Galatia 4

Nari yubu ambatsinne nen sunumna nhon sunuro ambatsinun. Nimi nhon elme wamnaba iliri, “Naringe saeagha wamlange amik nameri saeag nembanun,” sembanep. Elme eneko ngauk wamna aghana, amik sum iliri saeag wamlange ngai tanep. Aghana me eneko anam nubu tan kom tanena, iliri arukna taneko aruksirop yubu ka'ebanepneog wamang saog uro me eneko iliri aruksirop yubu babe ka'ero ulamnepneog wamla. 2 Iliri elme wali wamnepne sembe seneraglamnari, “Me enekoap, el saeag tanepne anekoap yae wamlulom,” aro o'oro paia urop nimiri saeag tarelamna. Ot iliri, “Wene nameri ni saelbamsilul,” aro lerop sum eneko og me eneko ngainge tanep. 3-4 Ane saog uro Allah Elme anam mangap tan komag, nu me ologne saog uro wamubu. Nong nimiri elmeag arukto, “Undo ualulam. Undo unuaheng kom,” aro arukaloa saog uro, nu mog so'oag wamap nimi babe arukna saog wamubu. Arukna saog wamubu aghana, Allah Eldamne wanari, “Wene Naba Name mog so'oag pognun,” sembaog sum sunup taogpa, kelabo nhon me monag taogpa, Allah Elme mangkaog. Allah Elme eneko mangkaogpa, el babe Musari aruksirop yubu umag wamogti, ka'ero ul palamog. 5 Musari aruksirop yubu umag paip tangka ulamog nena, “Musari aruksirop yubu umag arukna saog urop nimi taulbahineba, Allahringe taukang,” aro ulamog. Undo ulamog ane sembe, nu Allah elmabo tangom agha Allahri, “Namaboag walinge tatsinun,” seneropne sunsunum uro nu elmabori ni tomnep. 6 A'unna Allah elmabo wamlom ane sembe, Allah Elmeri Yame Walinge neneko Allahri poghogpa, a'unag babe nunag babe nuri wanaag poghog. Allah Elmeri Yame nuri wanaag tahiogti, Nuni Allahag yubu lelamlangena, “Naba naniong! Naba naniong!” aro haum alamla. 7 Wene ni undo uro yabalamogne agha, aruksirop yubu umag uropne wamlom komdina, Allah elmabo wamlom. A'un Allah elmabo wamlom, ane sembe Allahri, “Namaboag tatsinun,” aro weroba wamlange neneko tatsilul.

Paulusti Galatia nimi sembe, “Welaro wamukang,” aro o'ona senelamsiogha

8 Samenag a'un Galatia nimi Allah sembe ekon uro wamlumag, so'oag urop mema phalamlumne neneko Allah mikip sirikne sunsunum urop kom mema a'undi phalamlum. A'undi phalamlum mema tanekori a'un wana sao kaupto arukna nenelamsiek. 9 Aghana wenena a'undi Allah el wamlom. Sikne lemna tanena, Allahri a'un el wamsil. Allahri a'un el wamsil aghana, na olog wana samsamolamnel nena, a'undi nen samoro aruksirop yubu mikip urop kom yubuag nelepto, “Saelba ul palamukap,” aro ulamlom te? A'undi samenag, “Teba'en,” aro sae liplumne neneko nen samoro, “Sindi aruksirop yubu umag nen arukna nenep tahabe,” senelamlom te? 10 A'undi seneragto ul palamlom nena, “Ik sumene sum, ik wal ene sum, hengkun ene sum, li ko'o eneag to undo-undo ul palamebe taneogna, Allahri nu sembe wali sembahilul,” aro aruksirop yubu saelbom agha ul palamlom. 11 A'undi undo ul palamlomne sembe ka'ebanori, log senelamnangena, nari a'un sembe kilim weang aro yubu walinge ambatsisi aghana, “A'undi nari yubu sae lipmunag,” aro wana ikin wamna. 12-13 Nangkabo, na samenag a'unag yahiri, a'un wamlum saog tahiri yubu ambatsisi. Wene wanaag agha yubu mikip uro a'unag mololamsin nena, “Nandamne aruksirop yubu umag arukna neneptan koma wamna saog uro, a'undi babe a'undam nimi arukna nenep taheng kom,” aro mololamsin.

Nangkabo, a'un el wamlomne, na samenag ik selek sum a'unag yubu walinge Yesus sembe ambarel ahisinge, nanag naikna pukom agha saelbaneogpa, a'un nusamag wamsiri, alniro Yesus yubu ambatsisi. Na a'unap nikag wamuburi, a'undi nanag malinge nhon unne babe orog. 14 Na nongag naikna pukom agha saelbaneogpa, a'undi na loba semban koma yeplamnelum. Na yeplamnelumne a'un sembe olog eraruk aghana, a'undi loba aro kemelopnelum kom. A'un na Allah arukna imagne malaikat wamseneba, kipto tomnohom saog uro kipto tomnelum. Na Yesus Kristus eldamne wamseneba, kipto tomnohom saog uro a'undi na sae salero kipto yepnelum. 15 A'undi yepnelum ko'o abenekoag a'un wana yeng sirik uro uanepne loloro wamog. Nari a'un sembe sikne lag nenero ambatsinep nena, a'undi nanag, “Haing wana kwhero tatkehebe,” aro ulamnelum. Aghana wene sa'ange agha a'undi wanaag agha yeng senenne samenag ipsinge nene kom tao? 16 Nari sik yubu ambatsisinge sembe wene a'undi na aisange nenelamnelom te?

17 Nimi orange a'un nusamag wamang nimi taneri a'un sembe mon sek uro, “Wana topsukap,” aro yubu ambarelamsiang. Ot sindi wanaag malinge seneraglamang nena, “Galatia nimi tanekori Paulus elkaboap lilobi agha nunag sip taikti, wana maikno senenne agha nunag neleplamsukang,” aro a'un wana toro ulamsiang. 18 Nimiri mon sek senenneag agha sop-sop walia uropne nenena wali. Na a'unap nhon wamnepne babe, na weag wamnange babe, a'undi sop-sop, “Walingeog ulamsebe,” aro mon sek uro walia ulamlulom. 19 Namabo, nari o'ona sembamsin nimi wamlom. Wene na a'un sembe nen wana ikin uro seklelamna. Na seklero wamnangena, “Yesus Kristus ponekori wana seneragtopne a'undi wanaag meptaho,” aro kelabori me mangaro anep me maghan tehirop saog uro na a'un sembe nen wana ikin uro seklelamna. A'unag Yesusti seneropne anam a'undi wanaag meptan komag na seklenne seklebatsinepneog wamna. 20 Wene nari senelamnangena, “Na a'un anabiag wamseneri, yubu mikip uro wembahin koma win-win aro yubu wenero a'un ambatsisene,” sembamna. Ot wene a'undi ul palamlomne lelamangne ka'ebandi, na wana samsamolamnel.

Abraham elkelabo Hagarap Saraap sembe likiptop yubuag agha ambatsiogha

21 Nangkabo a'un nimi agha, “Musari aruksirop yubu umag wameberi, saelba ul palamukap,” senerop nimi wamlom tanena, a'un nimiag olog haibahinun. “Aruksirop yubu umag wamukap,” alamlom aghana, Musari mome toro pibog yubu lomag uropne olog seneraglamlom kom te? 22 Musari mome toro pibog yubu enekoag wamlangena, Abrahamdi me phende likto piog. Me nhon neneko ilinna, Abraham arukna tangtop kel Hagarti me mangkarog. Me nhon neneko ilinna, Abraham elkel taptop kel arukna tangtop kom kel Sarari me mangkarog. 23 Arukna tangtop kel Hagarag agha mangap taog me eneko, nimiri sop-sop, “Kelabo topseberi, nimi likna liksebe,” senenne sunsunum uro kel eneko me monag taogpa, me eneko mangap taog. Aghana me nhon arukna tangtop kom kelag agha mangap taog me enekona, Allahri salag lebogne sunsunum uro yepsiog andarina, Abraham eldi kel Sara me monag taogpa, me eneko mangap taog.

24 Abraham elmabo phende mangap tarek kelabo abenekoag likiptopne sunuro sumbanep nena, Allahri nimiap yubu nikne lero salag pibogne phende saog wamla. Allahri Sinai Yimag agha, “Nimiap ma'ap taukap,” aro nimiap yubu nikne lero salag pibog yubuna, arukna tangtop kel Hagar kel eneko saog wamla. Eldi me mangkanep mabo ni arukna tangtop mabo agha mangkahinep. 25 Sinai Yim neneko Arab yubuag Hagar engerop. Si kekhaektop kel Hagar kel eneko arukna tangtop kel wamog. Arukna tangtop kel wamogpa, Yahudi nimiri so'oag as nubunge Yerusalem wamang nimi tanekori babe aruksirop yubu Sinai Yimag lag taog yubu ene saelba ul pirop nimi wamang. Ane sembe, Hagar kel eneko sin Yahudi nimi sikinin wamloa saog kel enekori sin likipto sunumna sunulamsil. 26 As Yerusalem nimi mog so'oag wamang nimi tanekori aruksirop yubu saelba ul palamang aghana, nu Yesusag wana palirop nimiri asna, Allahri weptop as walinge Yerusalem imag wamlaba, nimiri arukna nembahinep kom. Arukna tangtop kom kel eneko nuri kain wamloa saog kel enekori likipto sunumna sunulamsil. 27 Tam nene sembe nimiri samenag Allah Yubu mome toro palilamogti,

“Elkel ela'ange lip tangtop kom kel eneko elmabo maikno lag taukang kom aghana,

Elkel ela'ange lip tangtop kel enekona, elmabo maikno lag taukang.

Ane sembe an ibili urop kel, an me mangkanep kom kel,

wana awi sembalulam!

An me mangkanep komdi, memon telangkel komag,

yeng uro yubu haum aro lolo'oplamlulam!”

aro mome toro pibog.

28 Ishak samenag Allahri salag lero pibogne sunsunum uro Abraham elkel Sarari me mangkarog. Nangkabo, a'un babe Yesusag wana palirop nimi wamlomne babe ane saog uro Allahri salag lero pibogne sunsunum uro mangap tangtop mabo wamlom. 29 Samenag Abraham elmabo phende abeneko wamdekag, Abraham elme samne nimiri sop-sop uropne sunsunum uro mangap taogpa, Allahri Eldamne Yame mikipne pere agha Abraham elme amikne babe mangap taog. El sop-sop uropne agha mangap taog me enekori Allahri tatsiog me eneko, “Luknubanun,” aro malia ulamog. Wene babe sin, “Abraham elmabo wamap,” al dalamang nimi mog so'oag nimiri likto piropne sunsunum uro mangalamsiek nimiri, “Sin luknubahukap,” aro a'un Allah Eldamne Yameri mikipne pere agha mangap talum nimi malia ulamsiang.

30 “Luknubahukap,” aro malia ulamsiang aghana, Allahri samenag yubu ambarogne mome toro palilamogti, “El arukna tangtop kom kelag agha mangap taog me enekori ili saeagha tomnepne ologha babe arukna tangtop kelag agha mangap taog me enekoag talul kom. Ane sembe arukna nenerop kelap elmeap yag lambahilulam,” aro yubu leropne mome toro pibog. 31 Ane sembe nangkabo, nu Yesusag wana palirop nimina arukna tangtop kelag agha mangap tabu kom aghana, Allahri salag pibogne sunsunum uro arukna tangtop kom kelag agha mangap tabu.