Galatia 1

Galatia

Nimi Sembe

Paulusti Mome Toro Pibogne

Paulusti Galatia nimi kipsiogha

1-2 A'un Galatia so'oag wamlom nimi Yesusag wana paliro nikag winil dalamlom nimi, nangkabo! Na Paulusti a'un sembe mome toro palilamna. Nimiri na Paulus wepto towalengkaneek kom aghana, Yesus Kristusap, el kamag nembaogne poneko Nuni Allahap abenekori na wepto pognerekpa, yubu ambatto tongolamsin. Na Paulusap, nungkabo Yesusag wana palirop nimi nanap nhon wamap nimi niapti a'un kiplamsiap. 3 “Nuni Allahap, nu Saelba Uhiropne Yesus Kristusap abenekori wana a'unag yororo walia ulamsirikti, wana aingnibahurukang,” senelamapti a'un sembe molbarelamsiap. Nu Saelba Uhiropne Yesus Kristus ponekona, 4 el Nuni Allahri wanaag seneropne el uro wamogti, sunsunum uro yaog. Yesustina nu sembe, “Mog so'oag nimi wene wamang nimiri sop-sop mali-malia ulamangne sembe sinag tam pipsileagti, sindi mali-malia uropne kom nenero taulbahinun,” aro eldamne paip tangto tebaog. 5 Nuni Allah poneko paliag nenero kiplameberi, ya'ag uro omeklamebe paghabog omeklamukap. Sikne agha saekag lebap.

“Yesus yubu walinge ot nhonog sikne wamla,” aro Paulusti ambatsiogha

6 Allahri Yesus Kristus wepto poghogne ponekori wana a'unag yororo uaogneag agha Nuni Allahri a'un yopsio. A'un yopsio aghana, nari a'un sembe lo'om aro senelamnangena, ko'o we uro pin koma a'unba a'un yopsionge poneko wail ibare agha lililamlomdi, yubu orange nelepto salelamlom. Yubu orange neleplamlom yubu nene nimiri, “Yubu walinge,” alamang aghana, 7 yubu sengkwanektopne agha a'unag ambarelamsiang. Allah yubu walinge sik uropne nhonog wamla. Ot nhonog wamla aghana, nimi etpare tanekori yubu walinge Kristus sembe sengkwanekto ambarelamsiang yubuag agha a'un wana seneragna samsamolamsiang. 8 Kristus yubu walinge nuri samenag a'unag ambatsibunge ot sikne agha ambatsiburi, yubu nene a'ero tanep kom. Nimi nhon nunag agha yalenge babe, imag agha yubu payalenge babe, nuri samenag yubu walinge Yesus sembe ambatsibunge sunsunum urop kom yubu ambatsile tanena, Allahri nimi eneko yo'obale. 9 Nuri irikto yubu lebubunge nen sap sarikto lemnun! Nimi nhondi babe yubu ambatsile yubuna, nuri a'unag wali yubu sikne Kristus sembe ambatsibuba, toro saelbalumne sunsunum urop kom yubu ambatsile tanena, Allahri nimi eneko yo'obale.

10 Wene aro yubu lemnange nenena, wela sembalom? Nari lemnange, “Nimiri wana tomnun,” aro yubu lelamna to, “Allahri na wali sembanelul,” aro yubu lelamna to? Nari ulamnangena, “Allahri wali sembanelul,” aro ulamna. Aghana naba, “Nimiri wana tomnun,” aro mo ulamsene tanena, na Yesus Kristus ponekoringe arukna sik uropne wamsene kom.

Allah Eldamneri Paulus wepto poghogha

11 Nangkabo, “A'un babe el uro wamsom,” aro tibin nenero ambatnuahin. Nari yubu walinge ambarelamsin yubuna, nimiri lero ambatneropne agha ambarelamsin kom. 12 Na yubu walinge el tahingena, nimi nhondi babe, “Yubu nene saelbamlulam,” aro ambatto el nembaneekpa, el tahi kom. Aghana Yesus Kristus el mori yubu walinge lomag uropne neneko lag nenero ambatneogne agha el tahi.

13-14 Wene aro lemnangena tibin nenero ambatnuahin. Na samenag wamsinge sembe nimiri na sembe lelameka ka'ebalumdi el wamlom. Na samenag Yahudi nimiri Allah yubu saelba ulamekti, ul palamekneag kasmi agha saelbamsiri ulamsi. Yahudi nimiri saelba ulamekne ul palamsiba, nanap nhon likubu ko'oag nangkabo wamek nimiap nanap sunsunum uro wamsi komdi, nari agha phelekto ulamsi. Phelekto ulamsiba, nani yabo Yahudi nimiri, “Nuri ul palamapne nene saelbamlulom,” aro amolamsiekne sik yeng uro ulamsi. Yahudi nimiri ul piropne kasmi agha saelba ulamsi aghana, nari samenag Yesusag sikne aro wana pimna koma sin Yesusag wana paliro winip tangtop nimi sembe na wana yongeag agha, “ ‘Seklebaik,’ aro orog nembahinun,” senelamsiri ulamsisi. 15-16 Undo senelamsiri ulamsisi aghana, na anam mangaro yabin komag agha Allahri na sembe el wamogti, nanag wana yorolamnelneag agha wepto yopneog. Na wepto yopneog nena, Allahri na Paulus sembe, “Ik nhon sum Name Yesus Paulus whingag lag nembaneba, Yahudi sisa kom nimiag yubu ambatsileba, Name Yesus sembe sin el taukang,” sembaog. “Name lag nembanun,” sembaog sum eneko Allah Elme nanag lag taogpa, elag sikne aro seneragsi. Undo nanag lag taogne neneko sembe, “Nimiri nanag, ‘Undo ulamlulam,’ aro ambatto wembanukang,” aro nimiag pihi kom. 17 Yesusti samenag wepto pogsiog nimi as soro kalurop as Yerusalem wamek aghana, amik Allah Elme na whingag lag taogpa, “Sin as Yerusalem nangap haiptaukap,” aro sinag babe pihi kom. Sinag pihi kom aghana, na Arab so'oag sip pihi tanena, amik sum nen samoro as soro kalurop as Damsyik sip yahi.

18 As Damsyik yahiri, hengkun wilindi wamsia, “Nanap Petrus si nhon Kefasap haiptanemeri, nimi pali nenep tanunam,” aro as Yerusalem waelbahi. Na Petrusap haiptanumua ik naual tarabare og nikag wamnumu. 19 Aghana Yesusti wepto pogsiog nang yogne haiptabu kom. Ot nu Saelba Uhiropne Yesus ilipsae taptopne Yakobus agha haiptanumu. 20 Nari momeag liro palilamnange nene orolenange agha palilamna kom. Nari a'unag ambarelamsin nena otsikne agha ambarelamsinne sembe Allah el mori ililamneldi, el uro wamla. 21 Yerusalema palamsiri, Siria mog so'oag babe, Kilikia mog so'oag babe pihi. 22 Undo wamsiri, yabalamsinge Kristusap ma'ap tangto winip tangtop nimi Yudea so'oag wamek nimiri pekto nari whing iamneek kom. 23 Nari whing pekto iamneek komdi, sin el wamek nena nimiri lelamekti, “Samenag nu, ‘Seklebaukang,’ aro olamsiog nimi eneko wene, ‘Kom nembanun,’ aro ulamog yubu eneko salero sik senelamlari, yubu ambarelamsil,” alameka agha ka'elamekti el wamek. 24 Wene nanag uro yabiogne sembe wene alameka ka'elamekne agha sindi Allah omeklamek.