Filipi
Nimi Sembe
Paulusti Mome Toro Pibogne
El nenerop yubu palilamap
Paulus samenag as Filipi piogti, yubu walinge Yesus sembe ambatsiogpa, as Filipi nimi nhon-nhondi wali uro ka'ebaek (Pogsiog Nang 16:1-40). As Filipi ane Makedonia so'oag wamlaba, Paulus wamog ko'oag Roma nimiri saelbamsiek. Yesusag sikne aro wana palirop nimi as soro kalurop as Filipi wamek nimi sembe mome toro pibog nena, Paulus kop aeag wamogpa, yin salerop nangdi, “La'imbaleag,” aro yae paiamekpa, Paulusti mome nene toro pibog. Paulusti mome nene toro palilamogpa, Allah yubu ka'elamek nimi nenneri, “Undo-undo unulapmun taneogna, a'undi malia uropne agha Allahri taulbahilul,” aro sengkwanektop yubu ambarelamsiek. Sindi sengkwanektop yubu ambatsiekne sembe ka'ebaogti, Paulusti Filipi nimiag, “Ot Yesusag sikne aro wana palirop nimi mo Allahri taulbahilul,” aro yubu nene mome toro pibog.
Paulus sae kaupto kop aeag wamogti, Filipi nimi sembe, “Ina selepne toman piikag,” aro wana ikin wamog. Eraruk wamog aghana, Paulusti Yesusag wana palilamogne sembe, wana awi uro, “Tapto ya'ag wali tanun,” aro seneraglamog.
Paulus poneko elenge wanaag agha Filipi nimi sembe o'ona senelamsiogti, “Nanag kwema ulamneoba, a'un Filipi nimiri wali yeplamnelom,” senelamsiogti kiplamsiog. Paulusti Filipi nimi sembe o'ona senenneag agha wenero, “A'un babe tam ikinne a'unag talamle tanena, khapto wapmundi, Yesusag aghabog sikne aro wana palilamlulom,” aro wenerop yubu nene mome toro pibog.
Nen nhon, Paulusti wenero ambarelamsiogti, “Yesusti Eldamne kibiang towalengep tan koma wamog saog uro a'undi babe maiptan koma wamlulom,” aro mome toro pibog.
Paulusti Filipi nimi sembe, “Ekon wamikag aro el nembahinun,” sembaog nena, nu mog so'oag nimi anabiag agha Allahri nimi wepsiogti, Allah Elme Yesusap ma'ap tangtop nimi nembahiogne sembe Paulusti sin el nembahiog. Allahri, “Nimi mog so'oag nimi agha Yesusti ualenge pere agha nanap ma'ap taukap,” aro uaog nena, nu mog so'oag nimiri wali-walia ulamapne sembe uaog kom. Allah elba eldi wana nunag yorobahinneag agha, “Yesusti ualenge pere agha ma'abahinun,” aro uaog. Undo unuaog aghana, Yahudi nimi agha nhon-nhondi Yesus yubu ka'elamek aghana, wana phende saog wamek. Nimi sisa Yahudi nimi agha Yesusag seneragtop nimi wamek aghana, sin wana phende saog urop nimiri seneraglamekti, “Nimiri Yesusag seneragnep aghana, nuni nunisagti ul palamekne sunsunum uro ul palamebe taneogna, Allahri nu sembe wali sembahilul,” aro ulamekti ambarelamsiek. Tam nene sembe Paulusti karong sirik senelamogti, “Nen sap sarikto Filipi nimiag sikne ambatsinun,” aro mome toro pibog.
Paulus haing sae kaupto wamogne sembe wene wamang nimi maiknori seneraglamang nena, as soro kalurop as Roma wamogti, mome nene mome toro pibog aro seneraglamang. Paulus haing sae kaupto kop aeag wamogti, “Tam lelekto kemero kareptop nimi whingag pelebel tanan yubu ambatsinun” aro nang-nangaro wamogti, mome nene mome toro pibog. Mome nene yubu lilim ka'ebi agha Paulustinge wanaag wamlange el tanep. Filipi nimiri maiknoro Paulus yeplamekpa, Paulusti sin sembe awi maikno uro o'ona senelamsiogti, “Mikip nembahinun,” aro yubu nene mome toro pibog.
Paulusti Filipi nimi sembe mome toro pibogha lomag uropne
1:1-11 - Filipi nimi kipsiogha
1:12-26 - Paulusti eldamne wamogne sembe ambatsiogha
1:27—2:18 - Yesusag wana palirop nimiri ulamnepne sembe ambatsiogha
2:19-30 - Elkabo Timotiusap Epafroditusap abeneko sembe, “Undo unuarukang,” sembaogti ambatsiogha
3:1—4:9 - “Haing whi uro yae togtangto wamlulom,” aro wenero ambatsiogha
4:10-23 - Paulusti, “A'unap nanap sae tiptangto nimi pali wamap,” aro kipsiogha