Efesus
Nimi Sembe
Paulusti Mome Toro Pibogne
El nenerop yubu palilamap
Paulusti mome toro pibog yubu ene, nimiri el sae kaupto kop aeag tobongkibekpa, Kristusag wana palirop nimi as soro kalurop as Efesus wamek nimi sembe mome toro pibog. As Efesus aneko Asia so'oag as nubunge wamog. Mag laut longorop mag nubunge abolag wamogpa, nimi kabongag mag alip toman yabirop nimi maikno as Efesus anekoag sangnil alamek. Efesus nimi sembe mome toro pibog yubu eneag, Paulusti yubu tam etpare sembe ambarelamsiog. Tam nhon ambarelamsiog nena, Kristus ponekori nu taluro saelbamsil nimi wamap ane sembe, “Nu Yesusag wana palirop nimi seneragna nhonog uro ma'al dalamukap,” aro nubu nenero mome toro pibog. Yahudi nimi babe, Yahudi sisa kom nimi babe, Yesus Kristusag wana palilamap tanena, nong nhonog saog tangom agha ma'al dalamap.
Nen tam nhon ambarelamsiog nena, Yesusag wana palirop nimiri ua uropne sembe tibin nenero ambarelamsiog. Samenag nu mog so'oag nimiri seneropne sunsunum uro, “Malia uahabe,” seneropne nelepto ulamubu aghana, wene Allah Eldamne Yame Walingeri seneropne sunsunum uro ulamnepne sembe mome toro pibog. Yubu eneag Paulusti Yesusag wana palirop nimi wenero ambarelamsiogti, “Undo-undo ulapmunba, nu Saelba Uhiropne ponekori yeplamsileba, malinge luknuro mikip talulom,” aro wenelamsiog.
Paulusti Efesus nimi sembe mome toro pibogha lomag wamlange
1:1-2 - Paulusti Efesus nimi kipsiogha
1:3—3:21 - Kristusap elag wana paliro winip tangtop nimiap sembe ambatsiogha
4:1—6:20 - Kristusag wana palirop nimiri wana wendogneag agha ua uropne sembe ambatsiogha
6:21-24 - Paulusti mome komobanebag kipsiogha