Galatia 3

Musari aruksirop yubuap, Allahag sikne aro wana paliropneap sembe ambatsiogha

Nangkabo a'un Galatia nimi limituk sirik nimi agha a'un wamlom. Nimi nhondi mili lebo andarina, a'un wana inmon taom te? Yesus Kristus poneko kalag siplobekpa, tebaog yubu eneko tibin sirik uro a'unag ambatsisi. 2 A'unag ambatsisi aghana, wene a'undi nanag tam nhon nene sembe ambatnululom. Allah Yame Walinge tatsiog nena, a'undi Musari aruksirop yubu kasmi agha saelba ul palamlomne pere agha tatsiog to, Yesus yubu walinge ka'ebalumdi, elag sikne aro wana palilamlomne sembe Allahri Eldamne Yame Walinge a'unag tatsiog to? 3 A'un sik uro limituk nimi wamlom! Allahri Eldamne Yame Walinge samenag tatsiog mikipneag agha a'un wali uro alniro ul palamlum. Ot wene Eldamne Yame Walinge lilobi agha a'undi wanaag, “Nadamne nong mikipneag agha komobahane,” senelamlomne nene sik uanep te? 4 A'un nusamag uro yabiogpa, haingdi iplumne salik-malikne agha uro yabiogpa, mo iplum te? A'undi iplumne nenena, wanaag seneragna koma mo iplum kom sembamna! 5 Allahri Eldamne Yame Walinge a'unag tatsiogti, a'un nusamag agha Allah mikibari uanepne a'un whingag ulamog. A'undi Musari aruksirop yubu kasmi agha saelba ul palamlomne nene agha tatsiog to, Yesus yubu walinge ka'ebalumdi, elag sikne aro wana palilamlomne sembe Allahri Eldamne Yame Walinge a'unag tatsiog to?

6 Yubu walinge ka'ebalumdi, sikne aro wana palilamlomne saog uro Abraham ponekori samenag babe undo seneraglamog. Allahri lebogne sembe, “Ot sik uro lepla,” aro elag wana palilamogpa Allahri, “El wana porogne,” sembaog.

7 Ane sembe a'un babe el uro wamlulom nena, nimi etneri Allahag sikne aro wana palilamang tanena Allahrina, “Nimi taneko Abrahamdi nimi liktop nimi wamang,” senelamla. 8 Samenag agha Allahri el wamog nena, “Yahudi sisa kom nimiri babe nanag sikne aro wana palilamikne sembe nari sin Yahudi sisa kom nimi wana porog nimi nembahinun,” aro el wamog. Anam uro yabin komag Abrahamag yubu walinge neneko Allahri ambarelamogti, “An pere agha nimi mog so'oag tala-tala wamik nimi ni sembe walingena tatsinun,” aro salag lero pibogpa, Allah yubu walinge neneko amik uro yabinepne sembe nimiri mome toro pibek. 9 Ane sembe sin Allahag sikne aro wana palilamang nimiap, Abraham Allahag sikne aro wana palilamogne ponekoap, Allahri sin nikag kembi agha, “Wali,” aro walia ulamsil.

10 Ot sin nimiri, “Musari aruksirop yubu kasmi agha saelba ul palamnunne sembe Allahri wali sembanelul,” aro aruksirop yubu umag nenel dalamang tanena, nimi loba nenero yo'obahineba umag nenel dalamang. Tam nene sembe Musari aruksirop yubu mome toro palilamogti, “Nimi etneri aruksirop yubu nene ni wali uro saelba ul pin kom pagha tanena, Allahri nimi eneko yo'oro loba nembahilul,” aro mome toro pibog. 11 Nimi nhondi babe Musari aruksirop yubu nene ni wali uro ul pinep kom ane sembe, nimi nhondi babe Allah whingag wana porogne nenep tanep kom. Tam nene sembe Allah yubuag wamlangena, “Wana porog nimiri sikne aro wana paliropneag agha kamag ua ulamlul,” aro mome toro pibog. Ane sembe nimi nhondi babe Musari aruksirop yubu saelba ul piropne pere agha Allah whingag sikne nenep tanep komne ane tibin wamla. 12 Undop aghana, nimiri Musari aruksirop yubu saelba ul pirop tanena, Allahag wana paliropne kemban koma nimiri ua uropne mo kemero tam karebanepneog wamla. Allahag wana paliropne kemerop kom aghana, Musari aruksirop yubu mome toro pibog nena, “Nimi etneri aruksirop yubu nene saelba ul palamla tanena, ul piropne neneag agha kamag wamlul,” aro mome toro pibog. 13 Musari aruksirop yubu ni wali uro saelba ul pinep kom nimi Allahri yo'oro loba nembahinep. Aghana nu mog so'oag nimi yo'oro loba nembahineba neneko Kristus ponekori toro eldamne nongag paip tangkamogne abeneko pere nu taulbahiog. Eldamne nongag paip tangkamogne neneko sembe, anamag Allah Yubu samenag mome toro pibogne nhon wamlangena, “Nimi kalag sipto teptop nimi ni yo'osirop nimi wamang,” aro Musari mome toro pibog. Abene agha Kristus poneko kalag sipto tebaogti, nu yo'oro loba nembahineba eldamne nongag paip tangkamogne pere nu taulbahiog. 14 Nu taulbahiog nena, Yesus Kristus ponekori, “Allahri Abrahamag, ‘Walinge tatsinun,’ aro salag lebogne neneko na Yesus Kristusap ma'ap tangtopne pere agha Yahudi sisa kom nimiag babe Allahri tatsilul,” aro taulbahiog. Yesusti nu taulbahiog andarina, elag sikne aro wana palilamebenge pere agha Allahri, “Tatsinun,” aro salag lebogne neneko sunsunum uro Eldamne Yame Walinge tatsileba, nunag tahilul.

Musari aruksirop yubuap, Allahri salag lero pibog yubuap sembe ambatsiogha

15 Nangkabo, nu mog so'oag nimiri sop-sop ua uropneag tol pina sunumna nhon sumbatnuahin. Nimiap-nimiap salag lep tangkamnari, yubu nikne lero haing sae kauptangkamna tanena, “Sikne agha lemnam,” aro nimi pali nenep tangtop. Nimi pali nenep tangto yubu nikne lero salag paip tangkamna tanena, nimi nhondi babe sin salag lero haing sae kauptangkamnange sae lopsinep kom. Apna nimi nhondi, “Ma'anne nhon ma'abanun,” aro ma'anne nhon ma'abanep kom. Nu mog so'oag nimiri yubu nikne lero salag paip tangkamna saog uro, 16 Allahri Abrahamag sarikto salag lero palilamogne neneko, Abrahamap elag agha nimi likto pinepneap sembe salag lero pibogpa, kom tanep kom. Allah yubu mome toro pibogne nenekona, Allahri Abrahamag, “Andi nimi yina likto pilul nimi tanekoag,” seho tanena, nimi maikno sembe salag lero pipsiso. Aghana undo lebog kom. Allah yubu mome toro pibogne wamlangena, “Andi nimi yina likto pilulneag,” seog. Anena Allahri amik nimi nhon wepto poglulne Kristus mo sembe sembaogti, “Andi nimi yina likto pilulneag,” seog. 17 Nari sembamnari lelamnangena ane. Musari aruksirop yubu anam pimna komag Allahri Abrahamap yubu nikne lero salag pibog. Allahri samenag Abrahamag salag pibogpa, hengkun taibuka taubuka ulamogha teng ao tarabare saog (430) palamog taneogna, Allahri aruksirop yubu ambarogne Musari tipto mome toro pibog. Aruksirop yubu mome toro pibogne nenekori Allahri samenag Abrahamap yubu nikne lero salag pibogne neneko abolag nenero kom nembanep kom. 18 Musari aruksirop yubu anam wamna komag Allahri Abrahamag wana yororo, “An pere agha walingena tatsinun,” aro salag pibog. Ane sembe Allahri, “Tatsinun,” aro salag lero pibogne nene Musari aruksirop yubuag silip tangkamnep kom. Aruksirop yubuag silip tangka wamso tanena, Abrahamag salag pibog yubuag silip tangkamnep kom. Aghana Allahri wana yororopne agha Abrahamag tarog nena, eldamneri salag lero pibogne pere agha tarog.

19 Undop pagha tanena, nimiri haibanep nena, “Sa'a sembe Allahri aruksirop yubu Musa ponekoag ma'aro ambarog?” aro haibanep. Allahri Abrahamag, “Walingena tatsinun,” aro salag lero pibog sum anabi, Abrahamdi nimi yina likto pilulne agha el walinge poneko yale sum anabiag, nimiri mali-malia ulamekpa, Allahri nimi irikahiogne maiknoro philamek. Allahri irikahiogne philamek, ane sembe Allahrina, “Abrahamdi nimi yina likto pilulne agha yalulne poneko anam yan komag mog so'oag nimiri sikne el taukang,” aro Allahri aruksirop yubu Musa ponekoag ma'aro ambarog. Allahri arukna imagnang malaikat pere agha Allahap nimiap anabiag uropne Musa ponekoag yubu ma'aro ambarogpa, Musa ponekori aruksirop yubu nene tipto mome toro pibog. 20 Musa poneko anabiag uropne wamog tanena, nhonag sip tan koma yubu tara siba, tara siba ambattangtopne agha mo ambatsinep. Aghana Allah poneko nhonog wamogti, el mori wanaag agha lemnep.

Musari aruksirop yubu umag urop nimiap, Allah elmaboap sembe ambatsiogha

21 Undop pagha tanena, nimiri haibanep nena, “Musari aruksirop yubu mome toro pibogne nenekori Allahri salag lebogne yubu toraplamlari, ‘Allahri Abrahamag salag lebog yubu neneko kom taho,’ alamla te?” aro haibanep. Allahri yubu toraptangto kom tanep kom! Allahri nimiag aruksiropne, “Awe nene tolapmundi, kamag nenep talulom,” aro arukahinepne nhon babe orog. Arukahinep yubu undo saogne wamso tanena, Allahri aruksirop yubu undo saogne nunag ambatsiso. Allahri nunag ambatsiso andarina, saelba ul piropne pere agha nu mog so'oag nimi Allah whingag wana porog nimi tahabe. 22 Aghana aruksirop yubu undo saogne nhon babe wamla kom. “Wana porog nimi taukang,” aro aruksirop yubu orog aghana, Allahri Yubu nimiri mome toro palilamek yubu anekori lag nembarelamsildi, “Nu mog so'oag nimi niri mali-malia ulamapneri nu haing sae kaupsiloa saog uro nu seklem taraplamsil,” aro lag nembatsiog. Allah yubu anekori nunag undo lag nembatsiog andarina, Allahri salag lero pibogne sunsunum uro mog so'oag nimiag tatsinep. Nimi etneri Allahri wepto poghogne Yesus Kristus ponekoag sikne aro wana palilamle tanena, Allahri samenag, “Walingena tatsinun,” aro salag lebogne sunsunum uro Yesusag seneragtop nimi tanekoag sik uro tatsilul. 23-24 Allahri wepto poghogne Kristus poneko samenag mog so'oag anam yan komag, nu mog so'oag nimiri elag wana paliropne sembe ekon uro wamubu. Ekon uro wamubu li enekoag Allahri seneraglamog nena, “Amik sum nari wepto pognunne mog so'oag yalul aghana, el anam yan komag mog so'oag nimiri ekondi, mali-malia ulamikag,” aro Allahri aruksirop yubu nenekoag agha nu mog so'oag nimi iriklamsiog. Iriklamsiogti yae paiamsiog andarina, Allahri wepto pogtopne Kristus poneko amik sum yaog tanena, el sembe nu el uro wamnep. Nu el uro wamnep nena, “Kristus ponekoag sikne aro wana palilamebenge pere agha eldi nu wana porog nimi nembahilul,” aro seneraglamnepne sembe Allahri samenag Musaag aruksirop yubu enekori nu el nenelamsil.

25 Ot wene wamap nena, Yesus Kristus mog so'oag yaogne ponekoag, “Allah whingag na wana porog nimi nembanelul,” aro wana palilamap. El yaogne ponekoag wana palilamap ane sembe, Allahri aruksirop yubu nenekori nu nen irikto yae paiamsil kom.

26-27 Wenena, a'undi Yesus Kristusag sikne aro wana palilamlomdi, Yesus Kristusap ma'al dalamlom. A'un wanaag agha, “Na Kristusap ma'ap tahaneme,” aro a'unag kekneba nenero maghag pelengkahiong tanena, a'un niri Kristusap ma'ap tangtopne agha a'un nongag kalup tangka wamlom. Ane sembe elap ma'ap tangtopne agha Allah elmabo taom. 28 A'un Kristus Yesusap ma'ap tangtop nimi wamlom tanena, “El Yahudinge, el Yunaninge,” aro nhon paliag nenero a'eptangto senel dalamseng kom. Nimi sisa aghabog kom aghana, mo sektop nimi anabi, nimiri arukna nenerop nimi anabiag nhon paliag nenero a'eptangto senel dalamseng kom. Nengaboap kelaboap babe, nhon paliag nenero a'eptangto senel dalamseng kom. A'un Kristus Yesusap ma'al dalamlomdi, a'un mamun nikag ma'ap taom. Ot nhonog wamlom ane sembe, nhon paliag nenero, nhon umag nenero a'eptangto senel dalamseng kom. 29 A'un Kristusap ma'al dalamlomdi, eldi nimi taom tanena, Kristus poneko Abrahamdi nimi yina likto piropne wamla saog uro, a'un babe Abraham elmabo wamlom. Ane sembe Allahri Abrahamag, “Tatsinun,” aro salag lekto pairopne, a'un Abraham elmabo wamlom nimiag babe tipto tatsilul.