Paulusti samenag as Tesalonika nimi ambatto yeplamsiogha
2
Nangkabo,
nuri Yesus sembe a'unag ambarel ahibunge,
wana mauban koma ambarel ahibu kom.
A'undam nimi el wamlom.a
2 Nu anam Tesalonika a'unag yan komag as Filipi wamububa,
san tiliplamsiekpa seklero wamubunge sembe a'un el wamlom.b
Nimi maiknori nu san tilipto iriklamsiek aghana,
Nuni Allahri nu wanaag log kom nembahiog.
Log kom nembahiogpa,
Allah yubu walinge Yesus sembe a'unag ambarel ahibu.c
3 Nuri a'un wenero ambarelamsibunge,
ogtopne agha kom.
Apna Allahri senenne semban koma,
“Nimiri saeagha walinge topsukap,”
aro mane yubu agha orolenange ambarelamsibu kom.
4 Nuri ambarelamsibunge,
“Nimiri nundam nimi sembe wana wali sembahukang,”
aro ambarelamsibu kom.
Allahri nu mipto sik sembamsiogti,
“Yesus yubu walinge ambatto poa sabo nembaukang,”
aro nuri saeag pibogpa ambarelamsibu.
Ane sembe nuri ambarelamsibunge,
“Allah nu wanaag miplamsilne wana yeng sembahilul,”
aro ambarelamsibu.
5 A'un babe el wamlom.
Nuri pamag agha,
“Nimiri wana topsukap,”
aro emem arop yubu lerop kom.
Apna nuri aboaba sembe tognoro nhon lenne babe orog.
Allah nun ipsiogne wamla.
6 Nuri ulamubungena,
a'undi babe,
ora nimiri babe,
“Nu kibiang towalengkipsukang,”
aro ero ulamubu kom.
Allahri wepto poghogne Kristus ponekori nu wepto pogsiogti,
nunag mikipne tatsiog.
Mikipne nunag tatsiog ane sembe nunag kwema ulamsoba,
nuri a'unag,
“Tatsiseng,”
aro molbahinep.
Aghana a'unag molbahibu komne a'un el wamlom.
7 A'unag molbahinep aghana,
nu a'un anabiag wamubunge ilindi elme win-wina paia uropne saog uro paiamsibu.
8 Nu a'unap nhon wamuburi,
Allah yubu walinge pamag aghabog ambarelamsibu kom.
Pamag agha mo ambarelamsibu kom aghana,
a'un sembe o'ona senehinne loloro wamogpa,
nu nong ningkiri wanaag agha,
“Yepsukap,”
aro a'un sembe ulamuburi ambarelamsibu.
9 Nangkabo,
nu whin seklero ulamubunge nene sembe a'un nhin el wamlom.
Allah yubu walinge a'un ambarelamsibunge,
“A'un nimi nhonag babe nu sembe saeagha seneragsukang kom,”
aro sinag kweleknag whin seklero ulamubunge a'un el wamlom.
10 A'un Yesusag sikne aro wana palilamlom nimi anabiag wamububa,
a'undi haingdi babe iamsilumba,
Allahri babe nu iamsiogpa ulamubu.
A'un anabiag wamuburi,
“Allahri,
‘Ulamukang,’
senenne mo sunsunum uro ulamukap,”
senelamuburi wana porogneag agha a'unag ulamsibu.
Ane sembe nimi nhondi babe nuri a'un anabiag wamuburi,
ulamubunge sembe,
“Mali-malia undo-undo ulamek,”
aro nunag tam pimnep kom wamog.
11-12 Nuri ulamubunge el uro wamlom nena,
iliri elme ologne agha yubu wenerop saog uro nuri a'un nimi a'ero-a'ero wenero ambarelamsiburi,
wana aingnilamsibu.
A'unag sikne lag nenero ambarelamsiburi,
“Allahri a'un yoplamsil nena,
‘A'un nari saelba uhiroba wa'imundi,
nadamne imang wareropne ua urobag nikag wamukap,’
aro yopsiog.
Ane sembe eldi a'un yopsiogne sunsunum uro ul palamlulom,”
aro ambarelamsibunge el uro wamlom.
13 Nen tam nhon wamlange uro yabiogne sembe sop-sop,
“Naba naniong,”
aro Allah kiplamap.
Tam neneko uro yabiog nena,
nuri Allah yubu a'unag ambarelamsibuba a'undi,
“Nimiri yubu mo,”
semban koma lipsiom kom.
Nuri yubu ambarelamsibunge neneko ka'ebalumdi,
“Sik uro Allahri yubu ambarelamsiang,”
aro seneraglamlumdi salero toplum.
Allah yubu enekori a'un Yesusag wana palirop nimiri wanaag awe tolamla.
14 Nangkabo,
a'un wene wamlom saog uro Yahudi nimi mog so'o Yudea wamek nimi agha nen nimiri Yesus Kristusag wana paliro elap ma'ap taekpa,
nen nimiri Yesusag sikne aro seneraglamek kom.
Yahudi nimi agha elag seneraglamek kom nimi tanekori Allah elmabo Kristusap ma'ap tangto winil dalamek nimi tanekoag samenag malia ulamsiek saog uro a'un Tesalonika nimiag babe a'un sisa nik nimiri malia ulamsiongba seklelamom.
15 Yahudi nimiri sin Yudea nimi malia ulamsiek nimi tanekori nu Saelba Uhiropne Yesus ya'ag obekti,
Allah yubu silimu tiptop nang babe ya'ag olamsiekti,
nu babe,
“Seklelamukang,”
aro olamsiek.
Sindi nimi ni sembe aisa nenelamsiekpa,
sin sembe Allahri babe karong senelamsil.
16 Nimi ni aisa nenelamsiek nena,
nuri Yahudi sisa kom nimiag,
“Yesusti a'un taulbahilul,”
aro yubu poa ambatsinepne babe iriklamsiek.
Sindi undo ununa aghabog ulamsiekti,
Yesus yubu ambatsinne iriklamsiek ane sembe,
sin Yahudi nimiri malia ulamsiekne neneko leng-lenga langaro walelaori teknebaoba,
wene Allahri sinag tam ikinne pelengenne aghabog wamla.
Paulusti wanaag agha, “Tesalonika nimi nen kemel pihinun,” sembaogha
17 Nangkabo,
a'un sembe,
“A'ep tahabe kom,”
senelamsiap aghana,
nimiri nunag malia ulamsiekne sembe nu sesog saog uro a'un laplobi agha yahiburi,
haingdi ipsinep kom saog wamla.
Haingdi ipsinep kom aghana,
a'un sembe ekon tan koma wana to'opto o'ona senelamsiap.
“Nu a'un wamlomag yaberi kemelahukap,”
senelamobonge nu wanaag nubu uro lolol dalamori,
nebom alamsioba,
otsik sol wali uro sunulamobo.
18 Nuri a'un kemelahukap sembabo.
Na Paulus nadamneri,
ik phende wilindi,
“Na yanun,”
sembanori sumbano aghana,
phia sikini nubunge nenekori nu ina irikahio.
19 A'un sik uro,
“Kemelahukap,”
senelamap nena,
Yesus nu saelba uhiropne poneko yalamle sum eneko nuri a'un sembe,
“Wana yeng uro wamukap,”
aro nang-nangaro tilamap.
Nuri kilim weanga ambatto tongoropne sembe kwiria usoghag elektoba kiptopne nubunge nunag tatsiloa saog uro a'un wamlom.
20 A'undi nu wana yeng sirikne nubu nembahiomba,
a'un wamlomne sembe nunag kiptoba tatsinepne wamla.