saelbamsiek so'o Makedonia so'oag as soro kalurop as nubunge wamog. Paulus elkae Silasap as Filipia lambarekti, as Tesalonika yarek (Pogsiog Nang 17:1-10). Paulusti as Tesalonika nimiag Yesus yubu walinge ambarelamsiogpa, nimi maiknori Kristusag wana palilamek aghana, Yahudi nimi nhon-nhondi as Tesalonika wamek nimi tanekori yubu toraplamekti, malia urop nimi maikno aruklamsiekpa, “Paulus yag lambaukap,” aro lolon yubu lololamekti, put-put ana ulamek. Paulusap Silasap as Tesalonika agha yag lambahiek aghana, Paulusti yubu ka'elamek nimi maikno as Tesalonika wamekti, Kristusag wana paliro winil dalamekti, Allah omekto yubu lelamek. As Tesalonika wamekpa, Paulusti nen tipto yubu ambatto tongolamsiogti, as Korintus yaog. As Korintus wamogpa, elkae Timotiusti nik yubu ambatto tongolamsiogti, as Korintus yaogti, as Tesalonika nimi wamekne sembe Paulus ambarog.
As Tesalonika nimiri Kristusag wana palilamekne sembe ka'ebaogti Paulusti, “Sin wana mikip nembahinun,” aro mome toro pibog. Sin as Tesalonika nimiri Kristusag wana palilamekti, sin mamun o'ona senel dalamekne sembe Paulusti, “Yeng maikno ulamnelba, Allah kipto omeklamna,” aro mome toro pibog. Paulus as Tesalonika wamogne ko'o we uro wamog komdi, lambanepneog wamog aghana, mome eneag wenelamsiogti, “A'unap nhon wamuburi, a'un sembe awe wero ul palamubunge sembe seneraglamlulom,” aro mome toro pibog.
Paulusti mome eneag tam wilindi so'opto yubu ambatsiog. Nhonna, “Nengabo kelabo salik-malik uro walep tan koma, Allahri seneropne sunsunum uro top tangkapmundi, nikag mamnep,” aro wenero ambatsiog. Nhonna, ora nimiri sae urumna aghabog tero koma, nimi saeri ul piro wero mero tero wamnepne sembe wenero ambatsiog. Nhonna, Kristus nen samoro yanepne sembe el nenero ambatsiogti, “Nang-nangaro tilamlulom,” aro wenelamsiog.
Paulusti Tesalonika nimi sembe mome toro pibogha selekne lomag wamlange
1:1 - Tesalonika nimi kipsiogha
1:2—3:13 - Paulus wana yeng ulamogpa, Tesalonika nimi sembe Allah omeklamogha
4:1-12 - Kristusag wana palirop nimiri ulamnepne sembe wenelamsiogha
4:13—5:11 - Kristus mog so'oag samoro yanepne sembe ambatsiogha
5:12-22 - Paulusti mome komobanebag Tesalonika nimi wembahiogha
5:23-28 - Mome komobanebag kipsiogha