Galatia
Nimi Sembe
Paulusti Mome Toro Pibogne
El nenerop yubu palilamap
Samenag Paulusti nimi tala-tala wamek nimiag Yesus yubu walinge ambatto tongolamsiogpa, yubu eneko nimi maiknori wali ka'elamekti, sik senelamek. Sik senelamek aghana, nimiri hailamsiekti, “Yahudi sisa kom nimi tanekori Musari aruksirop yubu salero ul peheng to, kom to?” aro haiptangto lel dalamek. Wene aro lel dalamekpa, Paulusti tam nene sembe yubu ambarelamsiogti, “Allahap nimiap nen sae tiptangto ma'ap tanep nena, Musari aruksirop yubu pere agha kom aghana, Yesusag sikne aro wana paliropne pere agha Allahap ma'ap tanep,” aro ambarelamsiog.
Wene aro ambarelamsiogpa, Yesusag sikne aro wana palirop nimi Galatia so'oag wamek. Galatia so'o aneko Asia so'oag wamogpa, as maikno Galatia so'oag ubu paiamek. Yesusag wana paliro winil dalamek nimi wamekag aneko Paulusti yubu toraplamek nimi yingkina Galatia nimi yubu ambarelamsiek. Yubu ambarelamsiekti, “Musari aruksirop yubu saelba ul palapmun taneogna, Allahap sae tiptangto ma'ap tanep,” aro ambarelamsiek.
Wene aro ambarelamsiekpa, Paulusti Galatia nimi sembe “Ekel ina palamikag,” aro yubu ene lero mome toro pibogti, “Tarel pihi,” aro poghog. Paulusti ambarelamsiog yubuna, “Nimiri yubu mo ambarelamsin kom,” seog aghana, “Allahri na wepto, ‘Yesus yubu walinge Yahudi sisa kom nimiag ambarel phululam,’ aro na pogneogpa ambarelamsin,” seog.
Paulusti Galatia nimi sembe mome toro pibogha lomag wamlange
1:1—2:21 - Paulusti eldamneap, Yesus yubu walinge ambarelamsiog yubuap sembe tibin nenero ambatsiogha
3:1—4:31 - Nimiri Kristusag sikne aro wana paliropne toman agha Allahap nen ma'ap tanepne sembe ambatsiogha
5:1—6:10 - Kristusti nu wali sae lopsiogpa, Allah Yame Walingeri nu menangalamsilne sembe ambatsiogha
6:11-18 - Paulusti mome komobanebag wenero kipsiogha