“Nimiri ul piropneag agha nimi nhon Allah whingag wana porogne tanep kom,” aro ambatsiogha
3
Wene nangkabo,
nari mome komoptopne palilamnangena,
nu Saelba Uhiropneap ma'al dalamlomne sembe awi uro wamlulom.
Undo mome toro pimna aghana,
nari nen sarikto a'unag ambatsinenge na sembe ikin komdi,
“A'un pelebahinun,”
aro nen sap sarikto ambarelamsin.
2 Sin kam yonge saog urop nimiri,
“Ot kon kareptop nimi aghabog Allahap ma'ap tangtop nimi tanep,”
aro ambarelamsiang.
Undo ambarelamsiangdi,
nengabo kon karebi agha meneng sisua nenehirop nimi tanekori mali sirikne ulamang.
Ane sembe haing whi uro yae wapmundi,
sindi ambarelamsiangne sik semban koma a'un togtangto wamlulom.
3 Sindi ambarelamsiangdi,
“Kon karebamun taneogna,
Allahap ma'ap tangtop nimi talulom,”
alamang aghana nunna,
“Kristus ponekori Allahap nunap ma'alamsil,”
aro elag wana palilamap tanena,
nu kon kareptop nimi taptopne wamap senep.
Allahri wepto poghogne Kristus Yesus ponekoag wana palilamapti,
el paliag nenelamapti,
Allah Eldamne Yame Walingeri yeplamsilneag agha sik uro Allah omeklamap.
Kristusag wana palilamap aghana,
nimiri nongag ul piropneag wana palilamap kom.
4 Nimi nhondi el wanaag sik senelamsori,
“Nari nongag ul piropneri Allah whingag wali nembanelul,”
aro seneragnep.
Nimiri sik uro eldamneri nongag ul piropneag wana pimnep tanena,
nadamne sembe olog ambatsisene sembamna.
Ora nimiri nongag ul piropne ologha wamlaba,
na Paulusti nongag ul piropne maikno sirik wamla.
Nari nongag ul piropne maikno sirik wamlange sembe ka'ebalulom!
5 Na Israel ponekori nimi sisa liktoba taptopne wamna.
Israel elme wanaagne Benyamin nimi sisa liktoba agha mangkaneek!a
Mangkaneekpa Allahri aruksirop yubu sunsunum uro na mangap tahia,
ik lin sum eneko taogpa,
nanag kere kon karebaneek.b
Nu Yahudi nimi nunisag Abraham poneko Ibraninge alamek tanena,
na Ibraninge taptopne wamna.c
Nari sik tapto Musari aruktop yubu sunsunum uro ul palamsinge sembe “Farisi nimi,”
aro kiplamneek.
6 Na undo Musari aruksirop yubu sunsunum uro sikne ulamsiba,
nimi nhondi babe nari ulamsinge sembe Allah yubuag agha takto nanag tam pimnep kom.
Na Allah sembe wana maikno senelamsi ane sembe,
“Yesus yubu neneko orolenange,”
senelamsinge nanag loloro wamneogpa,
“Yesusag wana paliro winip tangtop nimi seklebaik,”
aro olamsisi.d
7 Undo wamsiri ulamsiri,
samenag nari,
“Allah whingag wali nenep tanepne maikno nanag polop tal,”
sembanep aghana,
wenena undo senelamna kom.
Wenena Allahri wepto poghogne Kristus,
“Si nubu talul,”
aro ulamna,
aghana nari samenag,
“Wali nenep tanepne polop tal,”
senelamsiri ulamsinge ni aneko teba'en senelamna.
8 Neabene aghabog kom aghana,
samenag ulamsinge Allahri,
“El yalul,”
aro salag pibogne Kristus yanepne sembe nang-nangaro ulamsi.
Nang-nangaro unulamsi aghana,
“Yesus poneko el Kristus wamla,”
aro el taneog kom.
Ane sembe ni samenag ulamsinge neneri yepneog komdi,
pham ti yaroba wamloa saog senelamna.
Wali sirik phelektopne nhonogne anena,
“Yesus sik uro Kristus wamla,”
aro el taneoba,
Yesus Kristus ponekori na saelbamnel.
Nia mangkina sae limno andarina,
Yesus Kristus nu Saelba Uhiropne ponekoap sae tiptangto wamnemeri,
9 sik tapto elap nhon ma'ap tangto wamnunam.
Nari samenag Musari aruksirop yubu saelbamsiri,
ulamsingeag agha Allah whingag,
“Wana porogne wamna,”
senun kom.
Aghana nari Allahri wepto poghogne Kristusag sikne aro wana palilamna andarina,
nanap Kristusap ma'ap tangto wamnam.
Nari Kristusag sikne aro wana paliropne nene sembe Allah eldamneri ililamneldi,
nanap Kristusap ma'ap tangto wamnamne ililamsildi,
na sembe,
“Wana porogne,”
senelamnel.
10 Ot nhonog nanag taho senelamnangena,
Allahri wepto poghogne Kristus poneko el tahaneri,
sae tiptangto wamseneme senelamna.
Allahri Yesus Kristus teptobag agha kamag nembaonge mikipne neneko babe nanag taho senelamna.
El samenag seklero tebaog saog uro na babe el sembe seklero tebahane andarina,
11 el samenag teptobag agha kamag taogne saog uro na babe kamag tahane senelamna.
“Saramag wamlange sembe ul tongolamlulom,” aro ambatsiogha
12 Nari lemnange nenena,
“Ni ane nanag uro yaboho senenne nanag taoba,
Allahri nanag komopto tobitnel,”
alamna kom.
Aghana nari tipto ulamneba,
“Kristus Yesus ponekori na sembe wero tatnelulne tomnun,”
aro tipto ul tongolamna.
Nene sembe na taluro tomneori eldinge nembaneo.
13 Nangkabo,
nari sik uro seneraglamnangena,
“Na sembe weroba wamlange tatnelulne neneko na saeag tal,”
senelamna kom.
Aghana ot nhonog nari uanun nena,
na wailag wamlange sembe limneri,
saramag wamlange sembe mikip uro ulamnun senelamna.
14 Ane sembe,
“Komobitneba na sembe weroba wamlange na saeag talul,”
aro kilim weanga yubu ambatto tongolamna.
Na saeag tatnelul nena,
“Allah imag ua urobag kamag uro wamnunam,”
aro Allahri Kristus Yesus pere agha na taluro yopneogti tatnelul.
15 Nu wana whi uro seneragnep nimi wamap tanena,
weneog lemnange sunsunum uro nun niri undo seneraglamukap.
Aghana a'un nimi agha nari lemnange sembe saelbanep komdi,
saekag kom tanena,
hae Allahri tam nene sembe a'un tibin nembatsilul.
16 Ot wenena,
nunag tibin nembahioba,
nunag wamlange sunsunum uro saekag wameberi ulamukap.
17 Nangkabo,
a'un Yesusag wana palirop nimiri na kemelamnelomba,
nari ulamnange sunsunum uro a'undi babe ulamlulom.
Nuri sikne agha ul palamoboa sunsunum uro ul tongolamang nimi babe ipsimun tanena,
sin sembe babe wailag nembahin koma kemelamsimunba,
sindi walia ulamikne sunsunum uro ulamlulom.
18 Wene aro ambatsin yubuna tam nene sembe.
Samenag nimiri Kristus poneko kalag sibekpa,
nu sembe tebaog aghana,
nimi maiknori ul palamangne pere agha nu sembe tebaogne ponekoap aisa nenel dalamang.
Undo ul palamangneag agha nari wana saplamnelba,
samenag ik sulu ambarelamsino saog uro wene babe hail mag tiniro ambarelamsin.
19 Sin undo unurop nimiri mog so'oag nimi nongagne sembe wana to'opto seneraglamangdi,
“Na mon sek,”
senenne paliag nenero tena aboap ulamang.
Sindi ali nenep tangto ul piropne sembe maibil dalamang.
Undo ul palamangneag agha sirikagne seklero loba taukang.
20 Aghana nu Allah elmabo wamapti,
nuringe as taptop nena,
el imag wamlange ponekoap nhon wamukabag wamla.
“Anikoa nu Taluro Saelba Uhiropne poneko Yesus Kristus amik yalul,”
aro seneraglamapti,
wana yeng uro tibogto el yalulne sembe nang-nangalamap.
21 El yalulne poneko saeag mikipne wamla andarina,
nia mangkina el umag nembahilul.
Mikipne nenekoag agha nu mog so'oag nimi ali nenep tanep nimi nong nene el imang warero polbanep kom nong saog uro nembahileri,
wendog nembahilul.