Tesalonika
Nimi Sembe
Paulusti Mome Toro Pibogha Selekne
Paulusti Tesalonika nimi kipsiogha
1
Nangkabo!
A'un Nuni Allahap nu Saelba Uhiropne Yesus Kristusap ma'ap tangtop nimi as Tesalonika winil dalamlom nimi sembe mome toro palilamap.
Nu Paulusap Silwanusapa Timotiusapti a'un kiplamsiap.
“Allahri a'unag wana yororo walia ulamsileri,
a'un wana aingnilamsilul,”
senelamapti a'un sembe molbarelamsiap.
Tesalonika nimiri Yesusag sikne aro wana palilamekne sembe yubu sabo tangto piogha
2 Nuri a'un nhin sembe Allahag,
“Naba naniong,”
aro kiplamapti,
a'un ekon tan koma sop-sop a'un sembe Allahag lero molona molbarelamsiap.
3 A'undi Yesusag sikne aro wana palilamlomneag agha wali-walia ulamlomne sembe babe,
a'undi o'ona senehinneag agha yepto ulamlomne sembe babe,
nu Saelba Uhiropne Yesus Kristusag tiro nang-nangaro wamlomneag agha wana khapto ulamlomne sembe babe,
nuri sop-sop a'un sembe seneragha ulamsiap.
Ekon tan koma seneragha ulamsiapti,
molona a'un sembe Nuni Allah whingag molbarelamsiap.
4 Nangkabo,
a'un sembe nu el wamap nena,
Allahri a'un sembe o'ona senelamsiogti,
wepsiog andarina,
eldamneringe taom.
5 Nunna,
“Allahri sik uro a'un wepsiog,”
aro el wamap nena,
nuri a'unag Allah yubu walinge Yesus sembe ambarelamsiap yubuna,
yubu leropne toman mo ambarelamsiap kom aghana,
wanaag to'opto sik senelamapti,
Allah Eldamne Yame Walingeri mikipne nu pere agha ulamlange toman ambarelamsiap.
El Yame Walingeri mikipne nu pere agha ulamog ane sembe,
Allahri a'un sik uro wepsiog aro el wamap.
Nu a'un anabiag wamobori,
a'un sembe ulamobonge a'un ni el wamlom.
6 A'undi babe nuri ulamobonge ipsiomdi,
nelepto ulamlom.
Nuri ulamobongeap,
nu Saelba Uhiropne ponekori ulamogneap saog uro a'undi nelepto ulamlom.
Seklenne a'unag lag talamlaba,
seklelamlom aghana,
Allah Eldamne Yame Walingeri a'un yeplamsioba,
Yesus yubu walinge ambarelamsiap yubu nene wana yeng uro a'undi salelamlom.
Wana yeng sirikne nene Allah Eldamne Yame Walingeri a'unag tarelamsil.
7 Wana yeng sirikne tarelamsilba,
a'un seklenneag Yesus yubu salelamlomne sembe,
Yesusag wana palirop nimi propinsi Makedonia wamang nimiap,
propinsi Akhaya wamang nimiapti a'un sembe ka'elamsiang.
Ka'elamsiangdi sindam nimiri,
“As Tesalonika nimiri ulamangne saog uro nuri babe nelepto ulamukap,”
senelamangdi ulamang.
8 A'undi unulamlomne yubu eneko Makedoniaap Akhayaap sabo tangto palamoa wene babe palamla.
Sabo tangto palamla yubu aneko abene aghabog kom.
A'undi wana paia seklero ulamlomneag agha yubu lilim lonceng ao ngelel aropba,
weag agha ka'erop saog uro nu Saelba Uhiropneri yubu sabo tangto piog.
Sabo tangto piogpa,
nimiri ka'elamangdi,
“Tesalonika nimiri Allahag sikne aro wana palilamang,”
alamangba yubu eneko nen tipto tala-tala sabo tangto piog.
Sabo tangto piogpa,
nuri tala-tala Yesus sembe ambatto tongolamsiboag nuri nimiag,
“Tesalonika nimiri ulamangne sembe ambatsukap,”
aro ambarelamsibo aghana,
“Ka'ebabo,”
alamong.
El wamang ane sembe,
nuri a'undi ulamlomne sembe nen yubu tipto ambatsisebe koma babe hae sembamap.
9 A'un sembe el wamang nena,
nu a'unag yabuba,
a'undi nu topsilumne sembe,
“Wali kipsiek,”
aro a'un sembe tala-tala nimiri yubu lelamang.
Yubu lelamang nena,
“Tesalonika nimiri mem phalamekne laplobi agha Allah ot nhonog wamlange ponekoag samoro yaek.
Allah kamag uropne sikne ponekoag samoro yaekti,
nimi yepsiro Allah omeklamang,”
aro a'un sembe yubu lelamang.
10 A'un Tesalonika nimiri sik senelamlomdi,
“Allahri Elme Yesus nimi teptobag agha kamag nembaogti,
imag agha kiliro tobogpa,
imag agha Yesus amik samoro yalul,”
aro a'undi nang-nangaro ulamlomne sembe babe nimiri yubu lelamang.
Nu mog so'oag nimiri mali-malia ulamapne sembe Allahri nu opsinep aghana,
Yesusti nu,
“Mog so'oag nimi pelebahinun,”
aro lunuro tebaogti,
kamag taogne ponekori nu peleplamsil.