4
Nangkabo,
a'un nimi arukna sikini yabo wamlom tanena ka'eamlulom.
El uro wamlom nena,
a'un Saelba Uhiropne imagne babe wamla.
Ane sembe sikini yabo taom nimiri a'undi arukna wamangne sembe sikne porogne agha sinag ulamsululom.
Nen ma'aro, “Undo-undo ulamlulom,” aro ambatsiogha
2 A'undi sol wali,
wali uro Allahag molona mololapmundi,
yae togtangto wapmundi,
wanaag agha,
“Naba Naniong,”
aro Allah kiplamlulom.
3 Nu sembe babe molona Allahag molbarelamsimun andarina,
Allahri nu sembe ina pa'abatsileba,
Kristus yubu samen tognoro wamog yubu nene nuri nimiag ambatto tongolamsukap.
Kristus ponekori yubu sabo nenero ambarelamsinonge sembe nimiri na salero kop aeag tobongkipneongba wamna.
4 Na sembe Allahag molona molbarelamnumun andarina,
nari Kristus yubu ambatsiropne nene Allahri samenag nari saeag,
“Ambatsululam,”
aro pibogne sunsunum uro tibin uro ambarelamsinun.
5 A'un babe Yesusag sikne aro seneragtop nimi wamlom aghana,
elag seneragtop kom nimi nikag wapmun tanena,
pa'asea sum enekoag wana hektopneag agha yubu lero walia ulamsululom.
6 A'undi sop-sop yubu pamag agha lanalamlenge wana walingeag agha emem arop yubu agha lelamlulom.
Undo unulapmunne agha nimiri a'unag hailamsiikpa,
ka'elapmundi nimi a'ero-a'ero samoro ambarelamsimundi,
“Yubu huropneag agha ambatsisene,”
aro a'unag el tahilul.
Paulusti komoptobag nimi kipsiropne mome toro pibogha
7 Nungkae wanaagne Tikhikus ponekori nanag nia ni uro yabalamlange a'unag ambatsilul.
El sol wali,
wali uro yeplamsildi,
nu Saelba Uhiropneri awe nunap nhon awe toropne wamla.
8 Nungkae Tikhikus poneko a'unag poghol alamnange a'unag yaleba,
nu wamapne sembe eldi a'un ambatsileba,
a'un wana mikip nembahilul.
9 Onesimus babe Tikhikusap nikag yarukang nena,
elna a'undi asagne poneko yalul.
Eldi babe sol wali uro ulamlaba,
a'unag poglamnaba,
nungkae Onesimus Yesusag wana paliropne o'ona senelamapne poneko babe a'unag yalul.
El Tikhikusap yarikti,
na wamnaag ane sa'a-sa'a uro yabalamlange sembe a'un ambatsurukang.
10 Aristarkhus,
el babe kop aeag nanap nikag wamnamne ponekori a'un sembe,
“Nangkabo,”
aro kiplamsil.
Barnabas elnik Markus ponekori babe a'un kiplamsil.
Markus poneko sembe samenag ambatsino yubu sunsunum uro,
el a'unag yaleba,
wali kipto toplulom.
11 Yustus,
si nhon Yesus ponekori babe a'un kiplamsil.
Ot sin taneko mo Yahudi nimi kon kareptop nimi agha nanap wamapti,
Allahri mog so'oag nimi saelba uhiroba sembe awe nikne toro yubu ambatto tongolamsiap.
Sin nimi tanekori wana mikip nenero yeplamneang.
12 Epafras a'undi asagne ponekori babe a'un kiplamsil.
El babe Kristus Yesus arukna wamlari,
awe tolamla.
Eldi a'un sembe sop-sop wana ningkiag agha Allahag molona molbarelamsil andarina,
Allahri a'un sembe,
“Ulamukang” senenne sunsunum uro to'opto seneraglamlulom.
Allahri senenne sunsunum uro to'opto wana khapto seneraglapmundi,
wana whi uro wapmundi,
ni salero ul palamlulom aro a'un sembe molbarelamsil.
13 Sikne agha lemna.
Epafras poneko nari haingdi imnori sikne lag nenero ambarelamsin nena,
eldi a'un Kolose nimiap,
Laodikia nimiap,
Hierapolis nimiap sembe awe mikip uro tolamlange imnori ambarelamsin.
14 Apna nimi whesiropne nuri wanaagne Lukas ponekori babe,
Demasti babe a'un sembe kiplamsirang.
15 Nungkabo Yesusag wana palirop nimi as Laodikia wamang nimi kiplamsiapne ambatsululom.
Apna Nimfa babe,
eldi aeag Yesusag wana palirop nimi winil dalamang nimi babe kiplamsiap yubu ene ambatsululom.
16 Mome ane a'unag yaleba,
nimiri a'un sembe,
“Ka'ebaukang,”
aro mome kemero lelamikpa ka'elamlulom.
Ka'elapmun tanena,
mome ane Yesusag wana paliro winil dalamang nimi as Laodikia wamang nimiag babe,
“Mome lilim wamlange ka'ebaukang,”
aro tiplamlulom.
Mome Laodikia nimiag pimnonge babe a'unag tipto ambatsiikpa,
mome lilim sinag pimnonge babe a'undi ka'ebalulom.
17 Arkhipus ponekoag ambarelamlulom yubuna,
“Nu Saelba Uhiropne ponekori awe an sa'oag pipkeonge ni sunsunum uro wali uro yae paiapmendi,
komopto awe tolamlulam,”
aro elag ambatlulom.
18 Na Paulusti a'un kiplamsin.
Yubu abene palilognange,
na Paulusti kipsiropne abene mo saeri toro palilamna.
Na anam kop aeag wamnange ekon taheng kom.
“Nu Saelba Uhiropne ponekori wana a'unag yorolamsileri,
yepto paiamsilul,”
aro a'un sembe molbarelamsin.
Abenda.