Efesus 6

Meap nong nimiap sembe ambatsiogha

Kelmabo me, a'un Saelba Uhiropne Kristusap ma'al dalamlom kelmabo me wamlom tanena, a'undi otsikne agha ulamlulom. Sikne ulamlulom nena, a'uni a'unindi yubu ka'eamsimundi, sunsunum uro ulamlulom. 2 Allahri samenag aruksirop yubu pibogneag agha, “Wali wamlulam,” aro salag lekto pibogha sam nena, “Ani anindi yubu ka'ero kiplamsimen tanena, 3 wali uro wapmenba, an mog so'o eneag ua unne ko'o we uro pileba, wali wamlulam,” aro salag lekto pibog.

4 Nangkabo, a'undi mabo wamangba, a'un sikini yabo wamlom tanena, a'un maboag wana yo nenehiropne agha wana alukto lero ulamsiseng kom. Ulamlulom nena, a'un maboag amoro yubu kiki telekto nu Saelba Uhiropneri seneropneag agha ambatto wenelamsululom.

Nimi aruknaap, sin saelba uhirop nimiap sembe ambatsiogha

5-6 Nangkabo, a'un mog so'oag nimi arukna wamlom tanena, a'uni yabori aruksirop yubu ka'elamsululom. Sindi a'unag aruksirop yubu sunsunum uro ulapmunne, “Haingdi imneikti, wali sembanukang,” aro ulamseng kom. Sindi yubu ka'eamsimundi, awe tolapmun abeneko pere a'undi wanaag, “Kristus poneko sembe wanaag log uro kiplamnari, el sembe tolamnange saog uro Allahri senenne sunsunum uro ul palamnun,” aro nong ningkiri wanaag agha sol wali uro awe tolamlulom. 7-8 Awe tolapmunne abeneko pere, “Mog so'oag nimi sembe mo awe tolamna,” sembaheng kom. A'un el uro wamlom nena, “Nimi etneri walia ulamle tanena, nu Saelba Uhiropne ponekori, ‘Nimi eneko nimi arukna to, mo sektop nimi to,’ semban koma nimi enekori uropne sunsunum uro lumbaleri, kamna walinge tatsilul,” aro el wamlom. Ane sembe a'undina, “Imagneri na Saelba Uneropne poneko sembe tolamna,” senelapmundi wana walingeag agha awe tolamlulom.

9 Nangkabo, a'undi arukna wamangba, a'un sin saelba uhirop nang wamlom tanena, a'undi arukna babe wana walingeag agha ulamsululom. A'un el uro wamlom nena, a'unap a'undi aruknaap sembe a'un Saelba Uhiropne nhonog Imagne poneko wamla. El ponekori, “Nimi nubunge to, ologne to,” semban koma nimi ni kemelamsil. Ane sembe, a'undi aruknaag yonge wero log nenero ulamsiseng kom.

“Allahri tatsiropneag agha nimi pelep tangtoba enekto weamlulom,” seogha

10 Yubu komoptobag ambarelamsin nena, nu Saelba Uhiropne ponekoap ma'al dalamlomdi, el mikip phelektopneri a'unag mikip nenelamsilne pere agha mikip talamsut. 11 Phia sikini nenekori a'un, “Opsinun,” aro ulamlaba a'undina, “Na omneleagti, khapto wamnun,” aro weamsut. Allahri a'un pelep tangtoba mal tanne ni tarelamsilneag agha a'undam nangag enekapmun tanena, khapto sekapmundi weamlulom. 12 Nari lemnange nenena, nu mal talamapne nong sop ipsinep nimi mog so'o eneag wamang nimiap mal talamap kom. Nu mal talamap nena, nimiri ipsinep kom phia yonge mog so'o alibag ua ulamangneap, mog so'o inibinne ul pirop nimi agha mog so'o saelba uhiroba anekoap, inibinne mikiba anekoap, inibinne nubu neneroba anekoap tanekori nu aisa nenelamsiangba, mal talamap. 13 Ane sembe Allahri a'un pelep tangtoba mal tanne ni tarelamsilneag agha a'undam nangag enekto wamlulom. Undo unulapmun andarina, phia yonge sikini nenekori a'un oro loba nembahinep sum uro yabileba, a'un khapto sekapmundi, tipto mal talapmundi, malinge wa'epto sekamlulom. 14 Abene agha, mal tarop nimiri wero up tangkamloa saog uro a'undi babe weamlulom. Mal tarop nimiri uwoghag noptoba noplamloa saog uro Allah yubu sikne a'undam nangag uwoghag nobamlulom. A'undi ot wana porogne agha ulapmunne neneko a'undi seng enekamloa saog taleba, khapto sekamlulom. 15 A'undi yanagna, “Yubu walingeri nimi ma'abahinep yubu ambarel pihinun,” aro yan wangana wero enekalulom. 16 A'un aisa malinge nenekori a'unag mal auk pog tagtag arop mal phiklamsiloa saog uro ulamsil. A'undi Yesusag wana paliro seneraglamlomne salero pelebel dalapmun andarina, auk pog tagtag arop mal neneko wa'epto sarangalapmundi, khapto sekamlulom. 17 A'undi usoghag babe mal kaunguro timbaneba kaulbaloa saog nena, “Yesusti nu taulbahiogti, pelepto taulbahilul,” senenne saelbapmundi, a'undi usoghag kalul dalamsut. Allah Yameri a'un mal taloa saog karog tareamsilne nene, Allah Yubu aneko saelbamlulom.

18 Nia mangkina uro yabiropne sembe Allah Yameri senenne a'un wanaag tarelamsilne pere agha sop-sop Allahag molona mololamlulom. “Allahag molona molbaukap,” aro sop-sop haing whi uro yae wapmundi, papna koma Allah elmabo wepsirop nimi ni sembe sop-sop molona molbarelamsululom. 19 Na sembe babe molona molbarelamnumun andarina, “Nari yubu lemnun,” aro si a'alamne abeneko pere Allahri yubu ambarelamnelenge sunsunum uro Allah yubu walinge punag tognoro wamog yubu neneko log kom uro lag phoro ambarelamsinun. 20 Allahri nanag, “Yubu walinge neneko ambarel phululam,” aro pogneogpa, yubu ambarelamsinne sembe nimiri na salero haing sae kaupto kop aeag tobongkimneong. Ane sembe Allahag molona na sembe molbarelamnumun andarina, Allahri nanag, “Ambarel phululam,” seogne sunsunum uro log kom uro lag phoro ambarelamsinun.

Komopto kipsirop yubu pibogha

21-22 Nungkae wanaagne Tikhikus poneko a'unag poghol alamna. El poneko nu Saelba Uhiropneap ma'ap tangtopne wamlari, sol wali, wali uro nu Saelba Uhiropne sembe awe tolamla. Nari Tikhikus poneko a'unag poghol alamnangena, “Nu nhin wamapne sembe a'un el nembahileri, a'un wana mikip nembahilul,” aro poghol alamna. Ane sembe el poneko a'unag yaleri, na wamnangeap, sa'a-sa'a awe tolamnangeap a'unag ambatsilul.

23 Nangkabo, a'un Yesusag sikne aro wana palilamlomneag agha a'un mamun o'ona senel dalapmundi, wana aingniro ma'ap tangto wamlulom. Ma'ap tangto ua unneap, o'ona senehinneap, sik senenneap ni tanekona, Nuni Allahap, nu Saelba Uhiropne Yesus Kristusapti tarelamsirikneag agha a'unag tahiso aro a'un sembe molbarelamsin. 24 A'un nu Saelba Uhiropne Yesus Kristusag o'ona senelamlomne nene kom tan koma wamle tanena, Allahri a'un niag wana yororo walia uahile sembamna.

Abenda.