Paulusti Yahudi sisa kom nimiag ambatsiropne sembe ambatsiogha
3
Ane sembe na,
Paulus kop aeag tobongkimneek nena,
Kristus Yesusti a'un Yahudi kom nimi wali nenehinne sembe ulamsiba,
nimiri na sae kaupto kop aeag tobongkimneek.
2 Allahri a'un sembe,
“Nari wana Yahudi sisa kom nimiag yorolamsilneag agha taulbahinun,”
sembaogti na Paulusag,
“Ambatto tongolamsululam,”
aro awe tatneog.
Allahri samenag nanag wali tatneogne sembe ka'ebalum.
3 Na saeag pibog nena,
samen tognoro wamogne nanag lag nenero tatneog.
Tam nene sembe ologha olog tintinaple saog uro a'unag mome toro pimna.
4 Nari mome toro pimnange neneko mome kemelapmunne pere agha a'un babe el tanep.
Samenag Kristus sembe tognoro wamog yubu na wana hekaneogpa,
mome toro pimnange ipmundi a'un babe el talulom.
5 Samenag tognoropne wamogne neneko samen mog so'oag wamek nimiag lag nenero ambareamsiog kom.
Aghana wene Allah Yame Walingeri lag nenero eldamneri wepto pogsirop nangap,
eldamneri yubu silimu tiptop nimiabag lag nenero ambarelamsil.
6 Tognoro wamog nena ane.
Yubu walinge nene toman agha Yahudi sisa kom nimi babe Allahri,
“Nari mabo Yahudi nimiag walia uahinun,”
senelamogti weroba tatsinepne neneko Yahudi sisa kom nimiag babe tatsinep.
Yahudi sisa kom nimi babe Kristus Yesusap ma'ap tangtop tanena,
Yahudi nimiap nong nikne tanep.
Ane sembe Allahri,
“Tatsinun,”
aro salag paliropne neneko sin Yahudi sisa kom nimiag babe tatsinep.
7 Yubu walinge neneko nari ambatto tongolamsin nena,
Allahri wana nanag yorolamnelneag agha el mikipne na nongag pibogti,
“Na mikipne pere agha ambatto yebel phululam,”
aro awe tatneog.
8 Awe nanag tatneog aghana,
ora nimi Allahri wepsirop mabo nubu sirik nimi wamangba,
na mo nimi ologne wamna.
Ologne wamna aghana,
Allahri wana nanag yorobaneogti,
awe tatneog.
Awe tatneog nena,
Kristus yubu enekori nimi tup nembahineba maikno sirikti,
nimiri sumbanep kom aghana eldina,
“Yubu walinge aneko Yahudi sisa kom nimiag ambatto tongolamsululam,”
aro nari saeag pibog.
9 Allah nia mangkina sumbaogne ponekori samenag agha,
“Walia uanun,”
senenne el mori el wamogpa,
lag tan koma tognoro wamog senenne nenekona samen wamek nimi ekon uro wamek.
Tognoropne neneko ekon uro wamek aghana,
wenena nari saeag pibog andarina,
Allah wana waliri senenne neneko nimi niag tibin nenero ambarelamsin.
10 Samenag tognoro wamogne wene Yesusag wana paliro winil dalamang nimi pere agha lag tangto palamla.
Allahri yeng senelamog nena,
“Nari Yesusag wana paliro winip tangtop nimi pere agha ulamneba,
mema mikibari nimi salelamsiang nang imagnang taneko whingag lag tale andarina,
na Allahri tam nia ni sembe wana hektopneag agha uanne el taukang,”
sembaogti uaog.
11 Allahri undo unulamog nena,
samenag agha nia mangkina anam sumban komag elba eldi,
“Kom tanep komne uanun,”
sembaogti undo unuaog.
Sembaogne nene sunsunum uro Kristus Yesus nu Saelba Ulamsilne pere agha uaog.
12 Kristusag sikne aro wana palilamapne pere agha,
elap ma'ap tangkamapne sembe Allah whingag poa yalamsilba,
nu log kom uro wana sepsebek aro mololanep.
13 Nu Allah whingag mololanep ane sembe,
“Sololamap,”
sembaheng kom.
Na wene a'un sembe seklelamnange sembe a'undi,
“Sololamap,”
sembamunagti wana ikin uro seneragseng kom aro a'unag mololamsin.
Na seklelamnange anena,
“Nari a'un wali paliag nenero kiplamsin,”
senelamnari seklelamna.
Paulusti Efesus nimi sembe Allahag molbatsiogha
14 Tam nene sembe Nuni Allah whingag nari yabu sanukto u amupto pulingkina kiplamna.
15 Elag agha nimi sisa ni wamangne,
imag uropne babe,
mog so'oag uropne babe,
ni elag agha mangaro likto palamlaba,
el umag sisa nikne wamap.
16 Nari a'un sembe Allahag molona molbarelamsin andarina,
wali-waliaba maikno el saeagha tupne wamlange sunsunum uro Allah Eldamne Yame Walinge pere agha mikipne a'unag pipsileri,
a'undi wana mikip nenelamsilul.
17 Nari molbarelamsinne,
wana mikip nenelamsile andarina,
a'undi Kristusag sikne aro wana palilamlomne pere agha Kristus a'un wanaag ua ulamlul.
Kristus a'un wanaag wamleba,
kal yareng pelengero pongolamlori,
meptaloa saog uro a'un Kristus ponekori o'ona senehinneag ikto mep tangkapmundi,
mikip talamlulom.
18-19 Kristus ponekori o'ona senehinne mog so'oag nimiri seneragnep kom aghana,
eldi o'ona senehinne nubu sirik wamlange sembe a'undi el tahom senelamna.
A'unap Allahri wepsirop mabo orange niap ma'ap tangto o'ona senehinne nenekoag mep tangkapmun taneogna,
a'undi seneragnepti,
“Kristusti o'ona senehinne nubu sirikti,
wena undo,
sabona undo,
alikinna undo,”
aro seneragto saelbapmundi,
tapto el tanep.
O'ona senehinneag mep tangkapmundi,
el talapmun andarina,
Allahri nia a'unag,
“To'opto tatsinun,”
senelamlange sunsunum uro a'unag to'opto lip tangkamlul.
“Ni tam nene uro yaboho,”
aro Allahag a'un sembe molbarelamsin.
20 Allahri el mikipneag agha nunag awe tolamla.
Nuri wanaag seneraglamapti,
“Ualulam,”
aro elag mololamap aghana,
nuri molona phelekto Allah mikipneri uanepneog nunag maikno sirik awe tolamla.
21 Nunag awe tolamlange poneko paliag nenero kiplamukap.
Kristus Yesus pere babe,
nu Kristusag wana paliro winip tangtop nimi pere babe,
Allah paliag nenero kiptoba lag tale.
Nu wene wamap nimiap,
amik wamik nimiapti Allah paliag nenero kiplameberi,
ya'ag uro omeklamebe paghabog omeklamukap.
Sikne agha lemna.