Filipi 1

Filipi

Nimi Sembe

Paulusti Mome Toro Pibogne

Paulusti Filipi nimi sembe kipsiogha

Nungkabo! Na Paulusap, nangkae Timotiusap Yesus Kristus ponekori arukna wamnamdi, mome neneag agha a'un kiplamsinam. Allahri a'un sembe, “Namabo taukang,” aro wepsiogpa, a'undi Yesusag sikne aro wana palilamlomdi, elap ma'ap taom. Elap ma'ap taomdi, Allah elmabo taom nimi as soro kalurop as Filipi wamlom nimi ni, “Nungkabo,” aro kiplamsinam. Apna nungkabo as Filipi nimi sembe Allah elmabo paia uhirop nangap, Allah elmabo yepto tongohirop nimiap a'un kiplamsinam. 2 “Nuni Allahap, nu Saelba Uhiropne Yesus Kristusap abenekori wana a'unag yororo walia ulamsirikti, wana aingnibahurukang,” senelamnamdi a'un sembe molbarelamsinam.

Allahag, “Naba naniong,” aro wana awi uro Filipi nimi sembe molbatsiogha

3 Nari sop-sop a'un sembe seneraglamsindi, nari wanaag agha, “Naba naniong,” aro Allah kiplamna. 4 Nari a'un nhin sembe sop-sop Allahag molbarelamsindi, molona ni wana yengag agha a'un sembe molona molbarelamsin. 5 Nari wana yeng ulamnel nena, na samenag Filipi so'oag yahiri, Yesus yubu walinge a'un ambatsisiba, a'undi alniro Yesusag sikne aro wana palilamlum sumag agha yeplamnelum. Alnirop sumag agha yeplamnelumba, a'unap sae tiptangto awe tolamuburi, wene babe awe nikne toro Yesus yubu walinge nimiag ambarelamsiap. 6 A'unag uro yabiogne neneko, Allah eldamneri a'un yepto alnibaogpa, Yesusag sikne aro wana palilamlum. Nari wana to'opto sik senelamnangena, eldi a'unag walinge alnibaogne ponekori a'un sae lipsin koma tipto walinge tolamle paghabog Yesus Kristus nen samoro yalamle sum eneko agha a'unag tolamsilne komobalul.

7 A'un nari nimi wanaagne wamlom ane sembe, nari a'un ni sembe, “Khapto wamukang,” aro yeng sirik uro seneraglamsinne nene sunsunum. A'undi nanap sae tiptangto awe nikne tolamap ane sembe, a'un sembe undo yeng senelamsin. Allahri wana nunag yorolamsilneag agha na awe tatneog saog uro, a'unag babe tatsio andarina, Yesus yubu walinge nikne ambarelamsiap. Na wene wamnangena, Yesus yubu walinge sik senerop kom nimi whingag Yesus yubu walinge pelepto sikne lag nenero ambarelamsinneag babe, nimiri na haing sae kaupto salero paiamneangneag babe, a'undi na sae limnen koma Allahri yeplamsilneag agha awe nikne tolamap. Ane sembe, “A'un nari nimi wanaagne wamlom,” senelamsin. 8 Nari a'un sembe, “Sik uro a'unap haiptahabe,” senenne nanag loloro wamlange sembe Allah eldamneri el wamlari, sikne lag nenero ambatsinep. Yesus Kristus ponekori o'ona senelamsilneag agha a'un sembe o'ona senero, “Haiptahabe,” senelamna.

9 Nari a'un sembe Allahag molona molbarelamsinne ane. Allahri a'undinge wana heksinne maikno nembahileba, a'unag el wamsilulne babe nubu tangto yabalamlul. Allahri undo a'un wana heklamsile andarina, a'un mamun o'ona senehinne maikno tangto o'ona senel dalamlulom. 10 Allahri a'undinge wana heklamsileba, a'undi nia mangkina mipsinne agha, “Malinge nene, walinge nene,” aro el talapmundi, wali sirikne aghabog saelbalulom. Mipsinne agha walingeog saelbapmun tanena, Yesus Kristus nen samoro yale sum eneko tam lelekto kemero kareplamleri, a'undinge wanaag malinge nhon babe iplul kombana, nimi nhondi babe a'unag tam pimnep kom. 11 Yesus Kristus ponekori a'unag ulamsileba, a'undi wana porogneag agha ul panne a'unag to'opto mauptaleba, a'undi ulapmunne sembe nimiri Allah omektoba el sembe kibiang towalengelamukang. Ni ane a'unag, “Undo uro yabilul,” aro Allahag a'un sembe molona molbarelamsin.

“Kamag wamnange Kristus ponekoringe wamna,” aro Paulusti ambatsiogha

12 Nangkabo a'un babe, “El tahiso,” senelamnangena, nanag uro yabalamlangeag agha yubu walinge Yesus sembe nimi maikno ka'elamangpa, Yesus yubu walinge nene sabo talamla. 13 Undo yabalamlaba, as aneag wamang nimi niri na sembe el uro wamang nena, “Paulus ponekori, ‘Kristus si nubu talul,’ aro ambarelamsilne sembe nimiri el sae kaupto kop aeag tobongkibong,” aro na sembe ka'elamangdi, el uro wamang. As aneag wamang nimiri babe, Roma nimi sembe yubu sia leropne ponekori ae yae ua uro yin salerop nang babe ka'ebaongdi, el wamang. 14 Nu Saelba Uhiropneap ma'ap tangtop nimi nungkabo tangtop nimi tane wamang nimiri babe na haing sae kaupto kop aeag wamnange kembaneong. Kembaneong aghana, na sae kaupto wamnange neneri sin nimi maikno taneko wana mikip nenelamsilba, nu Saelba Uhiropneap ma'ap tangtop nimi maiknori log kom uro Allah yubu Yesus sembe nen ma'aro lag phoro nimiag ambarelamsiang.

15-17 Nimiri Kristus yubu walinge ambarelamsiang nena, sin nimi nhon-nhondi, “Nubunge tanun,” aro ambarelamsiangba nhon-nhondi, “Ora nimi luknubahineri, paliag tanun,” aro ambarelamsiang. Sin undop saog nimiri wanaag tapto seneragna koma, na haing sae kaupto kop aeag wamnange sembe el wamangdi, “Paulus sembe ikin nembaukap,” aro seneragto ulamneang. Seneraglamangdi, “Kristus sembe yubu ambarelamsibeba, nimiri nu omeklamsiikpa, nubunang tabenge sembe Paulusti wana saplul,” aro Kristus sembe ambarelamsiang. “Nimiri omeklamnukang,” aro ambarelamsiang aghana, nenneri otsik uro o'ona senehinneag agha, “Yepsinun,” aro Kristus yubu ambarelamsiang. Sin undop saog nimi el wamsilba, Allahri na kop ae aneag sekitneo andarina, pelebel tanan yubu ambatsirop sum eneko sembe nang-nangalamna abeneko pere Kristus yubu walinge babe sik uro ambarelamsindi ambarelamsinun. Na wamnange sembe o'ona senelamneangdi, wana walingeag agha Kristus yubu walinge ambarelamsiang.

18 Nimi taneri wana sikneag agha yubu walinge ambarelamsiangba nenneri, “Nubunge tanun,” aro Kristus yubu walinge ambarelamsiang. Tam nene nanag ikin kom. Na sembe o'omnena, sa'a-sa'a uro yabileba, nimiri Kristus yubu walinge sik uro ambarelamsiang tanena, na yeng ulamnel. Na yeng ulamnelba, amikne babe yeng uro wamnun.

19 Na haing sae kaupto kop aeag wamnari, “Na yeng sirik uro wamnun,” senen nena, tam nene sembe. Yesus Kristus ponekori nunag Yame Walinge tatsiogne babe, a'undi na sembe Allahag molona molbarelamnelomne babe, abeneko pere agha, “Eldi Yameri na yepto paiamneleri, wali nembanelul,” aro na el wamna.

20 “Sik uro na yepnelul,” aro yeng uro nang-nangaro seneraglamnange angaro yabinep komdi, ali sembanun kom. Nari nongag sa'a-sa'a uro yabioba, nari nong ningkiri, “Yesus Kristus poneko si nubu talul,” aro sop-sop ulamna. Wene babe, amik yepneleba kamag wamneag babe, ya'ag omneikag babe, “Yesus Kristus si nubu talul aro na log kom uro ambarelamsisene,” senelamna. 21 Nari senen nena, na wene kamag wamnange Kristus ponekoringe wamna. Na tebanepne babe, tebaneba kamna walinge nanag talul. 22 Aghana na mog so'oag wene kamag wamnange nenena, “Awe walinge wero nimi wali yeplamsinun,” senelamna. Ane sembe, “Yaghe, nela agha wepto whingag nembanun?” senelamnari, 23 na tara sip agha kilim, tara sip agha kilim aloa saog ulamnel. Nari wanaag agha senelamnangena, “Yesus Kristus saramag peheneri, nhon wamseneme,” senelamnange nene, ot nene agha wali sirik senelamna. 24 Aghana nari, “A'un wenehiro yepsisene,” senelamnangena na tebane tanena, a'un eka'uk wapmunag ane sembe, “Mog so'oag nimi nong neneag agha wamsene,” senelamna. Kamag wamneba, a'un sembe wali wamlul.

25 Tam nene sembe na sik uro el wamna ane sembe, “A'unap nhon na kamag wamnun,” aro wepto whingag nenelamna. Mog so'o neneag a'unap nhon wamsebe andarina, a'undi Yesusag sikne aro wana paliro seneragnangeap, a'undi wanaag awi senenneap, “Nubu tangto yabalamlul,” aro a'unap nhon wamneri yeplamsinun. 26 “Kamag wamnun,” aro wepto whingag nenelamna andarina, na a'un wamlomag samoro yane tanena, a'un Kristus Yesusag nhon ma'al dalamlom nimi awi sembalulom. Kristusti na tebanebag agha taulbaneleba, a'unag samoro yanenge sembe awi senenne siriro la'analamloa saog uro a'unag uahilul sembamnari, “Nen haiptahabe,” senelamna.

Yesusag wana palirop nimiri ulamnepne sembe ambatsiogha

27 “Nen haiptahabe,” senelamna aghana, a'un wamlomag yaneri, a'un haingdi ipsinun to, ya'ag weag wamebeba, nimiri a'un sembe yubu lena aghabog ka'ebanun to, aro amik el taukap. Ot sa'a-sa'a uro yabileba, “A'un wali wamlulom aro el tahane,” sembamnari nari wanaag wamlange a'un ambatnuahin. A'undi sop-sop ulapmun nena, Kristus yubu walinge saelba ul pirop nimiri ulamnepne sunsunum uro ulamlulom. Allah Eldamne Yame Walingeri a'un nhonog nenero ma'alamsileba, Kristus yubu walingeag wana paliro a'un wana seneragna nhonog uro khapto wamlulom. Khapto wapmundi, a'un mamun seneragna nhonog agha sae tiptangto kilim weang alapmundi, Kristus yubu walinge pelepto ambarelamsululom. 28 A'undi ni ulapmunneag a'un aisa nenelamsiik nimi sembe log semban koma khapto sekamlulom. A'un log kom uro khapto sekapmunne nene sindi kembongkia, “Allahri sin Yesusag wana palirop nimi taulbahileri, Yesus yubu ingisaptop nimi oro luknubahilul,” aro keknep tangto yabilul. 29 Allahri a'unag wana yororo tarelamsil nena, Kristusag sikne aro seneragnange tarelamsildi, a'un taulbahilul. Aghana elag seneragnange aghabog tatsiog kom aghana, Kristus poneko sembe seklero ul panne babe nunag tatsiog. 30 Nunag tatsiogpa, nari kilim weang aro ulamsinge neneko a'undi haingdi ililamnelum. Wene babe ikinne nanag uro yabalamlange sembe ka'elamlomdi, a'undi babe kilim weang aroba nikne seklelamlom.