Kolose 3

A'un Kristusap nhon ma'ap talumdi, tebalumne agha Allahri elap nhon a'un kamag nembahiog. Kristus poneko kamag taogti, Allah sae sirik sip pulingkiog. Elap nhon ma'ap tangto kamag talum ane sembe, el paliag sip pukamlange ponekori seneropne agha ero seneraglamlulom. 2-3 A'un samenag tebalumdi, nen kamag talumne Kristusap nhon ma'ap tangto kamag talum. A'un wene Allah whingag kamag wamlom nena, Kristusag wali uro tognoro pipsiog. Ane sembe mog so'oag uropne sembe seneragna koma ot alikinag imag wamlange aghabog ero seneraglamlulom. 4 A'un kamag wamlom nena, ot Kristus poneko agha wamla. El nen lag tale sum eneko a'un babe imang wareropne toman agha elap nhon lag talulom.

5 Ane sembe mog so'oag nimiri seneragto uropne a'undam nimiag agha kom nembalulom. Mog so'oag nimiri seneragto ul piropne nenena, kelabo nengabo top tangkamna koma salik-malik teklop tangtopneap, Allahri senenne semban koma sembenga kaluro paip tangka ul piropneap, wanaag bobonge walel ananba agto yaboho seneropneap, nimiag yoaba uahane seneropneap, aboap sembe uropneap, ni ane kom nembalulom. Nimiri aboap sembe urop tanena, nimiri Allah wailag nenelobi agha mema phalamlonga saog uropne ulamla. 6 Nimiri undo seneragto ul piropneri Allah wana yo nenelamlaba, “Opsinun,” aro yanual. 7 Samen a'un wamlumag babe a'undi mog so'oag nimiri, “Malia uahane,” senenne agha undo ul palamlum. 8 Undo ul palamlum aghana, wene ul palamlumne neneko lilobi agha wail ibarelamlulom. Wana yo senenneap, nimi wahinneap, yongeap, nimi san tilibahinneap, apna yubu pamag agha malinge leropneap ni aneko lilobi agha wail ibarelamlulom. 9-10 A'un samenag wanaag seneragto ulamlumne kwiripto lipsiomdi, nimi wendogne, seneragna wendogne saelba ul pirop nimi wamlom. A'un nimi wendogne nenelamsilne ponekori senenne el talamlomdi, a'un sumbahiogne ponekori wana seneragna sunsunum uro nimi wendogne talamlom. Ane sembe, orolenange lemna koma yubu sikne agha ambarel dalamlulom. 11 A'un nimi wendogne nembahiog ane sembe wene, “El Yahudinge, el Yunaninge, el nimi sisa orange,” aro nhon paliag nenero a'eptangto wamap senel dalamseng kom. “El kon kareptopne, el kon kareptop komne,” aro a'eptangto wamap senel dalamseng kom. Nimi sisa aghabog kom aghana, mo sektop nimi anabi, nimiri arukna nenerop nimi anabiag nhon paliag nenero a'eptangto wamap senel dalamseng kom. Kristus poneko mo o'omne wamlaba, elag sikne aro seneragtop nimi ni Kristusap ma'ap tangtop nimi wamlom.

12 Allahri a'un, “Naringe taukang,” aro wepsiogpa, elmabo taomba, “Nari wana,” aro a'un o'ona senelamsil. Ane sembe a'undam nimi wanaag kalup tangka ulamlulom nena, yareag senel dalapmundi, wana walingeag agha wana mombolag nenel dalapmundi, nimiag win-win aro wana pailingkina ulamsululom. 13 A'unkaboag tam nhon wamleba, “Nungkaboag yubu arikal uro yubu lebebeag,” aro wana mamleba, a'un mamun tam wailag nenel dalamlulom. Nu Saelba Uhiropne ponekori a'undi malia ulamomne babe wailag nembarelamsil. Ane saog uro a'undi babe a'unkaboag wana mali senehinne wailag nenel dalamlulom. 14 Nari yubu ambatsinne nene sunsunum uro ul palapmundi, paliag sirik nena o'ona senel dalamlulom. Nari yubu ambatsinne orange babe ni o'ona senehinne neneag tiptangkamla. Sik uro o'ona senel dalapmun tanena, nari yubu ambatsinne orange babe wali uro komopto uililamlulom tiog.

15 A'undi, “Uahabe,” aro tam karepto ulamlulom nena, Kristus ponekori a'undi wanaag aingnilamsilneag agha tam kareplapmundi ulamlulom. Kristus ponekori a'undi wanaag aingnilamsil nena, “A'un Kristusap ma'ap tangto nong nhonog uro wamlulom,” aro Allahri a'un yoplamsilba, aingniro wamlulom. Aingniro wapmundi, “Naba Naniong” aro yeng uro Allah kiplamlulom. 16 A'un wamlulom nena, Kristus ponekori ambatsirop yubu walinge a'un wanaag to'opto seneraglapmundi, sunsunum uro wanaag agha saelba ul palamlulom. Wana hektopneag agha a'un mamun wenel dalapmundi, amoro ambarel dalapmundi, sepna petap, welmotap sipto Allah omekto seplapmunne abeneko pere, “Naba Naniong,” aro wanaag agha kiplamlulom. 17 Nia mangkina a'undi ul palapmundi, saeri unne babe, pamag agha yubu lenne babe nia aneko, “Nu Saelba Uhiropne Yesus poneko si nubu talul,” aro ul palamlulom. “Yesus si nubu talul,” aro ul palapmundi, Yesus pere agha Nuni Allahag, “Naba Naniong,” aro kiplamlulom.

Ae lom nhonag nimi mamun ul dalamnepne sembe ambatsiogha

18 Nanin yabo, a'un kelabo nengabori toamsiang kelabo wamlom tanena, a'una'ange yabo a'ero-a'ero kiplamsimundi, yubu ka'elamlulom. Nu Saelba Uhiropne Yesusap ma'ap tangtop nimi sembe, a'un kelabori a'una'ange kipto el yubu ka'elapmunne mo sunsunum wamla.

19 Nani yabo, a'un kelabo toamsilom nang wamlom tanena, a'undi kelaboag wana yonge pimna koma o'ona sembamsimundi, sinag arikala lepseng kom.

20 A'un kelmabo me wamlom tanena, a'uni a'unindi yubu ka'eamsimundi, sunsunum uro ulamlulom. Undo unulapmunne agha nu Saelba Uhiropne poneko wana yeng sirik nenelamlulom. Ane sembe, a'uni a'unindi yubu ni wali uro ka'eamsululom.

21 Nangkabo, a'undi kelmabo me wamangba, a'un sikini yabo wamlom tanena, a'un maboag wana yo nenehiropne lero ulamsiseng kom. A'undi sinag wana yo nenero uahimun tanena, a'un mabo wanaag, “Sololamna,” senenne agha sol malinge lolbahinep.

22-23 Nangkabo, a'un mog so'oag nimi arukna wamlom tanena, a'uni yabori a'unag, “Undo-undo ualulom,” aro aruksirop yubu ni ka'eamsululom. Sindi a'unag aruksirop yubu sunsunum uro ulapmunne, “Imneikti wali sembanukang,” aro ulamseng kom. A'undi nia mangkina ulapmunneag agha, “Mog so'oag nimi sembe mo awe tolamna,” sembaheng kom. A'undi seneraglapmundi ulamlulom nena, “Imagne na Saelba Uneropne poneko sembe tolamnange saog uro awe tolamneba, el wana yeng nembanun,” aro nong ningkiri wanaag agha sol wali, wali uro awe tolamlulom. 24 Undo a'un arukna wamlom nimiri a'uni yabori awe tolapmunne pere, “Imagne nu Saelba Uhiropne ponekori elmaboag kamna tatsiroba nanag babe tatnelul,” aro el wapmundi, sol wali uro awe tolamlulom. A'un Saelba Uhiropne Kristus poneko a'uni wamlaba, el arukna wamlomdi, awe tolamlulom. 25 Nu Saelba Uhiropneri lunuro tatsinepne, “Nimi nubunge to, ologne to,” semban koma lunuro tatsilul. Nimi etneri malia ulamle tanena, mali uropne enekoag taongoro malinge timbalul ane sembe, Kristus poneko sembe sol wali uro awe tolamlulom.