Filipi 2

“Kristus eldamne mombolag nenep tangto seneraghogne sunsunum uro seneragto ulamlulom,” aro ambatsiogha

Allahri wepto poghogne Kristus ponekoap ma'al dalamlomne neneri a'undi wana mikip nenelamsil. Kristusti a'un o'ona senelamsilne neneri a'undi wana aingnilamsil. Allah Yame Walingeri a'un yeplamsilneag agha a'unkabo tangtop nimiap sae tiptangto wali wamlomdi, a'undi wanaag agha yareag senel dalamlom. 2 Ane sembe a'undi na wana awi to'opto nembanululom nena, a'un seneragna nhonog uro wana nhonog agha a'un mamun o'ona senel dalamlulom. A'un mamun, “Nari wanaagne,” senel dalapmundi, seneragna nhonog agha ul palamlulom. 3 Sa'a-sa'a ul palapmunne nenena, “Na nimi nubunge tanun,” aro uaheng kom. Apna maiptangtop senenneag agha, “Na ililamnukang,” aro uaheng kom. Undo unuaheng aghana ulamlulom nena, a'undi wanaag andamne mombolag nenep tangto ora nimi sembe, “Whingagne nembahinun,” aro ulamsululom. 4 A'undi, “Teko uaneleag,” aro ulapmunneag, ot andamne sembe aghabog semban koma ora nimi sembe babe, “Teko uahileag” aro kembamsululom.

5 A'undi seneraglamlulom nena, Yesus Kristus ponekori wana seneragtopne sunsunum uro seneraglamlulom.

6 Allahri wepto poghogne Kristus ponekoap Allahap nika-nika uro nhon urop,

aghana Kristus ponekori eldamne sembe

“Nanap Allahap nika-nika uroptina, nia mangkina salelamna aghana,

sesog sembe sae limnun,” senelamog.

7 Wene eldamne sembe seneragtan koma Allahringe mikipne sae libogti,

mog so'oag nimi mangap tangtopne sunsunum uro nimi nongag mangap taogti,

nimi arukna nenep taog.

8 El mog so'oag nimi nongag mangap taogti wamogha,

eldamne mombolag nenep tangto

Allahri elag, “Mog so'oag nimi sembe lunuro tebalulam,” aro aruktop yubu ka'elamogti,

wail ibatna koma sunsunum uro ulamog paghabog tebaog.

Tebaog nena, nimiri el yan sae pakuri kalag siplobekpa, seklero tebaog.

9 Eldamne mombolag nenep tangto Allah yubu sunsunum uro ulamog ane sembe, Allahri Yesus poneko kiliro paliag sirikne urobag nembaog.

Allahri wana elag yorolamogti, elag pibog nena, nia mangkina saelba uhiropne si engero pibogti, mikipne ni aneko Yesus saeag pibog.

10 Ane sembe nia mangkina saelba uhiropne poneko si Yesus sembe, nia ni imag ua uropneap, mog so'oag ua uropneap, so'o punag ua uropneap,

nia mangkina wamlangeri el whingag yabu sanukto u amupto pulingkiberi, el kiplamukap.

11 Nia mangkina wamlangeri, “Yesus Kristus nia mangkina Saelba Uhiropne wamla,” aro lag phoro lelamebenge toman Nuni Allah paliag nenero omeklamukap.

“Wap warelamla saog uro wamlulom,” aro ambatsiogha

12-13 Nangkabo, nari a'un o'ona senelamsin nimi wamlom. Yesus eldamneri Allah yubu sunsunum uro ulamog ane sembe, a'undi babe Allah yubu ambarelamsinne ka'eapmundi, sunsunum uro ulamlulom. Samenag a'un anabiag wamnori, nari yubu lelamnonge ka'elamomdi, sop-sop sunsunum uro ulamom. Samenag ulamom saog uro, wene babe weag nenep tangkamabag nari yubu lero palilamnange sae limna koma saelbapmundi, sol wali uro ulamlulom. Allah el mori a'un taulbahiog nena, a'undi wanaag awe tolamla andarina, Allahri wana yeng neneropne sunsunum uro yeng senelapmundi, sunsunum uro a'undi uanep. A'undi wanaag tolamla ane sembe, eldi a'un walia nenelamsilne sunsunum uro log senenne agha pet-pet aro lag nenero ulamlulom.

14 Sa'a-sa'a a'undi ulapmunne parog-parog arop yubu lemna koma, a'un mamun yubu neneptan koma ulamlulom. 15-16 Undo unulapmun nena, “Allah elme wamnaba, nimiri nanag tam pimneikagti, malia uan koma walinge aghabog uanun,” aro ulamlulom. Malia uan koma wapmundi, Yesus yubu walinge salero ambarelamsululom. Yesus yubu walinge enekori nimi kamag nenehirop yubu wamla. Mog so'oag nimi anabiag malia uan koma wapmundi, Yesus yubu walinge ambarelamsimun tanena, ekel ina inibinag pirop nimi anabiag wapmunne, a'un wap warerop saog urop nimi wamlulom. Nari a'unag, “Undo-undo unulamlulom,” aro ambarelamsin yubu enena, amik Kristus nen samoro yale sum eneko, el sembe nari kilim weanga awe wero tongohiropne neneko, “Teba'en sembaleag,” aro yubu undo ambarelamsin. El nen samoro yale sum eneko a'un Filipi nimiri wali-walia ulapmunne neneko ipsileba, nari babe, “Ali semban koma elag ambatneri, ‘Nari awe wel tongolamnange pere agha wali-walia unulamang,’ aro ambatnun,” senelamnari a'unag, “Undo-undo unulamlulom,” aro ambarelamsin.

17 Nari awe wel tongolamnange pere agha a'undi Yesusag sikne aro wana palilamlom. Ane sembe nari, “Allah sembe nhon tarelahane,” senelamnangena, Allah sembe awe wel tongolamnoba, a'undi sik senelamlomne neneko Allah whingag kipto palilamna. Na nimi sisa Yahudi nimiri, “Allah sembe pham domba aukag tabukap,” aro palilamangdi, pham domba oropne nong alibag anggur lolterop mag ikto Allah kiplamang. Undo saog uro nari a'un yepto yubu ambatto tongolamsinne sembe nimiri ya'ag omneika babe, “Nari eneng Allah sembe iknun,” aro wana awi uro tarelamna. A'unap nanap nhon Allah kipto palilamapne sembe nikag awi senelamukap. 18 Nuri Allah sembe pimnepne sembe a'undi babe nari awi senelamnange saog uro nanap nhon awi senelamlulom.

“Timotiusap Epafroditusap pogholahinun,” aro ambatsiogha

19 Nari sik uro seneraglamnange Yesus nu Saelba Uhiropneri yeplamneleba, nari Timotius elemag a'unag pogholanun. Pogholaneba eldi a'un sembe yubu ebel yalenge ka'ebane taneogna, wana aingnibanele andarina, wana mikip tanun. 20 Ot Timotius agha nari wana seneragnaap el agha sunsunumdi, ot eldi a'un wali wamnepne sembe sik uro seneragto o'obahinep. 21 Nimi orange ni kemelamsinba, Yesus Kristus si nubu talulne sembe seneragto ul palamang komdi, ora nimi sembe seneragna koma sindam nimiringe sembe agha seneraglamangdi ulamang. 22 Aghana Timotiusap nanap ili elme saog wamnomori, Yesus yubu walinge ambatto tongolamsinomoa eldi sol wali uro yeplamneo. Yeplamneonge toman agha keknep taoba, a'undi babe haingdi ibomdi, “Nimi sikne wamla,” aro el wamlom. 23 Ane sembe, tam nanag uro yabalamlange sembe, “Lambanun to, kom to,” aro olog tibin talamle tanena, “Nari Timotius a'unag men phea pogholanun,” aro seneraglamna. 24 Na mori sik senelamnangena, nu Saelba Uhiropneri yeplamneleba, ko'o olog we uro pin komag na babe men phea a'un kemelahinun sembamna.

25-26 Nangkae Yesusag wana paliropne Epafroditus a'undi nanag pogholaomne poneko nen sap a'unag wali pogholanun sembamna. El pogholaomne poneko nanap nhon awe nikne wel tongolamnomoba, nu aisa nenep tangtop nimiri nu, “Luknubahukap,” aro ulamsiongba, Yesus yubu walinge pelepto sikne lag nenelamsinomo. El samen naiklamoba, a'un el tahio. A'un el sembe el uro wamlomba, “Log sembaikag,” aro el wana ikin uro a'un sembe, “Wela wamang aro kemel pihisene,” senelamla. Ane sembe wene el nen a'unag pognepneog wamla sembamna. 27 El sik naikna mali uro naiklamori, tebanep wamo aghana, Allahri el sembe yareag sembaori yeboba, wali tao. Allahri el yareag sembaongena, el aghabog yareag sembao kom. Na sembe babe Allahri, “Wana ikin along sembaleag,” aro yareag sembaneori, Epafroditus wali nembao. 28 Ane sembe maiknoro seneraglamnari, “El nen a'unag samoro, ‘Pululam,’ senun,” aro seneraglamna. Nen samoro a'unag pogholane andarina, a'un babe wana awi uahileba, na babe wana aingnibanelul. 29-30 Eldi yeplamneonge a'undi pogholaomne wamla. A'undi na yeplamnohom aghana, a'un weag nenep tabongeag agha eldi a'un lumbaori, eldamne nong sembe seneragtan koma na yeplamneo. Yeplamneori elba, “Yesus Kristus si nubu talul,” aro Epafroditus ponekori awe tolamori, el tebanep wamo. Ane sembe, el samoro yaleba, a'undi wana yengag agha, “Nu Saelba Uhiropneri elap nunap ma'alamsil,” aro el kipto paliag nembalulom. Nimi etneri sindam nimi nong sembe seneragtan koma Yesus sembe awe tolamik tanena, undop saog nimi kipto paliag nembamsululom.