5
1-2 A'unna Allah elmabo eldi wanaag o'ona senelamsil nimi wamlom ane sembe,
Allahri nimi o'ona senelamsil saog uro a'undi babe o'ona senel dalapmundi ulamlulom.
Nuri samenag mali-malia ulamubunge sembe Allahri nu opsinep aghana,
Kristus ponekori nu o'ona senehinneag agha nu sembe lunuro,
“Nimiag ohinne kulukanepne nanag agha talul,”
aro Kristus ponekori eldamne Allah sembe paip taog.
Eldi nu o'ona senehinneag agha uaogne neneko Allah ulomag song wali uaog ane sembe,
ane saog uro a'undi babe o'ona senel dalapmundi ulamlulom.
3 A'un Allah elmabo wepsirop nimi wamlom ane sembe,
eldi mabori uanepneog sunsunum uro ul palamlulom.
Aghana salik-malik walep tangtopneap,
Allahri senenne semban koma sembenga kaluro paip tangka ul piropneap,
aboap sembe uropne niap,
ni undo unuropne a'un Allah elmabori ulapmun tanena,
sunsunum kom.
Ane sembe nimiri,
“Malia ulamlom,”
aro san tilibahiikagti,
a'un nimi agha nimi nhondi babe undo unulamseng kom.
4 A'un Allah elmabori yubu lemnepne sunsunum uro yubu lelamlulom.
Yubu malinge ali nenep tanep yubuap,
nimi whingag yubu lendepnange leropba,
ali nenehirop yubuap,
limiro lerop yubuap a'undi yubu lepseng kom.
A'undi mali yubu nene undo lelapmun tanena,
Allah elmabori yubu lemnepne sunsunum uro lerop kom.
A'undi yubu lelapmun nena,
ot wana walingeag agha Allah kiptop yubu leropne mo lelamlulom.
5 Nari yubu ambatnuahinne nene sembe a'undi el wamlom.
Allahap eldi wepto poghogne Kristus ponekoapti Saelba Ulamsirang nimi sembe,
Allahri maboag tatsilulne sunsunum uro tatsurukang.
Aghana nimi etneri kelabo nengabo salik-malik walep tangtop to,
Allahri senenne semban koma sembenga kaluro paip tangka ul pirop to,
ni aboap sembe ul pirop to,
tanena Allahri tatsinepne nimi enekoag talul kom.
Nimiri aboap sembe urop tanena,
Allah lilobi agha phia phalamloa saog uropne ulamla.
6 Sindi Allah yubu ingisapto mali-malia undo unurop nimi tanekoag Allahri waro opsinepne yanual.
Tam nene sembe nimiri a'unag yubu kamolange ambatsiropneag agha a'un ina selepne toman poa pihiikag aro yae paip tangkamlulom.
7 A'undi,
“Allahri sinag waro opsilenge nanag taleag,”
aro sinap sae tiptangto nelebahiseng kom.
8-9 Samenag a'un inibinneap ma'ap talumneag agha ul palamlum.
Agha wenena nu Saelba Uhiropne Yesusap ma'ap taomneag agha tibin wareroba wamlom.
Ane sembe malinge undo unurop nimi sae tiptan koma ot tibinneap ma'ap tangtop nimiri uanepneog sunsunum uro ul palamlulom.
A'un tibinneap ma'ap taom tanena,
kal wana mauro lag taloa saog uro walingeap,
wana porogneap,
sikneap a'unag mauro lag talul.
Ane sembe ot tibinneap ma'ap tangtop nimiri uanepneog sunsunum uro ul palamlulom.
10 Undo unulapmun tanena,
nu Saelba Uhiropne poneko wana yeng neneropne el nenep tangto lag nembalulom.
11 Sin inibinneap ma'ap tangtop nimiag walinge nhonne babe mauro lag tanep kom.
Ane sembe sindi,
“Uahabe,”
senenne sinap nhon sae tiptangto nelebahiseng kom.
Sinag nelebahin koma,
sindi inibinne ulamika tibin warero lag nembatsululom.
12 Sik lemnange,
sindi lilirobag sop-sop ulamangne neneko nimiri lag phoro lerop tanena,
nimi ali nenep tanep.
13-14 Aghana ot tibin wareropne mori nia mangkina lag nenelamla ane sembe,
tibinne warebale taneogna,
ni lilirobag wamlange lag talul.
Tam nene sembe nimiri yubu lelamangdi,
“An malamlam nimi puke!
A'un tebaom nimi kamag tahut!
Kristus ponekori an warebaghele!”
aro yubu lelamang.
15-16 Nari lemnange nenena,
wene wamap ko'o eneag wamang nimiri malia maikno ulamang ane sembe,
“Limituk uro ulamebeag,”
aro wali uro yae togtangto wamlulom.
A'unag pa'asea olog wamsileba,
wana hekahilneag agha walinge mo saelba ul palamlulom.
17 Ane sembe a'un limituk uro wamseng kom aghana,
ni wali uro seneraglapmundi,
“Nu Saelba Uhiropne wana yeng neneropne el talamukap,”
aro ulamlulom.
18 Mag yonge telapmunneri nenek saelbahileag aro maikno uro teheng kom.
Maikno uro terop tanena,
seneragna koma salik-malik ul pinep ane sembe,
undo unuaheng kom.
Ot a'undam nimi welapmundi,
“Allah Yame nanag teknero wamnelul,”
aro weamsut.
19 A'un mamun yubu ambatto lel dalapmundi,
sepna petap,
welmotap sipto nu Saelba Uhiropne poneko omekto seplapmunne abeneko pere wanaag agha seplamlulom.
20 Nia mangkina uro yabiropne sembe,
“Nu Saelba Uhiropne Yesus Kristus poneko si kekhaektop nimi wamapti,
naba Naniong,”
aro wana walingeag agha Nuni Allah kiplamlulom.
“Elkelap ela'angeap yubu ka'eptangto wamlulom,” aro ambatsiogha
21 Nangkabo,
a'undi Kristus kiplamlomneag agha andamne paliag neneptan koma yubu ka'eptangkamlulom.
22-24 Nanin yabo,
a'un kelabo nengabori toamsiang kelabo wamlom tanena,
a'una'ange yabo a'ero-a'ero kiplamsimundi,
yubu ka'elamlulom.
Nengabori elkel torop tanena,
kelabo eneko sembe ela'ange usog tangtop.
Ela'ange kelabo eneko sembe usog tangtop aghana,
nu Kristusap ma'ap tangto winil dalamap nimi sembe,
Kristus ponekori nu talulamsildi,
nu eldi nong nembahiogti,
nu sembe usog taog.
Nu Saelba Uhiropne Kristus nu sembe usog taog saog uro ela'ange kelabo eneko sembe usog tangtop.
Ane sembe nu ma'ap tangto winil dalamap nimiri Kristusti yubu ka'ero kiplamap saog uro,
a'un kelabori babe a'una'angeri yubu ni ka'ero kiplamlulom.
25 Nangkabo,
a'un kelabo toamsilom nang wamlom tanena,
a'undi kelabo o'ona senelamsululom.
Kristus ponekori elap ma'ap tangto winip tangtop nimi o'ona senelamsildi,
“Sin taulbahinun,”
aro eldamne tatsiog.
Ane saog uro a'un nengabori kelabo toamsilom kelabo undo o'ona senelamsululom.
26 Kristusti eldamne nong tatsiogne nenekona,
“Sindi nanap ma'ap tangtopne sembe lag phoro yubu leropne pere agha,
mag a'elbahiloa saog uro wali nembahineba,
nari walia urop nimi o'omne taukang,”
aro eldamne nong nu sembe tatsiog.
27 Undo unuaog nena,
elba eldi,
“Nanap ma'ap tangto winip tangtop nimiri na sembe mo kopto sol wali uro ot walinge agha ulamikpa,
nimiri sinag tam pimna koma wamukang.
Na whingag sin poa yahine sum eneko,
sinna nengabori tomnep kelabo halo sen koma malinge nhon lag tangtop komdi,
ot saren kemerop kelabo saog wamika ililamsineri topsunun,”
aro eldamne nu sembe nong tatsiog.
28-29 Nu sembe nong tatsiog ane sembe,
a'un nengabori kelabo toamsilom nangdi ulamnepneog wamlangena,
Kristus ponekori elag wana paliro winip tangtop nimi o'ona senelamsil saog uro a'undi kelabo o'ona senelamsululom.
Tam nene sembe seneraglamsut.
Nimi nhondi babe eldamne nong karong aro lip tangtop kom aghana,
el nong wali tanepne sembe kwaneng teropti,
eldamne o'optanep.
A'undam nimi nong o'ona senel dalamlom saog uro,
a'undi kelabo babe o'ona senelamsululom.
Nimi etneri eldi kel o'ona senelamla tanena,
nimi enekori eldamne babe o'ona seneptangkamla.
Undo lemnange nene tam nene sembe lemnuan.
30 Nu babe Kristus nongag tangtop nimi wamap ane sembe,
Kristus ponekori nu elap ma'ap tangto winip tangtop nimi o'olamsil.
31 Tam nene sembe Allahri yubu lebog nena,
“Nengabori sikini sikinin laplobi agha,
ela'angeap elkelap ma'ap tarikneag agha sin nong nhon,
sop nhon nenep tangtop,”
seog.a
32 Seogne nenena,
Kristus ponekoap ma'ap tangto winip tangtop nimiap sembe babe tognoro likiptopne nubunge lebog.
33 Ot neneag agha,
a'undi kelabo tohirop nang niri andamne o'ona seneptangkamlam saog uro a'undi kelabo o'ona senelamsululom.
Apna a'un kelabori a'una'ange yabo kiplamsululom.