Paulustina, “Nu nimi ni yebel dalamukap,” aro ambatsiogha
6
Nangkabo,
a'un nimi nhondi irikna phiro malia ulamleba ipmun tanena,
a'un Allah Yame Walingeri senenneag nelepto ul palamlom nimiri malia urop nimi eneko win-win aro wenelapmundi,
ina walingeag nen samoro payalulom.
A'undi nimi eneko wenelapmun nimiri babe a'undam nimi yae togtangto,
“Malingeri na wana tomneleba,
malia uaneag,”
aro seneraglapmundi wenelamlulom.
2 A'un nimi nhonag ikinne wamle tanena,
a'undi wanaag,
“Nari babe keyagman nembanun,”
aro yeplamsululom.
Undo yeplamsimunne pere agha Allahri wepto poghogne Kristus ponekori,
“Ulamlulom,”
aro aruksirop yubu sunsunum uro ul palamlulom.
3 “Yebel dalamlulom,”
sen nena tam nene sembe.
Nimi nhondi eldamne sembe,
“Mikipne wamna,”
seneptangtop aghana,
sik uro mikip kom tanena,
eldamneri haing kunup tangtop.
4-5 A'un nimi a'ero-a'ero a'un mori wanaag seneragto ulamlomne miptangto kemel dalapmundi,
“Wali to,
kom to,”
aro seneraglamsut.
Allahri nimi ni sa'oag awe a'ero-a'ero tarelamsilne neneko ot elag tatle nimi enekori mo tol pinep.
Ane sembe a'un nimi ni a'ero-a'ero an mori wanaag seneragto ulamlamne miplapmendi,
“Nimi orangeri ualne mombolag to,
naringe paliag to,”
semban koma seneraglamlulam.
Andamneri uropne miptangto kembiag agha,
“Walia uan,”
sembanep tanena,
an mori ualamne sembe,
“Sik wali,”
seneptanep.
Allahri a'ero-a'ero awe tatsirop nimi eneko mori tol pinep aghana,
6 a'un mamun yebel dalamlomne babe wamla.
Nimi etneri Allah yubu wali uro ka'eamle tanena,
wali-waliaba ni el saeag wamlange agha,
nimi enekori Allah yubu sinag ambatsirop nimiag wali pogto tatsilul.
7 A'undam nimi el talamsut.
Nimiri Allah sembe mo yubu nepto u kwa'en pa'abanep kom.
Nimiri meropne agha amik yongoro terop.
Ane sembe,
a'undam nimi haing kunup taheng kom.
8 Nimi etneri,
“Nadamne nong yeng neneropne uahane,”
seneropne agha mero tolongorop tanena,
halo aro loba tangtopne yongoro toplul.
Aghana nimi etneri Allah Eldamne Yame Walingeri,
“Ualulam,”
aro yubu pairopne agha mero tolongorop tanena,
wali pongkaleba,
ya'ag kamag nenehiroba yongoro toplul.
9 Nunna ta'ap sen koma sol wali uro walia ulamebe tanena,
amik Allahri,
“Wene tatsinun,”
sele sum eneko walinge agha yongoro tobukap.
Ane sembe,
“Sololamna,”
semban koma tipto walia ulamukap.
10 Ane sembe nunag pa'asea olog wamle tanena,
nimi niag walia ulamsukap.
Nungkabo Yesusag wana palirop nimi kopto o'omne nembamsiberi,
Yesusag wana palirop nimiag babe walia ulamsukap.
Paulusti yubu komobanebag wenelamsiogti kipsiogha
11 Wene abene nadamne saeri mome toro palilamna ane.
Nari so'opto ambatnuahinne nene mome toro pairopne nubu uro saeri tolamnange ane kembalulom.
12 Sin nimiri a'unag yubu mikip uro,
“Nengabo kon kareplapmun taneogna,
Allah whingag wali wamlulom,”
aro ambatsirop nimi tanekona sindi wanaag,
“Nimiri nu wali maiplamsukang,”
aro a'unag undo ambarelamsiang.
Sindi undo ambarelamsiang nena,
sin logti,
“Kristus kalag sipto obekpa,
tebaogne sembe yubu ambarelamsibeba,
Yahudi nimiri nu sarekerepto opsiikag,”
senelamangdi a'unag,
“Kon karebalulom,”
aro aruklamsiang.
13 Sin Yahudi nimi nengabo kon kareptangtop nimi taneko babe Musari aruksirop yubu wali uro saelba ul palamang kom.
Aghana sindi a'unag,
“Kon karebalulom,”
alamang nena,
a'un sindi lelamang yubuag nelepto kon kareptangtop nimi tahom tanena,
sindi a'un nongag kon kareptoba sembe,
“Nunag neleplamsiang,”
aro sindam nimi paliag nenep tanep.
14 Undo ambatto tongolamsiang aghana,
nandamneri ologha babe paliag nenep tanep kom.
Ot tam nhonog nanag wamlange agha paliag nenelamnangena,
nu Saelba Uhiropne Yesus poneko el kalag siplobekpa,
tebaogne mo paliag nenelamna.
Kristus kalag siplobekpa,
tebaogne mo kopto o'omne nenelamnange neneag agha,
mog so'oag nimiri seneragto ul piropne nari kemenagna tebaloa saog loba tao.
Apna mog so'oag nimiri kemenagna na babe loba tao senelamneang.
15 Wene aro lelamnangena,
nimi nengabo kon karepto ul piropne neneri nimi yepsinep kom.
Aghana nimi nengabo kon kareptop komne neneri babe nimi yepsinep kom.
Wene nhonog paliag uropne anena,
Allahri wendog sunuro ulamsilne mo o'omne wamla.a
16 Nimi etneri nari ambatsin yubu eneko saelba ul pirop tanena,
sin nimi taneko sembe,
“Allahri nimi taneko yareag senelamsileri,
wana aingnibahilul,”
aro Allahag molbarelamsin.
Israel nimi babe,
Allahri wepsirop nimi sembe undo molona molbarelamsin.
17 Wene komoptobagna,
nari Yesus si paliag nenero ambatto tongolamsinne abeneko pere sa'a-sa'ari na omneekpa,
meneng sisua nari nongag lag wamlaba,
“Na Yesustinge wamna,”
senenne kekneba wamla.
Ane sembe nimi nhondi babe na yubu nepto eraruk nembaneheng kom.
18 Nangkabo,
a'un Yesusag wana palirop nimi sembe nari molbarelamsin nena,
“Nu Saelba Uhiropne Yesus Kristus ponekori wana a'unag yorolamsileba,
a'un wana nong ningkiap paiamsilul,”
aro elag molbarelamsin.
Sikne agha lemna.
Abenda.