“Teptop nimi saog wamubu aghana, Kristusap ma'al dalamapne sembe kamag nembahiog,” aro ambatsiogha
2
Samenag a'un wamlumne Allahri,
“Uaheng kom,”
aro irikto pibog yubu ingisapto irikna philamlumdi,
malia ulamlum abeneko pere nimi teptop nimi saog uro wamlum.
2 A'un samenag wamlum nena,
mog so'oag nimiri wene ul palamangne sunsunum uro a'undi babe samenag nelepto ulamlum.
A'undi nelepto ulamlum nena,
mog so'oag urop mema mikipne im mombolag wamlangeri a'un saelbamsiogpa,
nelepto ulamlum.
A'un saelbamsiog phia nenekori wene babe nimi saelbamsilne pere agha Allah yubu ka'eban koma sik senelamang kom.
3 Samenag nu ni wamubunge babe sin wene wamang saog uro ulamubu.
Samenag nu wamubunge nu nong yeng neneropne agha,
“Uahane,”
senenne mo ulamuburi,
nu wanaag bobo ulamsiogne sembe,
“Agto yaboho,”
senenne agha ulamubu.
Samenag nu wamuburi ulamubunge nene sembe,
Allahri nimi malia ulamang nimi orange walamsilul saog uro,
nu babe samenag waro opsinepne wamog.
4 Nu opsinep aghana,
Allah wanaag agha yareag maikno senelamsilne ponekori nu o'ona maikno uro sembamsiog.
5 Nundam nimiri irikna philamuburi,
Allah yubu ingisapto ulamubunge neneko agha nu nimi teptop nimi saog uro wamubu.
Teptop saog wamubu aghana,
Allahri nu o'ona maikno uro sembamsiog ane sembe,
eldi wana nunag yorolamsilneag agha nu taulbahiog.
Allahri wepto poghogne Kristus ponekoap ma'ap tangkamubunge pere agha Allahri Kristus kamag nembaog saog uro nu babe kamag nembahiogti taulbahiog.
6 Nu Kristus Yesus imag pukamlange ponekoap nhon ma'ap tangkamapne sembe Allahri nu kamag nembahiogti towalengkahiog.
Towalengkahiogti,
“Namabo tanuko Kristusap nhon pulingkukang,”
aro pukitsiog.
7 Allahri nu undo pukitsiog nena,
Allahri wana nunag yororo seneraglamogti,
“Nari wana walingeag agha nimiag walia phelektopne uahineri,
nari wepto pognenge Kristus Yesus pere agha yeplamsinun.
Yeplamsineba amik sum nari wana yororopne agha ulamnange lag taleba,
nimiri kembaikti,
ya'ag el taukang,”
aro Allahri nu towalengero pukitsiog.
8-9 Nuri malia uroba sembe Allahri nu opsinep aghana,
nunag wana yorolamsildi,
a'un opsin koma taulbahiog.
Taulbahiog nena,
a'undam nimiri ulamlomne pere agha taulbahiog kom aghana,
elag sikne aro wana palilamlomne pere agha eldi wana a'unag yorolamsildi,
opsin koma taulbahiog.
Elag wana pimnepne babe ot eldi tatsiogneag agha nuri elag sikne aro wana pimnep ane sembe,
nimi nhondi babe eldamneri uropne sembe omektangkamnep kom.
10 Nundam nimi omektangto wamnep kom nena,
Allahri nu taulbahiogti,
“Wali-walia ulamukang,”
aro nu wendog nimi nembahiogti,
Kristus Yesusap ma'ap tangtop nimi sumbahiog nimi wamap.
Samenag agha Allahrina,
“Nari taulbahinun nimi tanekori wali-walia aghabog ulamukang,”
aro wero pibogti,
nu taulbahiog.a
Kristus pere agha nu ma'abahiogne sembe ambatsiogha
11 Nangkabo,
abene agha a'un samen wamlumne seneraglamsut.
A'un nimi sisa Yahudi kom nimi wamlomba,
Yahudi nimiri a'un sembe,
“Kon kareptop kom nimi,”
alamsiek.
Sin Yahudi nimi kon kareptop nimi wamang nimiri a'un sembe “Kon kareptop kom nimi,”
alamek nena,
sin kekneltana nimi saeri nongag uropne sembe lelamek.
12 A'unna Israel nimi wamlom kom ane sembe,
Allahap Israel nimiap samenag yubu nikne lebekneag agha Allahri salag pibogne neneko a'undinge wamog kom.
A'un mog so'oag wamlum nena,
“Allahri wepto pogtopne Kristus ponekori taulbanelul,”
aro seneragna koma Allahag wana palilamlum komdi,
“Ya'ag wali tanun,”
aro tiro nang-nangkanep kom.
13 Samenag a'unap Allahap a'eptangto weag wamlum aghana,
wene a'un Kristus Yesusap ma'al dalamlom.
Ane sembe Kristus eneng lanaro tebaogne pere agha Ili Allah peramag a'un poa yahiog.
14-15 Kristus eldamne nu mog so'oag nimi sembe ma'asinne wamla ane sembe,
peramag poa yahiog.
Nimi ma'asinne wamlari,
nimi sisa Yahudi nimiap,
sisa Yahudi kom nimiap nik nimi nenelamsil.
Samenag Musari aruksirop yubu Yahudi sisa nimiag ambarelamsiogti,
iriktop yubu enekori leka wilniro irikto soro towalengkaloa saog uro uaog.
Musari samenag iriktop yubu eneko mome toro pibogpa,
nu Yahudi nimiap,
Yahudi sisa kom nimiap aisa nenep tangto wamubu.
Aisa nenep tangto wamubu aghana,
iriktangtop yubu eneko Kristus ponekori el nong pere agha lubogti,
aisa nenep tangto uropne kwerekto nu ma'abahiog.
Elba eldi seneragtop nena,
“Yahudi nimiap,
Yahudi kom nimiap mog so'o as nhonogne nimi wendogne taikti,
nanap ma'ap tangtop nimi taukang,”
aro iriktangto uropne neneko lubog.
Undo unuaogne neneag agha Kristusti nu ma'abahiog.
16 Nu ma'abahiog nena,
“Ni phende nong nhonog taikti,
Allahap nen ma'ap taukang,”
aro Kristus kalag sipto tebaog.
Kalag sipto tebaogne pere agha nunap Allahap aisa nenep tangto uropne kom nembahiogti,
nen ma'abahiog.
17 Ane sembe Kristus yaog nena,
yubu walinge nimi ma'abahinep yubu eneko weag urop nimiag babe,
peramag urop nimiag babe ambarelahiog.
Ambarelahiog nena,
a'un Yahudi sisa kom nimi Allahap weag nenep tangkamlum nimiag babe,
Yahudi nimi Allahap peramag urop nimi babe,
“Yubu walinge nimi ma'abahinep yubu eneko ambatsinun,”
aro yaog.
18 Yubu walinge nenekona,
Kristus pere agha nu Yahudi nimi babe,
a'un Yahudi sisa kom nimi babe,
ni phende Allah Yame Walinge nhonogti Nuni Allahag poa yalamsil.
19 Allah Yame Walingeri Kristus pere agha poa yalamsil tanena,
a'un sekelanan nimi mo wamlom kom.
Wenena a'un Allah eldamneri wepsirop mabo taom ane sembe,
Allahri nimi saelba uhirop nimiap nikag ngainang saog taom.
20 A'un Allah elmabo nikag ma'aro palilamsil nena,
ae soro kirik paia ubu solingkirop ae saog palilamsil.
Kristus Yesus yangan kirik o'omne saog uro mep tangkamlaba,
Yesusti wepto pogsiog nangap,
Allah yubu silimu tiptop nimiapti yubu yangaro ambarelamsiek.
Sindi ambatsirop yubu eneko alibag a'un nimi babe paia ubu Allahri ae soro towalengelamloa saog uro o'oro palilamsil.
21 Kristus Yesus yangan kirik o'omne saog wamlaba,
ni ae soroba aneko elag sunuro tipto o'olamla.
Abene agha ae ni solingkirop ae aneko nu Saelba Uhiropne Eldamneri Mem Ae walinge waelba sol dalamla.
22 A'un Kristusap tiptangkamlomne pere agha,
Allah Yame Walingeri a'un mamun o'oro ma'alamsil andarina,
Allah el mo a'undam nimi nusamag ya'ag ua ulamlul.