3
Nuri wene senelamobonge neneko ta'ap senep kom uao ane sembe,
na Paulusap Silasapti,
“As Atena mo wamnemeri,
2 nungkae Timotius mo pognunam,”
sembanomo.
Nungkae Timotius nunap awe nikne Allah sembe tolamubunge poneko a'unag poglamnomori,
“Allahri wepto poghogne Kristus sembe Timotiusti yubu walinge ambarel pihilul.
Ambarelamsileri Tesalonika nimiri Yesusag wana palilamang nimi wana mikip nembahileba,
wana khapto wamukang,”
sembanomori Timotius pogholanomo.
3 A'un Yesusag sikne aro wana palirop nimiag seklena lag taonge sembe nuri seneraglamobonge,
“Sin wana samsamoro Yesus yubu sae laplobikag,”
aro Timotius a'unag pogholanomo.
Nu Yesusag wana palirop nimiag seklenne lag tanepneog wamlange sembe a'undam nimi el wamlom.
4 Nu samenag a'unap nhon wamuburi anamag,
“Nuri Yesusag sikne aro wana palilamapne sembe ora nimiri malia ulamsiikpa seklelamukap,”
aro ambatsibunge neneko sik uro wene a'unag uro yabalamlaba,
a'undi haingdi babe ililamlom.
5 Ane sembe nari a'un sembe,
“Welaro wamang,”
senelamnori ta'ap senep komdi,
“A'undi Yesusag wana palilamlomne kembahinun,”
aro Timotius pogholano.
Na log ulamneongena,
nimi wana alukto mipsiropne phia neneri a'undi wana toro sae kililamsileba,
nuri a'unag ambatsibu yubu neneko,
“Sae laplobikag,”
senelamnonge sembe Timotius pogholano.
Paulus samen wamoghag Timotiusti samoro Tesalonika nimi sembe yubu walinge ambatsiogha
6 Timotius pogholano aghana,
wene Timotius samoro yaori,
yubu wali sirikne a'undi Yesusag sikne aro wana palilamlomdi,
o'ona senel dalamlomne sembe ambatsioba,
yeng senelamap.
Nunag ambatsio yubuna,
samenag a'unap nikag wamubunge wali sirik alamlomba,
nuri a'unag,
“Pihiseberi haiptahabe,”
senelamap saog uro a'undi babe nu sembe,
“Sin nunag yahengpa haiptahabe,”
aro wanaag agha lelamlomne sembe nunag ambatsio.
7 Ane sembe nangkabo,
nimiri nunag malia ulamsiangba,
nu erarukag seklena ni seklelamapne abeneko,
a'undi Yesusag sikne aro wana palilamlomne sembe ka'elamap yubu neneri nu wana aingnilamsil.
8 A'un nu Saelba Uhiropne ponekoap ma'ap tangto wamlomdi,
elag meptangto sekamlom aro el taap ane sembe,
“Nu babe wana aingniro kamag wamap,”
senelamap.
9 A'un Yesusap ma'ap tangto wamlomne sembe nuri wana yeng along wamapti,
nuri nongag mikipne ni wamlangeag agha a'un sembe Allah omeklamap aghana,
sunurop kom sembamap.
10 Sinag kweleknag a'un sembe nu nong ningkiri Allahag molona molbarelamsiap nena,
“Yesusag wana to'opto palilamangne sembe ekon uro wamikagti,
nen sinap haiptangto Yesusag wana pimnepne sembe ma'aro ambatsisebe,”
senelamap.
11 Nuni Allah Eldamneap,
Elme Yesus nu Saelba Uhiropne ponekoapti nu ina yarebatsurukang aro sinag mololamsiap.
Wali sembarikpa,
a'un kemelahukap.
12 Nari sinag a'un sembe molbarelamsin nena,
Yesus nu Saelba Uhiropne ponekori a'unag nimi o'ona senehinne ma'aro sirilamleri tarelamsileba,
nuri a'un sembe o'ona senelamsiap saog uro a'undi babe a'un mamun o'ona senel dalapmundi,
yog nimi babe o'ona senelamsululom.
13 A'un sembe molbarelamsiap nena,
“Yesus nu Saelba Uhiropne ponekori a'undi seneragna wana mikip nenelamsile andarina,
el yalamle sum eneko Yesus eldamneri o'omne aro wepsirop nimiap nhon yaikpa,
a'unag tam pimna koma Nuni Allah whingag wali uro wamlulom,”
aro a'un sembe molbarelamsiap.