Filipi 4

“Wana yeng uro khapto wamlulom,” aro ambatsiogha

Nangkabo, a'un Yesusag wana palirop nimi nari o'ona sembamsin nimi wamlomne nari wanaag, “A'unap sik uro haiptahabe,” aro yeng uro senelamsin. A'unna na sembe, nari kilim weanga ambatto tongolamnonge sembe kwiria usoghag elektoba kiptopne nubunge nanag tatnelonga saog uro wamlom. Nangkabo a'un nari wanaag wamlom nimi sembe wana awi maikno ulamnel. Ni yubu nu Saelba Uhiropne sembe ambatsin yubu eneko seneraglapmundi, wana khapto wamlulom. 2 Nunin yabo Euodiaap Sintikheap kelabo abeneko sembe a'undi yubu leptangtopne sembe mali semban. A'un abeneko Yesus nu Saelba Uhiropne ponekoap ma'ap tangtop kelabo wamdom ane sembe, nari a'un wenero mololamsin nena, “A'un seneragna nhonog uro saekag lero wamturom,” aro wenero mololamsin. 3 Nangkae Sunsugos, an wana wali uro sol wali uro nanap nhon tolamnam. Anag moloro ambarelangken nena, “Sin kelabo phende nen tipto a'ep taikagti, andi yeplamsululam,” aro mololangken. Sin kelabo abeneko nanap nhon Yesus yubu walinge sembe kilim weanga awe tolamobongena, nungkae Klemensap, yog nimiapti nanap nhon tolamobo saog uro sin kelabo abenekoapti babe awe nikne tolamobo. Sin nanap nhon awe tolamobo nimi tanekona, Allahri el wamsildi, nimi ya'ag uro kamag wamnep nimi si mome toro pairoba anekoag sindi si wamla.

4 “A'un nu Saelba Uhiropneap ma'ap tangtop nimi wamlom ane sembe, sop-sop wana yeng uro wamlulom,” alamna! Nen sap sarikto lemnun. “Wana yeng uro wamlulom,” alamna! 5 A'undi wanaag agha nimi niag win-win aro ulamsimunba, nimiri a'un kemero el taukang. Nu Saelba Uhiropne poneko peramag wamla. 6 Nia mangkina sembe wana tai pailangkang, tau pailangkang uan koma Allahag molona mololamlulom. Nia mangkina a'undi wana seneragnaag wamlange sembe a'undi wanaag agha, “Nuni Allahri nunag walia ulamsil,” aro kiplapmundi, Allahag molona mololamlulom. 7 Undo Allahag mololapmun tanena, a'un Yesus Kristusap ma'al dalamlomne sembe, Allahri a'un wana aingnilamsilul. Allahri wana aingnilamsilengeag agha a'undinge wanaap seneragnaap yae paiamsilul. Allahri nimi wana aingnibahinepne neneko sembe mog so'oag nimiri seneragnep kom aghana, Allahri a'un wana aingnibahileri, yae wamsilul.

8 Komoptopne ma'aro paibatnuahin. Nangkabo, a'un Yesusag wana palirop nimiri seneraglapmun nena, nia sikne wamlange, nia sunsunum uro wamlange, nia porog uro wamlange, nia walinge aghabog malinge ma'aban koma wamlange, nia holno aropne wamlange, nia nimiri maipsenga wamlange, tam nene wali sirikne, nimiri wali aro paliag nembaheng tanena, tam nene sembe wana to'opto seneraglamlulom. 9 Nari yubu a'unag ambarelamsinoba, ka'elamomdi tolamomne sunsunum uro ul palamlulom. Nari ulamnoba, ililamneomdi el taomne sunsunum uro ul palapmunba, Allahri wana aingnilamsileri, a'un yepto paiamsilul.

Filipi nimiri Paulus yeptoba pibekne sembe kipsiogha

10 Nanap nu Saelba Uhiropne ponekoap ma'ap tangto wamnari, na yeng sirik wamnel nena, ko'o maikno uro yabio aghana, wene a'undi na wamnange sembe seneraglamnelomba, yeng maikno ulamnel. Nari lelamnange nene, “A'undi na sembe ekon taneom,” aro lelamna kom. A'undi na sembe el wamnelom aghana, a'un nanag whing pailanepne eka'ukti, ko'o maikno uro yabioba, weneog pibom. 11 Nari lelamnange nene na kwema wamnelne agha lelamna kom. Nanag sa'a-sa'a uro yabalamogneag agha el talamsingena, “ ‘Nari saeag wamlange sunsunum,’ senenneag agha nari hae ul pinep,” aro el tahiri wamna. 12-13 Nari samenag na ua unne abene ni yambahi. Kwema uro unne to, na saeag kwema koma sa'a-sa'a wamnaba unne to, abenena tam nhon nanag lag tao. Samenag nimi maiknori ekonne tognoropne nhon nanag lag taoba, lag phoro ambatnuahin. Sa'a-sa'a nanag uro yabilenge, kwaneng yo babe, mon og teneba babe, tam ikinne babe, ikin komne babe nanag uro yabileba, nu Saelba Uhiropne ponekori mikip nenelamnelne agha wana khapto wamnun. Tam nene nanag lag taoba, lag phoro ambarelamsin.

14 Tognoroba nene el tahiri, lag ambatsin aghana, a'undi na kwema wamnoag a'undi nanap sae tiptangto yepneom. A'undi na yepto uaomne wali sirikne agha uaom. 15 A'un Filipi nimi el wamlom nena, samenag nari, “Yesus yubu walinge ambarel pihinun,” aro a'un wamlomag Makedonia so'o agha lanaro palamsiba, Yesusag wana paliro winip tangtop nimi yogneri nanag yeptoba pogto tatneek komne, a'un babe el wamlom. Ni Yesusag wana paliro winip tangtop nimi agha, ot a'un nhonogti na yepneom. 16 Na as soro kalurop as Tesalonika wamsiag babe a'undi, “Kwema elag ualeag,” aro na yepnenne ik etpare palilamnelum. 17 Nari sembamnange, “A'undi na sembe pimnehengba, na tol tonne og,” sembamna kom. Nari sembamnange, “Kal wana maubaloa saog uro a'undi walia unne mauro palilamlomne wana yeng uro imnun,” senelamna. 18 Na kwema wamneonge sembe a'undi ni paibatneomne tomno. Apna phelektopne babe paibatneom. Na sembe ni paibatneomne Epafroditusti payaonge tomno. Wenena nanag ni kwema wamneonge ni saeag taoba wamna. A'undi na sembe ni paibatneomne nenena, Allah sembe song walia taroba saogne wamla. A'undi na kwema wamneonge sembe paibatneomne nenena, “Allah sembe tarukap,” aro wali pibomdi, Allahri wana yeng neneropne pibom. 19 A'undi, “Allah sembe pibukap,” aro yepneomne sembe Allahri na yae paiamnelne ponekori a'unag kwema ulamsilenge babe teknero yeplamsilul. Allahri saeag nia mangkina wali uropne wamlaba, Yesus Kristus saeag walia maikno uro phelekto pibog. A'un Yesus Kristusap ma'al dalamlomne sembe a'unag kwema uahinepne ni teknero yeplamsilul.

20 Nuba Nuniong Allahri nu yae paiamsilne poneko ya'ag uro omeklamebe paghabog omeklamukap! Sikne agha saekag lebap.

Paulusti Filipi nimi kipsiogha

21 Nangkabo! Allahri sin, “Nari mabo taukang,” aro wepsiog nimi, sin Yesus Kristusap ma'ap tangtop nimi ni sembe, nari kiplamsinne nene ambatsululom. Nangkabo Yesusag wana palirop nimi nanap nikag wamap nimiri babe a'un kiplamsiang.

22 Allahri wepsiog nimi Yesusag wana palirop nimi ni tanekori a'un kiplamsiang. Sin yubu sia leropne Kaisar ponekori ae yae ua urop nimi taneko babe, sindam nimiri a'un kiplamsiang. 23 Nari a'un sembe molbarelamsin nena, “Yesus Kristus nu Saelba Uhiropne ponekori wana a'unag yorolamsileba, a'un wana nong ningkiap paiamsilul,” aro elag molbarelamsin. Sikne agha lemna.

Abenda.