“Yesus nen amik yalulne sembe nang-nangaro tiro wamlulom,” aro ambatsiogha
5
1-2 Nangkabo,
a'un Yesusag wana palirop nimi wamlomne,
nu Saelba Uhiropne poneko nen amik yalulne neneko sembe,
“Hurop sum ko'oag agha uro yabilul,”
aro nimiri pimnep kom wamla.
A'un tibin uro el wamlom nena,
el samoro yalul sum eneko nimiri,
“Haoghaba tobukap,”
aro inipnag nimiri aeag tognoro wa'irop saog uro wamlaba,
nimiri haing whi uro tibogto wamnep kom saog wamla.
Ane saog uro Yesus samoro yalul ane sembe,
nuri a'unag nen tipto,
“Sumene ko'oag agha uro yabilul,”
aro mome toro pibukap kom.
3 Nen amik yalul sum eneko,
nimiri lelamikti,
“Wenena nu wali wamnepneog wamlaba,
wana aingniro wamukap,”
alamik abene malia urop nimi kom nembahinep sum lo'om aro uro yabilul.
Lo'om aro uro yabinep sum enekona,
kelabo me monag wamnaba,
“Sumene sum mangaro anun,”
sembamna komag agha lo'om alognari,
me mangal toropne saog uro Yesus nen yalul sum eneko wamla.
Nen yaleri,
malia urop nimi kom nembahinep sum eneko el whingag agha la'anip taukang kom.
4 Aghana nangkabo,
a'unna inibinag urop nimi saog uro wamlom kom.
Ane sembe a'un haing whi uro tiboghapmunba,
el yalul sum eneko haogha nimiri inipnag yingkirop saog uro yanaleba,
a'un lo'om seheng kom.
5 A'un wamlom nimi niag yo'obi saog uro tibin wareropne neneri Allah elmabo nembahiogpa wamlom.
A'unap nunap wamap nena,
inibinne inipnag uropneri mabo wamap kom.
6 Inipnag uropneri mabo haing whi uro wamna koma nimi nhon inipnag malamloa saog uro wamang.
Aghana nunna inipnag uropneri mabo wamap kom ane sembe,
mamna koma haing whi uro wameberi,
wero tibogto wamukap.
7 Nimi wero wamna koma wamnep nena,
inipnag uro yabinep.
Nimi kwahing mamnep nena,
inipnag kwahing malamang.
Ora nimiri inipnag mag yonge tero ulamangne sembe nenek saelba uhirop.
8 Aghana nunna,
tibin wareropne neneri Allah elmabo nembahiog nimi wamap ane sembe,
nuri seneragna babe tibin uro seneragtop nimi wamukap.
Mal tarop nimiri mal taroba wero up tangkamloa saog uro nuri babe wali uro wero wamukap.
Allahag sikne aro wana paliropneap,
o'ona senehinneap abeneko seng enekamloa saog taleba,
nundam nimi kalul dalamukap.
Mal tarop nimiri usoghag babe mal kaunguro timbaneba kaulbaloa saog nena,
“Yesusti nu taulbahiogti,
pelepto taulbahilul,”
aro nang-nangaro senenne salero nuri usoghag kalul dalamukap.
9 Nu wana awi uro nang-nangaro wamnep nena,
Allah nu wepsiogne ponekori nunag,
“Tam ikinne pimnun,”
aro nu wepsiog kom.
Allahri nu wepsiog nena,
nu Saelba Uhiropne Yesus Kristus pere agha Allahri nu,
“Taulbahinun,”
aro wepsiog.
10 Yesus nu sembe tebaog nena,
“Nanap ma'ap tangtop nimi,
kamag urop nimi babe,
teptop nimi babe,
kamag tangom agha nanap nhon ya'ag wamukap,”
aro samenag nu sembe tebaog.
11 Ane sembe wene ulamlom saog uro nen tipto a'un mamun wenel dalapmundi,
wana mikip nenel dalamlulom.
Paulusti mome komobanebag Tesalonika nimi wenero ambatsiogha
12 Nangkabo,
a'un Yesusap ma'ap tangtop nimi sembe nu Saelba Uhiropne ponekori a'un anabiag nimi etpare wamang nimiag,
“Nimi o'oro saelbamsukang,”
aro mikipne paiamsil.
Sinag mikipne paiamsil nimi tanekori a'un wenero ambarelamsiangdi,
a'un sembe kilim weanga awe tolamang ane sembe,
“Wali uro ka'eamsimundi kiplamsululom,”
aro mololamsiap.
13 Sindi Allah yubu a'unag ambatto awe tolamangne sembe,
a'undi sin o'ona senero paliag nenero nimi wanaagne nembamsululom.
A'un anabiag wamang nimiap ma'ap tangto wamlulom.
14 Nangkabo,
nuri a'unag wenehin yubu olog wembahukap nena ane.
A'un anabiag karong aro awe torop kom nimi wamikne wenelamsululom.
Wana ikin uro urop nimi wamikne wana keyagman nenelamsululom.
Mikip kom uro urop nimi wamikne yeplamsululom.
Nimi niri ulamikne sembe wana pailingkina wali uro ulamlulom.
15 Nimiri a'unag malia ulamsiikpa,
“Nuri babe sinag samoro malia uaukap,”
aro ulamseng kom.
A'un mamun wana walingeag agha walia aghabog ul dalapmundi,
yog nimi ni wamikneag babe walia aghabog ulamsululom.
16 Sop-sop wana awi uro wamlulom.
17 Allahag molona sop-sop sinag kweleknag ta'ap sen koma mololamlulom.
18 Sa'a-sa'a a'unag uro yabalamleba,
a'undi Allahag,
“Naba naniong,”
aro kiplamlulom.
A'undi undo seneragto ulapmun tanena,
Allahri a'un Kristus Yesusap ma'ap tangtop nimi sembe,
“Undo seneragto ulamukang,”
aro senelamlange sunsunum uro ulamlulom.
19-20 Allah Yame Walingeri nimi wanaag yubu el nenelamsileba,
nen yubu silimu tipto ambarelamsiik tanena,
yubu ene sembe teba'en sembaheng kom.
Allah Yame Walingeri tarelamsilne auk pog saog uro wamlaba,
oro niknibaheng kom.
Allah Yame Walinge oro niknibaheng kom aghana,
21-22 ka'elapmundi ni wali uro mipto seneraglamlulom.
Mipto seneraglapmundi,
“Malinge nunag taleag,”
aro sik urop komne weag nenelapmundi,
walinge aghabog saelbamlulom.
23 Nuri a'un sembe Allahag molbarelamsiap nena,
Allah Eldamne nu wana aingnilamsilne ponekori a'un wepsiog nimi eldi o'om nimi nenelamsileba,
a'un nong ningkiri,
“Allahri senenne mo ulamnun,”
aro sunsunum uro ulapmundi wamlulom.
Undo wapmunba,
Allahri a'un yae paiamsileba,
a'undi seneragnaap,
a'undi wanaap,
a'undi nong ningkiap yae paip tangkamlulom.
Undo wapmun andarina,
nu Saelba Uhiropne Yesus Kristus poneko nen yalamle sum eneko nimi nhondi babe a'unag tam pimnep kom aro a'un sembe Allahag molbarelamsiap.
24 Allahri,
“Naringe taukang,”
aro a'un yopsiogne poneko sikne wamla.
Ane sembe eldi,
“Uanun,”
seogne sunsunum uro otsik uro ualul.
25-26 A'un mamun haibil dalapmundi,
“Allahri wepsirop mabo ma'ap tangto wamap,”
aro a'unkabo tangtop nimi ni somoro togtog aro kibil dalamlulom.
Nangkabo,
nu sembe Allahag molona molbarelamsululom.
27 Nu Saelba Uhiropne ponekori nanag mikipne pimneongeag agha,
“Mome nene Yesusag wana palirop nimi nungkabo tangtop nimi ni whingag agha mome lilim lelapmunba,
sindi babe ka'elamukang,”
aro a'unag mololamsin.
28 A'un sembe molbarelamsiap nena,
“Nu Saelba Uhiropne Yesus Kristus ponekori wana a'unag yorolamsileba,
walia ulamsilul,”
aro elag molbarelamsiap.
Abenda.