2
Nari nubu uro a'un sembe whin seklero tolamnange el tahom senelamnari ambatsin.
A'un mo sembe tolamna kom aghana,
Laodikia nimi sembe babe,
na whing ilinerop kom nimi ni sembe babe nari whin seklero tolamnange sembe el tahom senelamna.
2 Nari nimi ni sembe whin seklero tolamna andarina,
sin o'ona senel dalamangneag agha ma'ap tangto wana mikip taheng.
Allah yubu Kristus poneko sembe tognoro wamog aghana,
nimiri el taheng tanena,
yubu nenekori nimi wali nenero tup nembahinep.
Ane sembe,
“Allah yubu Kristus poneko sembe samenag tognoro wamog yubu eneko to'opto seneraglamsengdi,
sik tapto el taheng,”
aro whin seklero tolamna.
3 Nimi el nembahinepneap,
wana hekahinepneap taneko nimi tup nembahineba saog wamlange ni ot Kristus ponekoag maikno uro tognoro pibog.
4 Nari undo a'un ambarelamsin nena,
nimi nhondi babe yubu lilim walinge lelamikneag agha,
“A'un wana toro sikne agha kilbahiikag,”
aro el nenelamsin.
5 Nanap a'unap nikag wamap komdi,
weag wamap aghana,
wanaag nikag wamap.
Nari a'un sembe ka'ebahinori,
awi wamnel nena,
a'un wana seneragna nhonog uro wamlomdi,
Kristus ponekoag sikne aro wana palilamlomdi,
khapto seneraglamlomne sembe wana awi uro wamna.
Kristusap ma'ap tangto kamag ua uropne sembe ambatsiogha
6-7 Nangkabo,
a'undi nu Saelba Uhiropne Yesus Kristus yubu salero elag wana palilamlom saog uro nen tipto elap ma'ap tangto ul palamlulom.
Elap nhon ma'ap tangkamlomne yareng so'oag pelengero mep tangkamloa saog talamlomne agha,
elag pongkapmundi sekamlulom.
Yesus yubu a'unag ambarelamsiang yubu sik senelamlomne nen mikip talamsileba,
a'undi wanaag,
“Naba naniong,”
aro kiplapmunne magti siriro la'inirop saog uro a'undi wanaag agha la'imbalul.
Undo unulapmundi,
elap ma'ap tangto ul palamlulom.
8 A'un wali uro yae togtangkamlulom.
Mog so'oag nimiri ambarelamsiang yubuna,
nimiri ul palamangneap mog so'oag nimiri ukuma pharopneap sunsunum uro seneraglamangdi,
ina selepne toman pabihirop yubu kamolange ambarelamsiang.
Sindi undo ambarelamsiang yubu enena,
Kristus senenne agha ambarelamsiang kom aghana,
mog so'oag nimiri senenne agha ambarelamsiang.
Sindi ambarelamsiang yubu nene sembe a'unna,
“Nari wana kiliro poa pineikag,”
aro yae togtangkamlulom.
9 Kristus senenne agha saelba ul palamlulom sen nena,
nia Allahag yame mikipneap,
wana seneragnaap ni wamlange neneko Kristus nu nimi nong saog taogne ponekoag to'opto ua ulamla.
10 A'un babe Kristusap ma'ap tangto wamlom ane sembe,
a'un wanaag teko uahinepne babe ni to'opto tatsiori tarelamsil.
Elna mema niri so'oag nimi saelbamsiangdi,
mikip wamangne aneko ni sembe,
el agha paliagne wamlari,
ni sembe usog wamla.
11 A'un Kristusap ma'ap tangkamlomne sembe a'un kon kareptop nimi saog taom.
Ot a'un kon kareptop nimi wamlom nena,
nimi saeri a'un kere kon karebahiong kom aghana,
a'unna Kristus ponekoap ma'ap tangkamlomne sembe Kristus el mori a'un wanaag,
“Nong yeng neneropne mo uahane,”
senenne kwiripto toboghatsiog.
12 A'un Kristusap ma'ap tangkamlumba,
maghag pelengelamsiek sum eneko a'un Kristusap nhon tebalumba,
so'oag siksilonga saog uro maghag pelengelamsiek.
Kristus tebaog aghana,
Allahri kamag nembaog saog uro a'undi Allahag,
“El mikipneri kamag nembahilul,”
aro seneragto wana palilamlomne pere agha Allahri a'un babe,
“Wene Kristusap nhon ua ulamukang,”
aro kamag nembahiog.
13 Allahri kamag nembahiog nena,
a'undi samenag Allah yubu ingisaplamlumdi,
nengabo kon kareban koma elap ma'ap talum komdina,
nimi teptop nimi saog wamlum.
Undo wamlum aghana,
wene Kristusap ma'al dalamapne sembe,
nuri samenag Allah yubu ingisapto malia ulamubunge Allahri tam kom nenero wailag pibog.
Wailag pibogti,
a'un Kristusap nhon kamag nembahiog.
14 Allahri aruksirop yubu ingisaplamuburi,
nuri malia ulamubunge neneko sembe,
“Tam ikinne undo-undo a'unag timbanep,”
aro mome toro palilamlonga saog taog.
“A'unag timbanepne undo-undo,”
aro mome toro pairopne wamog aghana,
siptop kalag oro siplamekne abeneko pere mome toro pairopne nunag tam timbanepne neneko kom nembaog.
15 Kristus kalag oro siplamekne abeneko pere,
Allahri mema mikiba ni luknubahiog.
Mema mikibari so'oag nimi saelbamsiangdi,
mikip wamangne aneko ni Kristus kalag siptopne pere agha Allahri luknubahiog.
Luknubahiogti sinag mikipne wamsiogne kwiriplopsiogti,
nimi whingag,
“Luknubahindi paliagne wamna,”
aro lag nembatsiog.
16 Undo uro yabiog ane sembe,
a'undi kwaneng mag tero uropne sembe nimiri samenag aruksirop yubu nene kiliro,
“Ane teheng kom,”
aro nimiri a'unag tam pelengero karebatsinep kom.
Apna Sabat sum uanepne sembe to,
wal wendogne kwelekanep sum seneragtopne sembe to,
hengkun taibuka taubuka ulamogha Yahudi nimiri sani yorop sum sembe to,
nimiri a'unag,
“Undo-undo ulamlulom,”
aro tam pelengero karebatsinep kom.
17 “Undo-undo ulamlulom,”
aro aruksirop yubu nene tam o'omne kom aghana,
ot amik yanepne poneko nong yame sunumna saog wamla.
Samenag Kristus anam mog so'oag yan komag Allahri aruksirop yubu Musaag ambarog aghana,
yubu ene lomag o'omnena,
amik Kristus poneko mog so'oag yanepne sembe lebog.
18-19 Kristus poneko el usogne,
paliag uropne wamla aghana,
nimi nhon-nhon a'ep tangom agha usogne poneko lilobong.
Sin nimi taneko sindam nimi wanaag,
“Paliagne wamna,”
senelamang aghana,
nimi whingag wana mombolag nenep tangto ulamloa saog ulamangdi,
polanne ililamangne sembe nimiag ambarelamsiang.
Sin nimi tanekori imagnang malaikatag phalamangdi,
yubu kiki telekto,
“Undo-undo uro yabioba imno,”
aro nimi ambarelamsiang.
Sin nimi tanekori a'unag tam pelengero,
“Nuringe nelepto ulamlulom,”
alamik tanena,
a'undi sin yubu ka'ebahiseng kom.
Sin undo saog nimi usogne paliagne poneko lilobi agha a'ep taong.
A'ep taong aghana,
nimi yo'o kopkobap,
yo'o luluagneap tiptangkamsori,
usogap tiptangkamso taneogna,
nimi nong mikip wamsoba,
Allahri nubu nenelamsiso.
20-21 A'un Kristus ponekoap ma'ap tangto elap nhon tebalum tanena,
mog so'oag nimiri ukuma pharopne liloplum.
Mog so'oag nimiri ukuma pharopneag agha,
“Ane teheng kom!
Ane po'obaheng kom!
Ane sae saelbaheng kom!”
aro nimi aruklamsiang.
Mog so'oag nimiri ukuma pharopne liloplum kom te?
A'un Kristusap nhon tebalumdi,
mog so'oag nimiri ukuma pharopne liloplum tanena,
sa'a sembe aruksirop yubu nene saelba ul palamlom?
Undo unuaheng kom!
22 Ni aruksirop yubu ene nimiri,
“Saelbaheng kom,
teheng kom!”
aro amolamsiang yubu eneko,
nimiri amohinne mo wamla.
Aghana nimiri salero terop tanena,
salero teroba aneko orog tanep.
Nia ane ya'ag uropne kom.
23 “Saelbaheng kom,
teheng kom,”
aro aruksirop yubu ene nimiri ka'enag wana heksirop yubu sembanep.
Yubu ene ka'ebiag agha nimiri wana mombolag nenep tangto ulamloa saog ulamangdi,
sindam nimi nong iriktangto,
“Seklenne neneri malinge na wanaag wamlange wa'epto naghi agha lambalul,”
aro wanaag agha mema phalamang.
Sindi undo mema phalamangne kembiag agha ora nimiri,
“Wana heksirop yubu saelba ul palamang,”
sembanep aghana,
aruksirop yubu neneri nimi wanaag,
“Bobonge agto yaboho,”
senenne kom nembanep kom.
Ane sembe,
aruksirop yubu eneri nimi yepsirop kom.