“Allahri wali senenne aghabog ulamlulom,” aro ambatsiogha
4
Nangkabo,
nuri samenag ambarelamsibunge,
Allahri wana yeng neneropne sunsunum uro uanepneog wamlange a'unag amoro ambarelamsibuba,
sunsunum uro ul palamlomne wali.
Wene nu Saelba Uhiropne Yesusap ma'ap tangtop nimi wamlomne sembe yubu mikipneag agha sarikto a'unag mololamsiap nena,
nen ma'aro wali uro ul palamlulom.
2 Yesus nu Saelba Uhiropne mikibag agha a'unag tibin nenero,
“Undo-undo ulamlulom,”
aro ambarelamsibo yubu ka'ebaomdi,
el wamlom ane sembe,
nen sol wali uro ul palamlulom.
3 Allahri wana yeng senerop nena,
Allahri senenne mo ulamlulom.
Undo unulapmundi,
kelabo nengabo top tangkamna koma salik-malik walel dalamseng kom.
4 A'un nengabori a'ero-a'ero kelabo toamle tanena,
ela'angeri babe elkeldi babe kelabo nengabo orange sembe,
“Toro saelbahisene,”
senenne agha uan koma el talamlulom.
Allahri senenneap,
sik uro wali maipnepneap el talapmundi,
ela'angeap elkelap ma'ap tanepne sunsunum uro nikag wamlulom.
5 Allah sembe ekon uro urop nimiri Allah senenne semban koma sindi wanaag,
“Bobonge agto yaboho,”
senenne agha nengabo kelabo salik-malik walel dalamang.
Aghana a'un Allah elmabo wamlom ane sembe,
Allah ekon uro urop nimiri ulamangne saog uro ulamseng kom.
6 A'un Yesusag wana palirop nimi a'unkabo tangtop nimi haing pesa iogha lepsimundi,
a'unkabo ingisapsilo saog uro a'unkabori kelabo to,
sa'a-sa'a topsiseng kom.
A'unkaboag otsikne agha ualulom.
Tam nene sembe otsikne agha uamun kom tanena,
a'unkaboag malinge uamunne sembe,
“Amik nu Saelba Uhiropne ponekori tam karebaleri,
a'unag tam ikinne piplul,”
aro wenero ambatsibunge a'un el wamlom.
7 Allahri nun nimi yopsiog nena,
“Nengabo kelabo salik-malik walel dalamukang,”
aro nu yopsiog kom.
Nu yopsiog nena Allahri senenne sunsunum uro ulamnepne sembe yopsiog.
8 Ane sembe,
nimi etneri nari ambatsin yubu nene sembe karong sembaleri,
wa'epto liple tanena,
nimiri yubu agha wa'epto liplul kom,
aghana Allah Eldamne Yame Walinge a'un tarelamsilne poneko wa'epto eplul.
Ane sembe wali uro ka'eapmundi,
yubu ene salero ul palamlulom.
9 Wene o'ona seneptangka unne sembe olog ambatsinep aghana,
a'un Yesusag wana palirop nimi a'unkabo tangtop nimi o'ona senel dalamlomne Allahri samenag el nembahioba,
wali uro ka'ebaomdi,
yubu ene sunsunum uro ulamlom.
Ane sembe o'ona seneptangka un yubu ene nen sap mome toro pimna komne babe,
a'un samenag agha el uro wamlom semban.
10 O'ona seneptangka unne sembe ambatsinep yubu neneko wene babe a'undi salero ulamlomdi,
a'unkabo Yesusag wana palirop nimi mog so'o propinsi Makedonia tala-tala wamang nimi sembe o'ona senelamsilomdi ulamlom.
Aghana nangkabo,
nuri a'unag nen mololamsiap nena,
“Nimi o'ona senehinne a'unag loloro wamleba,
nen ma'aro o'ona senel dalamlulom,”
aro mololamsiap.
11-12 A'undi,
“Uahabe,”
aro ulamlulom nena,
a'un aingniro wapmundi,
tam yogne ora nimiag uro yabalamlenge sembe salel wa'in koma,
tam a'undinge o'oro ul palamlulom.
Samenag nuri a'un ambatsibu saog uro,
“Teko a'unag uahileag aro a'undi tisirik tiptangtoba yog nimiri saeag agha wamna koma a'undam nimi saeri ul piro wero mero tero wamlulom,”
aro ambatsibu.
Undo unulapmunba,
Yesus yubu ekon nimiri kembahiikti,
a'un sembe wali sembahukang.
Nu Saelba Uhiropne Yesus nen samoro yalulne sembe ambatsiogha
13 Nangkabo,
nuri seneraglamap nena,
samenag tebaek nimi sembe a'un babe el tahom senelamap.
Yesusag wana palirop kom nimiri,
“Teptop nimi nen kamag taukang,”
aro tiro nang-nangaro wamna koma wamang.
“Teptop nimi nen kamag taukang kom,”
aro amang ul palamang aghana,
a'unna mog so'oag nimiri wene amang ul palamang saog uro seneragto ul palamlulom kom.
14 Sinag nelepto ul pinep kom nena,
nuri sikne aro seneraglamapne sunsunum uro ul palamlulom.
Nuri sik senelamap nena,
“Yesus tebaog aghana,
nen kamag taog.
Ane sembe Yesusap ma'ap tangtop nimi tebaik aghana,
nen amik Allahri kamag nembahileba,
Yesus nen samoro yalamle sum eneko Allahri embahileba,
Yesusap nhon yaukang,”
aro sik senelamap.
15 Nu Saelba Uhiropne Yesusti ambatsiog yubu sunsunum uro nuri tipto a'un ambarelamsiap.
Nu saelba uhiropne poneko amik nen yalamle sum eneko,
elap ma'ap tangtop nimiap nhon yalamikpa,
nu kamag wamebe nimiri nimi teptopne amik nenelobi agha sin whingag taukap kom.
16 Nu Saelba Uhiropne yalamle sum eneko,
Allah arukna imagnang malaikat sikindori,
“Yesus yanepne sembe wene yalul anne el taukang,”
aro yubu nubu uro yopsilul.
Yopsileri wa'en yubu lilim nubu uro ma'i saog uropne trompet pho alamleba,
Yesus nu Saelba Uhiropne poneko elmo imag agha kuluka yalul.
Kuluka yalamleri,
Kristusap ma'ap tangtop nimi samenag tebaek nimi taneko samenag kamag nembahilul.
17 Tebaek nimi samenag kamag nembahileri,
Allahri nu ko'o anekoag kamag wamebe nimiap,
sin kamag tangtop nimi tanekoap nikag nenero toa nusam toman agha kiliro topsilul.
Kiliro topsileba,
nu Saelba Uhiropne ponekoap imag haiptaukap.
Haiptaberi nu Saelba Uhiropneap ya'ag nikag wamukap.
18 Ane sembe a'un Yesusag wana palirop nimiap yubu nene el nenep tangto nang-nangaro wapmundi,
wana mikip nenel dalamlulom.