Efesus
Nimi Sembe
Paulusti Mome Toro Pibogne
Paulusti Efesus nimi kipsiogha
1
Nangkabo!
A'un as soro kalurop as Efesus nimi agha Allahri a'un,
“Nari mabo taukang,”
aro wepsiog nimi na Paulusti kiplamsin.
Allahri wanaag yeng seneropneag agha Yesus Kristus ponekori na Paulus wepto,
“Nari yubu ambatto tongolamsululam,”
aro pogneogpa,
a'unag mome toro palilamna.
A'undi Yesus Kristus ponekoag sikne aro wana palilamlomne pere agha elap ma'ap taomdi,
as Efesus wamlom nimi kiplamsin.
2 “Nuni Allahap,
nu Saelba Uhiropne Yesus Kristusap abenekori wana a'unag yororo walia ulamsirikti,
wana aingnibahurukang,”
senelamnari a'un sembe molbarelamsin.
Allahri Kristusap ma'ap tangtop nimi wana yame mikip nenehinne tatsinepne sembe Paulusti ambatsiogha
3 Nu Saelba Uhiropne Yesus Kristusap ma'ap tangto wamapne sembe Ili Allah Imagne ponekori nunag wali-waliaba tarelamsiog.
Sa'a-sa'ari nuri wana yame mikip nembahinep tanena,
Ili Allah Imagne ponekori ni aneko nunag tarelamsiogpa,
nuri el paliag nenero omeklamap.
4 Nu Kristusap ma'al dalamapne sembe Allahri wali-waliaba tarelamsiog saog uro,
anam imap so'oap sumban komag agha Allahri Kristus pere agha nu wepsiog.
Nu wepsiog nena,
“Namabo taikti,
malia uan koma nari senenne sunsunum uro ulamikti,
sinag tam pimna koma na whingag wali wamukang,”
aro Allahri anam imap so'oap sumban komag agha nu o'ona senelamsiogti wepsiog.
5 Nu o'ona senelamsiogti,
anamag Allahri eldi wanaag,
“Uahane,”
aro seneraglamogne agha,
“Nari Name wepto pognunne Yesus Kristus ponekori sin taulbahilulne pere agha nari mabo taukang,”
aro nu wepsiog.
6 Elme o'ona senelamlange ponekoap ma'ap tangto wamapne pere agha nunag wana yororo tatsiogne sembe nuri Allah paliag nenero omeklamap.
7-8 Elme nu sembe poghogne ponekona,
tam nene sembe.
Allahri nu mog so'oag nimiag,
“Uaheng kom,”
aro iriktop yubu ingisaplobubu.
Eldi yubu ingisaplobubu aghana,
Elme nu sembe eneng lanaro tebaogne pere agha tam wailag nenelamlari,
nu taluro toro palilamsil.
Eldi nu talulamsil nena,
Allah wana hektopne poneko el wamogti,
nunag wana yorolamsilneag agha o'ona maikno senelamsilne sunsunum uro Elme nu sembe nubu uro tatsiog.
9-10 Allahri samenag seneraglamogti,
“Nia mangkina imap so'oabag wamlange nari wepto pognenge Kristus poneko umag nembahineba,
eldi saelbamsilulne wali,”
aro seneraglamog.
Allahri wanaag seneraglamogne nene samenag tognoro wamog aghana,
wenena Allahri wana awi uro nunag lag nenero el nembahio.
Amik Allahrina,
“Wene nari wepto pogtopne Kristus ponekori lag tangto nia mangkina saelbamsilul,”
senen sum eneko sunup taleba,
Yesus Kristus poneko el mo usog tangom agha saelbamsileri,
nia mangkina imap so'oabag uropne el umag wamlul.
11 Nu Kristusap ma'al dalamap nena,
Allahri yum-yum samenag nu wepsiogne nene sembe,
“Na namabo taikpa,
Kristusap nhon ma'ap tangto wamukang,”
aro wepsiog.
Elba eldi,
“Uanun,”
senenne karepto pairoba sunsunum uro nia mangkina awe tolamla.
12 Allahri nu Yahudi nimi samenag wepsiog nena,
Kristus poneko anam ik selek sum yan komag,
nu Yahudi nimirina,
“Allahri wepto poglulne Kristus poneko yaho,”
aro tibogto nang-nangalamubu.
Nu Yahudi nimiri sam nang-nangalamubunge pere agha Allahrina,
“Na Allah paliag nenero omeklamnukang,”
aro nu wepsiog.
13 A'un Efesus nimiri babe yubu walinge Kristus ponekori a'un taulbahinepne sembe yubu sikne ka'ebalumdi,
elag sikne aro wana palilamlum.
A'undi Kristus ponekoag sikne aro wana palilamlumne sembe Yesusti samenag salag lekto pibogne sunsunum uro Allahri Eldamne Yame Walinge a'unag pipsiog.
Eldamne Yame Walinge a'unag palilamsiogne abeneko pere,
“Kristusap ma'ap tangtop nimi,”
senenne kekneba a'unag pipsiog.
14 Allahri wene Eldamne Yame Walinge nunag tarelamsilne nenekona Allahrina,
“Nari Yame mikipne sinag paiamnange ibikpa,
nari sinag,
‘Amik namaboag nen tipto tatsinun,’
aro salag pimnange babe sik sembaukang,”
aro Allahri Eldamne Yame Walinge nunag tarelamsil.
Allahri,
“Nen tipto tatsinun,”
seogne amik nu elmabo nenelamsil nimi lag uro taluro toro pipsile sum eneko tatsileba,
el si paliag nenero kiplameberi omeklamukap.
Paulusti Efesus nimi sembe Allahag molbatsiogha
15 A'un babe Allahri elmabo nembahiog ane sembe,
nari ka'ebanoba,
a'un Efesus nimi sembe yubu lelamongdi,
“Nu Saelba Uhiropne Yesusag sikne aro wana palilamangdi,
Allah elmabo wepsiog mabo ni o'ona senelamsiang,”
alamonga nari ka'ebano.
16 Ka'ebanori papna koma nari Allahag,
“Naba Naniong,
wali yeplamsilam,”
aro kiplamna.
Allah kiplamnari,
a'un sembe ekon tan koma nari a'un sembe sop-sop Allahag molona molbarelamsin.
17 Nu Saelba Uhiropne Yesus Kristus Ili Allah paliag nenero omeklamnari,
a'un sembe molona molbarelamsin.
Elag molbarelamsin nena,
“Nuni Allah,
Andamne Yameri nimi wana hekahimendi,
lag nembatsululam andarina,
Efesus nimi tanekori andi wana seneragna tapto el taukang,”
aro sop-sop a'un sembe Allahag molbarelamsin.
18-19 Nari Allahag a'un sembe molbarelamsin nena,
Allahri a'undi wana seneragna tibin nembahiso andarina,
Allahap nunap pali wamapne sembe a'un el tahom.
Allahri nu wepto,
“Namabo taukang,”
aro yoplamsilne pere agha nuri,
“Amik Allahri nu elmaboag maiknoro tatsileba,
wali wamukap,”
aro tibogto nang-nangalamap.
Wene babe Allahri nu Yesusag wana palirop nimi sembe mikip phelektopne nunag to'opto palilamsilne nene nimiri sumbanep kom.
Aghana nari Allahag molbarelamsindi,
“Nani,
andi mikip phelektopne nunag palilamsilamneap,
amik nunag wali-waliaba maiknoro tatsinepneap,
kiptoba nunag uro yabinepneap,
‘Nubu sirik wamla,’
aro el taheng.
Ane sembe andi sindi wana seneragna tibin nembahisomba,
el taheng,”
aro a'un sembe molbarelamsin.
Allahri nunag mikip phelektopne palilamsilne nenekoag agha samenag babe
20 eldi wepto poghogne Kristus poneko nimi teptobag agha kamag nembaog.
Eldi mikip phelektopne neneag agha kamag nembaogti,
imag agha kiliro tobogti,
Allah eldamneri sae sirik sip pukirog.
Kristus poneko eldamne Allahap lelero imag pukamdangti,
nia mangkina saelbamdang.
21 Kristus puka urobag pukamlangena,
alikin sirikag pukamlari saelbamla.
Kristus ponekori nia mangkina salero puka urobag anena,
mog so'oag uropne nhon babe sunurop komdi,
eldi nia mangkina salero puka urobag pukamnep kom.
Mog so'oag urop mema mikipne ni aneko agha,
mog so'oag saelba ulamsiangne babe,
ni yubu sia lelamangne babe,
mog so'o ngainge babe,
mema nubunge si paliag towalengeropne babe,
sunurop kom.
Kristus el mori ni saelbamlari,
alikin sirikag pukamla.
Wene wamap ko'o eneag babe,
amik ko'oag babe,
nubunge nhon Kristus sunuropne wamnep komdina,
el mo paliag wamle paghabog wamlul.
22 Allahri Kristus poneko towalengkirogti,
ni el saeag pibogti,
nia mangkina Kristus yan mombolag nembahiog.
Kristusag wana paliro winip tangtop nimi sembe,
Allahrina Kristus ponekoag,
“Sindi usog wapmendi,
ni saelbamsululam,”
aro towalengkirog.
23 Nuri Kristusag sikne aro wana palirop nimi wamap nena,
Kristus nuri usog wamlaba,
nunna Kristusti nong wamap.
Kristus nuri usog wamlari,
eldi nia mangkina nunag to'opto palilamsildi,
nia ni ul palamla.