Kolose
Nimi Sembe
Paulusti Mome Toro Pibogne
El nenerop yubu palilamap
Paulusti mome toro pibog yubu ene Yesusag wana paliro winip tangtop nimi as Kolose wamek nimi sembe mome toro pibog. As soro kalurop as Kolose aneko Asia so'oag wamogpa, Paulusti yubu ene sin sembe mome toro pibog.
Sin Kolose nimi Yesusag wana paliro winip tangtop nimi sam yubu ambarelamsiog nimina, Epafras. Epafras ponekori yubu walinge Yesus sembe ambarelamsiogti, Yesusag wana palirop nimi as Kolose wamek nimi poloro wimbahiog. Paulusti yubu nene mome toro palilamog sum eneko, nimiri el haing sae kaupto kop aeag tobongkibek aeag wamogpa, Epafras poneko babe kop ae anekoag nikag wamdekpa, el poneko sembe ik nhon-nhon Paulusti yubu neneag mome toro pibog.
Paulusti yubu neneag wenelamsiogti, “Nimiri orolenange nhon saog, nhon saog lelamikne sik senelamikag,” aro Kolose nimi wenelamsiog. Orolenange ambatsirop nimiri sengkwanektop yubu nhon saog, nhon saog ambarelamsiek yubuna, polanne ililamekne agha el tangtopne babe, imagnang malaikat pharopne babe, sindam nimi nong iriktangto, “Seklero wamnun,” aro uropne babe, sengkwanektop yubu ambarelamsiek. Sengkwanektop yubu ambarelamsiek aghana, Paulusti yubu ambarelamsiogti, “Allahri walinge tognoroba pibogne ni Yesusag lag nembatsiog. Nu Yesusap ma'ap tangkamap tanena, Yesusap nhon nu kamag nembahiog,” aro Paulusti ambatsiog. Ane sembe, “Yesus yubu walinge sunsunum uro sop-sop ulamsebe,” aro Kolose nimi wenero ambatsiog.
Paulusti Kolose nimi sembe mome toro pibogha lomag wamlange
1:1-23 - Paulusti Kolose nimi kipsiogpa, Kristusap Allahap wamdangne sembe omektop yubu ambatsiogha
1:24—2:19 - Kristus wamlange sembe Paulusti sik yubu tibin nenero ambatsiogha
2:20—4:6 - Kristusap ma'ap tangto kamag tangtop nimiri ua uropne sembe ambatsiogha
4:7-18 - Paulusti mome komobanebag wenero kipsiogha