Kolose
Nimi Sembe
Paulusti Mome Toro Pibogne
Paulusti Kolose nimi kipsiogha
1
1-2 Nangkabo,
na Paulusti a'un as Kolose wamlom nimi kiplamsin.
Na Paulusna,
Allahri yeng senenneag agha Yesus Kristus ponekori na wepto pogneog.
Na Paulusap nungkae Timotiusapti kiplamsinam.
A'un Allahri,
“Namabo taukang,”
aro a'un wepsiogpa,
a'undi Allahri wepto poghogne Kristus ponekoag sikne aro wana palilamlomdi,
elap ma'al dalamlomdi,
nungkabo tangtop nimi wamlom.
“Nuni Allah ponekori wana a'unag yororo walia ulamsileri,
a'un wana aingnilamsilul,”
senelamnamdi a'un sembe molbarelamsinam.
Paulusti Allahag, “Wah naba Naniong,” aro kibogha
3-4 Nuri a'un sembe ka'ebabongena,
“Yesus Kristus ponekoag sikne aro wana palilamangdi,
Allah elmabo wepsiog nimi ni o'ona senelamsiang,”
alamonga ka'ebabo.
Ka'ebabori nu Saelba Uhiropne Yesus Kristus poneko Ili Allahag molona molbarelamsiapne abeneko pere,
a'un wali wamlomne sembe,
“Naba naniong,
wali yeplamsilam,”
aro Allah kiplamap.
5 A'un o'ona senel dalamlomne nenekona,
Allahri wali-waliaba imag wero pairoba a'unag tatsinepne sembe sik yubu walinge nene ka'ebaomdi,
“Topsebe,”
aro nang-nangalamlom.
A'un,
“ ‘Topsebe,’
aro nang-nangkamukap,”
seneropne neneag agha Yesusag wana palilamlomdi,
Allah elmabo wepsirop nimi o'ona senelamsilom.
6 Yubu walinge neneko a'unag ambarel ahioba,
ik selek sum ka'ebaomdi,
Allahri wana nimiag yorolamsilne sembe sik uro el taomne neneag agha a'undi wali-walia uroba wana maubaloa saog uro maikno lag talamsil.
Ane saog uro yubu walinge neneko sabo talamlaba,
as tala-tala wamang nimiri ka'elamangdi,
sik senelamangneag agha wali-walia ulamang.
7 Yubu walinge el taom yubu neneko nungkae wanaagne sol walinge Epafras ponekori samenag a'unag ambatsio.
El nuri sae tangom agha sol wali uro Kristusti awe nunap nhon awe toropne ponekori samenag ambatsioba,
yubu walinge el taom.
8 El taomdi,
a'un Allah Yame Walingeri senenneag agha o'ona senel dalamlomne sembe babe Epafras ponekori nunag yubu ambatsio.
9 A'unna Allahri Yame Walingeri senenneag agha o'ona senel dalamlom ane sembe,
nuri ik selek sum a'un sembe ka'ebabongeag agha nuri a'un sembe papna koma Allahag molona molbarelamsiap.
Nuri a'un sembe Allahag molbarelamsiap nena,
Allah Eldamne Yameri a'undi wana heksiropne el nembatsilengeag agha,
“Eldi seneropne ni wali uro to'opto el talulom,”
aro a'un sembe Allahag molbarelamsiap.
10 “El talulom,”
aro molbarelamsiap andarina,
Allahri a'un yeplamsileba,
a'undi nia mangkina ulapmunneag agha nu Saelba Uhiropneri,
“Sunsunum,”
seneropne aghabog el wana wali nenero ulamlulom.
Ni wali-walia undo unulapmunne taneko kal wana maulamloa saog uro lag talamleba,
Allahri senenne nen ma'aro el talamlulom.
11 Allah eldamne mikip phelektopne imang wareropne agha a'un mikip nenelamsilul andarina,
sa'a-sa'a uro yabileba a'un wana pail angkalapmundi,
awi uro Allahri senenne sunsunum uro wana khapto ulamlulom.
12 Nuni Allah ponekori,
“Nari imang wareropne agha nia mangkina saelbamsinne neneko nari wepsirop nimiag pogto tatsinun,”
aro a'un wali toro saelbanep nimi nembahiog.
Ane sembe,
“A'undi elag,
‘Naba Naniong,’
aro kipto omeklamlulom,”
senenneag agha nuri a'un sembe Allahag molbarelamsiap.
13-14 Nu samenag wamubungena,
inibinag wamububa,
inibinne saelba uhiropne phia sikini nubunge nenekori nu saelbamsiog.
Nu saelbamsiogpa,
mali-malia ulamubu aghana,
Nuni Allah ponekori Elme wanaagne pere agha nuri mali-malia ulamubunge neneko tam wailag nembaog.
“Naringe,”
aro toro pelepto nu inibinag agha taulbahiogti,
nu enero poa Elmeri saelba uhirobag ko'oro poa yahiog.
Allahri wepto poghogne Kristus poneko paliag sirikne sembe ambatsiogha
15 Nimiri Allah haingdi imnep kom aghana,
Elme ponekori Allah wela saogne sunuro nimi whingag lag nenep tangkamog.
Allahri nia mangkina anam sumban komag,
Elme nhonogne poneko samenag agha wamog.
16 Nia mangkina wamna komag Allahri Elme pere agha ni sumbaog.
Ni imag wamlange babe,
mog so'o alibag wamlange babe sumbaog.
Lag wamlange babe,
haingdi imnep komne wamlange babe el pere agha sumbaog.
Yubu sia lenneap,
mikipneap,
nimi saelba uhiropneap,
nimi saelba uhiro puka wamneba babe,
ni aneko Allah Elme el mori eldamne sembe sumbaog.
17 Nia mangkina wamlange anam wamna komag,
Allah Elme poneko agha samenag wamogti,
el mori nia mangkina wamlange,
“Kwerek tangto yabileag,”
aro o'oro tiplamlari paiamsil.
18 Elna usog wamlaba,
elag wana paliro winip tangtop nimi el nong saog nembahiog.
El mori alnibaogti,
me yandonge sam mangap taloa saog uro nimi teptobag agha sam kamag taog.
“Elba,
el agha nia ni sembe samne paliagne wamlul,”
aro Allahri el kamag nembaog.
19-20 “El agha samne paliagne wamlul,”
sembaogne tam nene sembe.
Allah el mori seneraglamog nena,
“Nia nanag yame mikipneap,
wana seneragnaap,
ni nanag wamlange neneko samenag agha na Nameag ni to'opto wamla.
El pere agha nia mangkina mog so'oag uropneap,
imag uropneap sumbahisinge nen nanap ma'abahinun.
Name eneko kalag sipto obikpa,
eneng lambalenge pere agha aingniro ma'abahinun,”
aro wali sembaog.
21 “Ma'abahinun,”
sembaog nena,
a'undi samenag wana yo uro seneraglamlumdi,
ulamlumne agha Allah wailag ibatto a'ep tangkamlumdi,
aisange nembamlum.
22 Aisange nembamlum aghana,
wene Elme nimi nong tebaogne pere agha a'unap elap nimi pali walinge nenero ma'amsil.
“Nen ma'abahinun,”
aro seneraglamog nena,
“Nimi tanekori na Allahri seneropne sunsunum uro ulamikti,
malinge uropne nhon sinag ipsinep komdina,
sinag tam pimnep kom.
Na whingag whi uro sekamukang,”
aro a'un elap ma'amsil.
23 “Na whingag sekamukang,”
senelamlangena,
a'undi tipto Allah Elmeag sikne aro wana palilapmundi,
elag meptangto Yesus yubu walinge sae limna koma wana khapto tiboglapmun taneogna,
Allah whingag wali uro sekamlulom.
Yesus yubu walinge ka'ebalomne neneko nimi tala-tala im tiptobag so'o tiptobag wamang nimi ni ambatto tongolamsiap.
“Yesus yubu walinge neneko ambatto tongolamsinun,”
aro na Paulus nimi yepsinne tahiri,
ambatto tongolamsin.
Yesusag wana paliro winip tangtop nimi sembe Paulusti whin seklero tolamogha
24 Wene a'un sembe na seklelamnange na awi ulamnel.
Kristus poneko a'un sembe seklebaog aghana,
eldi nongag seklenne nen amik lag tanepneog wamla.
Eldi nong anena,
a'un Yesusag wana paliro winip tangtop nimi eldi nong wamlom ane sembe,
a'un nimi sembe seklelamna.
Nari nong kon og seklelamnange nenena,
“Eldi nongag seklebanepne nanag taho,”
aro nari babe tipto a'un sembe maiknoro seklelamna.
25 Allahri nanag,
“Awe tolamlulam,”
aro nari saeag pibog andarina,
na nimi yepsinne tahiri,
Allah yubu sunsunum uro nhin a'unag ambarelamsin.
26 “Yubu ambatsululam,”
aro tatneog yubuna,
samenag agha hengkun taibuka taubuka palamloba,
nimi likna-likna palamloa yubu eneko tognoro wamog.
Tognoro wamog aghana,
wene Allah elmabo wepsiog nimiag lag tangto palamogha palamla.
27 Allahri elmabo wepsiog nimiag wali tup nembahineba tognoamog yubu eneko,
“Lag nembanun,”
sembaogpa lag taog.
Allahri,
“Yahudi sisa kom nimiag wali sirikne tup nenehiropne tatsinun,”
seneropne tognoro wamog aghana,
wene lag nembaog.
“Tatsinun,”
sembaogne lag nembaogne nenekona,
eldi wepto poghogne Kristus poneko a'un Yahudi sisa kom nimi kulomag wa'iogpa,
elap ma'ap tangkamlom.
Ane sembe,
a'undi babe tiboghamlomdi,
“Allah imang warero libango arobag wa'aukap,”
aro nang-nangalamlom.
28 Allahri wepto poghogne Kristus poneko sembe ambarelamsiap nena,
Allahri nu wana heksirop yubu niag agha nuri nimi ni wenero amolamsiapti,
el nenelamsiap.
Nuri ambarelamsiap nena,
“Nimi ni Kristusap ma'ap tahengdi,
wana whi uro Allah whingag wali uro sekamseng,”
aro Kristus poneko sembe ambarelamsiap.
29 Tam nene sembe Kristus ponekori elenge mikipneag agha na nong mikip nenelamnelba,
whin seklero awe toro ambatto tongolamsin.