Galatia 5

Kristus ponekori uaogneag agha nu wali sae lopsiogha

Kristus ponekori nu sembe uaog nena, “Sin arukna tangtop kom nimi wamukang,” aro nu sae lopsiog. Ane sembe, a'un Kristusti uaogneag meptangto wapmundi, “Nimiri nen arukna nembi agha nunag ikinne pibukang kom,” aro khapto sekamlulom. 2 Ka'ebahut! Na Paulusti a'un el nenero ambarelamsindi, a'undi Musari aruksirop yubu saelbom agha nengabo kon kareptopne ul palapmun tanena, Kristus ponekori a'un yeplamsilul kom. 3-4 Nen so'opto wenero ambarelamsindi, nengabo etneri Musari aruksirop yubu saelbom agha, “Allah whingag wana porogne nenep tanun,” aro nengabo kon kareptangtop tanena, ni aruksirop yubu wali uro ul pinepneog wamla. Musari aruksirop yubu kiki nhonog wali uro ul pirop kom tanena, Allah whingag wana porog nimi tanep kom. A'un nimiag agha, “Musari aruksirop yubu saelba ul palamneri, Allah whingag wana porogne nenep tanun,” senelamlom tanena, a'unap Kristus ponekoap ina purum kareplolamlom. “Wana porogne nenep tanun,” senelamlom tanena, Allahri nunag, “Wana porog nimi nembahinun,” aro wana yorobahinepne nene wa'epto laplolamlom. 5 Aghana nunna, undo unurop kom. Allah Eldamne Yame Walingeri nunag el nenelamsilne pere agha nuri Yesusag sikne aro wana palilamap andarina, “Nu Allah whingag wamebeba, wana porog nimi sembahilul,” aro wana awiri nang-nangaro tilamap. 6 Nu Kristus Yesusap ma'al dalamap tanena, nimi nengabo kon karepto ul piropne neneri nimi yepsinep kom. Aghana nimi nengabo kon kareptop komne neneri babe nimi yepsinep kom. Ot nhonog o'omne wamlangena, Kristusag sikne aro wana palilameberi, lag nembi agha o'ona senehiro ulamebenge mo o'omne wamla.

7 Samenag a'undi, “Yesusti yubu sikneag agha nelepto saelbamukap,” aro wali uro merero ul palamlum. Ot wenena etneri a'un merelamlom ina karepto wana wag nembahioba, a'un wana phende tangom agha, “Yubu nene sik to, kom to,” aro seneragto ulamlom? 8 Nimiri a'undi wana wag nenero ambarelamsiang yubu enena, Allahri a'un, “Nanag yalulom,” aro yopsiogne ponekori senenneag agha ambatsirop kom. 9 Nimiri yubu sik komne ambarelamsiang yubu enena, “Kwaneng roti winiroba nubu talul,” aro yamoroba saog wamla. Ologha ma'abanep aghana, sabo tangto palamnari, roti winiroba niag tanba, roti aneko nubu tanep. 10 Aghana a'un nanap nu Saelba Uhiropneap ma'ap tangto wamap. Ane sembe nari a'un sembe sik uro seneraglamnange, nari yubu ka'ebom agha sik senelapmundi, orangeag nelebel pululom kom sembamna. Ot nimi etneri babe a'un wana wag nenero yubu sik komne ambatsirop tanena, nimi enekoag Allahri tam ikinne pelengkalul.

11 Nangkabo, nari sop-sop nimiag yubu ambarelamsin nena, “Yesus kalag sipto obekne ponekoag wana paliropne toman agha Allahap ma'ap taukap,” aro ambarelamsin. Na Paulusti nimiag, “Kon kareplapmunne pere agha Allahap ma'ap tanep,” aro ambarelamsisene tanena, sin wana mali nenehiropne wamnep komba, sindi nanag, “Seklebalul,” aro wene babe malia uaneheng kom. Aghana nari ambarelamsin yubu enekori sin Yahudi nimi kon kareptangtop nimi wana mali nenelamsil ane sembe, sindi nanag, “Seklebalul,” aro malia ulamneang. 12 Aghana a'un wana samsamolamsiang nimina, “Kon kareplamsebe,” alamangneri na wana yo nenelamnel. Wana yo nenelamnelba, nari sinag, “Hae, kon mo kom aghana, ‘Ni karebahut!’ aro ambatsisene,” senelamna!

13 Nangkabo, Allahri a'un yopsiog nena, “Arukna nenep tangtop kom nimi taukang,” aro yopsiogti, wene arukna tangtop kom nimi wamlom. Ot a'un arukna tangtop kom nimiri ulapmunne toman, “Nong yeng nenep tangtopne mo uahane,” aro ulamseng kom. Allahri a'un sae wali lopsiog ane sembe, a'un mamun o'ona senel dalapmundi, yebel dalamlulom. 14 Musari aruksirop yubu mome toro pibog yubu ni eneko yubu tam nhonag ni kaupto wamlangena, “Andamne nong ningki o'ona seneptangkamlam saog uro andi mog so'oag nimi babe o'ona sembamsululam,” aro mome toro pibog. 15 “O'ona senel dalamlulom,” aro mome toro pibog aghana, haing whi uro yae togtangkamlulom. A'undam nimiri si yoabari si singiptangto menaghal dalamlonga saog uro a'un mamun optangkapmun tanena, a'undam nimi loba nenep talulom.

“Allah Eldamne Yame Walingeri senenneag nelepto ul palamlulom,” aro ambatsiogha

16 Nari a'unag wenero ambarelamsin nena, Allah Yame Walingeri senenneag nelepto ul palapmun tanena, a'undam nimi nong yeng nenehinne sunsunum uro ul palamlulom kom. 17 Nong yeng nenenne ul pinep kom nena, “Nong yeng nenenne uahane,” senenne neneko Allah Eldamne Yameri senenneap sunsunum komdi toraptangto ulamdang. Toraptangto ulamdang ane sembe, a'un Allah Eldamne Yameri senenneag nelepto ul palapmun tanena, a'undam nimi nong yeng nenenneag agha mo ul pinep kom. 18 Aghana Allah Eldamne Yameri a'un pabiro wanaag piple senenneag nelepto ul palapmun tanena, a'unna Musari aruksirop yubu umag wamlulom kom. Ane sembe Allah Yameri senenneag nelepto ul palamlulom.

19 Nu mog so'oag nimiri, “Nong yeng nenenne uahane,” senenneag agha ul piropne lag wamlaba, nimi ni el wamap. Anena, kelabo nengabo top tangkamna koma salik-malik teklop tangtop, Allahri senenne semban koma sembenga kalup tanepne ul pirop, wanaag bobonge walel ananba, “Agto yaboho,” aro ul pirop, 20 mema pharop, mili lerop, nimi hausag senehirop, nimiap yubu nenep tangtop, “Ora nimiringe nanag taho,” aro wana mali senerop, wana yo uro nimi wahirop, nimi luknuhiro, “Paliag tanun,” aro ul pirop, nimi pali telektangtop, “Nanag sip taukang,” aro nimi wana tohirop, 21 “Ora nimi tup taleag,” aro wana mali palihirop, mag yonge terogha nenek saelba uhiropba, nimiri seneragna koma mali-malia salik-malik uro urop, yogneap maikno nimi nong yeng neneropne agha ul pirop. Nimiri undo unuropne sembe samenag ambatsisinge wene babe nen wenero el nenelamsin. Nimiri undo urop tanena, Allahri saelba uhiroba, “Namabo,” aro tatsinepne neneko nimi tanekoag tatsilul kom.

22 Undo unurop nimiag tatsilul kom aghana, Allah Yame Walingeri senenne nimi wanaag meptaleba, pongoro wana maubanep. Wana maubanep nena, nimi o'ona senehirop, wana awi urop, wana aingniro nimiap ma'aro urop, wana pailingkina wabahin koma ul pirop, wana walingeag agha nimi yepsirop, nimiag yeng uro pogto tatsirop, sol wali uro sikne ua urop, 23 win-win aro ua urop, iba luknuro seneragtop. Nimiri undo walia uropne sembe Musari samenag aruksirop yubu enekoag, “Undo unuaheng kom,” aro mome toro pibog kom. 24 Kristus ponekori, “Naringe,” aro nimi taluhirop tanena, nimi taneko Kristus Yesustinge taong. Yesustinge taong nimi tanekori sindam nimiri, “Nong yeng nenenne uahane,” seneropneap, “Bobonge nari wanaag wamlange agto yaboho,” seneropneap, kalag sipto oloplonga saog uro laplobi agha, Yesusap ma'ap taong. “Nundam nimiri senenne tebao,” aro Yesusap ma'ap taboba, 25 Allah Yame Walingeri nu kamag nenelamsiog. Kamag nenelamsiog tanena, Eldamne Yame seneropneag nelepto ul palameberi, 26 nundam nimi maibil dalamukap kom. A'unkaboag wana aluktop yubu ambatsiseng kom. Apna, “Ora nimi tup taleag” aro wana mali palil dalamseng kom.