Tesalonika
Nimi Sembe
Paulusti Mome Toro Pibogha Phendepne
Paulusti Tesalonika nimi kipsiogha
1
Nangkabo!
A'un Nuni Allahap nu Saelba Uhiropne Yesus Kristusap ma'ap tangtop nimi as Tesalonika winil dalamlom nimi sembe mome toro palilamap.
Nu Paulusap Silwanusapa Timotiusapti a'un kiplamsiap.
2 “Nuni Allahap,
nu Saelba Uhiropne Yesus Kristusap abenekori wana a'unag yororo walia ulamsirikti,
wana aingnibahurukang,”
senelamapti a'un sembe molbarelamsiap.
Kristus nen amik yalamle sum eneko tam karepto pelengkalulne sembe ambatsiogha
3 Nangkabo,
nuri a'un sembe sop-sop Allahag,
“Naba naniong,”
aro kiplamap.
A'undi samenag Yesusag sikne aro wana palilamlomne yareng selelep aro pongkanep saog uro nubu tangto pongolamla.
A'un samenag o'ona seneptangka unne babe wene nen ma'aro a'un mamun maikno uro o'ona senel dalamlom.
Ane sembe nunag yeng to'opto wamlaba,
nuri a'un sembe Allahag,
“Naba naniong,”
aro kipnepneog wamla.
4 A'undi undo unulamlomne sembe Allah elmabo Yesusag wana palirop nimi tala-tala winil dalamang nimi tanekoag ambatto poa tongolamsiap.
A'un Tesalonika nimiri Yesusag sikne aro wana palilamlomne sembe nimiri a'unag,
“Seklebaik,”
aro malia ulamsiangba,
ikin uro seklelamlom.
Malia ulamsiangne ni seklelamlom aghana,
wana khapna agha walia ulamlomne sembe nuri as yog nimiag ambatto poa tongolamsiapti,
a'undi ulamlomne sembe kibiang towalengero ambarelamsiap.
5 A'undi undo unulamlomne neneri lag nembarelamsil nena,
Allahri tam karebanepne wana porogneag agha tam karebarelamsil aro lag nenelamla.
A'un mipsiropne toman agha Allahri a'un sembe tam peket uro karebatsilul nena,
“Nari mog so'oag nimi saelba uhiroba sembe seklelamang ane sembe,
sin nari saelba uhirop nimi tanepne sunsunum,”
aro tam karebalulne wene babe keknel dalamla.
6 Nimiri a'unag,
“Seklebaik,”
aro malia ulamsiik nimi tanekoag Allahri wana porog uro tam karebalulne ponekori sinag lunuro tatsileba,
sin babe seklebaukangne wamla.
7 A'un wene seklelamlom nimiap,
nu seklelamap nimiap sembe Allahri nu aingnibitsilul.
Aingnibitsilenge nenena,
nu Saelba Uhiropne poneko Yesus nen imag agha kulukul aleri,
Yesusap Allah arukna imagnang malaikat mikip sirik nangap auk pog libang-libang arop saogneap lag talamukang.
Lag talamik sum eneko Allahri nu aingnibitsileri,
8 sin Allah sembe seneragna koma el ekon nimiap,
nu Saelba Uhiropne Yesus yubu walinge ingisaplorop nimiap tanekoag lunuro tam pelengkatsilul.
9 Yesus yubu walinge ingisaplorop nimi ni tanekoag tam pelengkatsilul nena,
ya'ag seklero loba tangtobag toro tobogahilul.
Tobogahileba nu Saelba Uhiropne ua urobag babe,
el mikip phelektopne eldamne imang wareropne babe,
“Olog ibukang kom,”
aro weag tobogahilul.
10 Ni undo unualul nena,
el yalamle sum eneko agha ulamleba eldi,
“O'omne,”
aro wepsiog nimi elag sikne aro wana palirop nimi ni tanekori elag lo'om aro kemelamikti,
paliag nenelamukang.
A'un babe,
nuri a'unag sik yubu lag nenero ambarelamsibunge salero sik senelamlom ane sembe,
a'un babe Yesusag sikne aro wana palirop nimi nusamag wamlulom.
11 Ane sembe nuri a'un sembe sop-sop molona Allahag molbarelamsiap andarina,
Nuni Allahri a'undi wanaag kembi agha,
“Namabo taukang aro yoplamsin nimi taneko sunsunum uro urop nimi wamang,”
sembahilul.
Nen molona nhon a'un sembe molbarelamsiap nena,
a'undi Yesusag sikne aro wana palilamlomne toman agha,
“El si nubu nenero undo-undo ulamukap,”
senelapmunne sembe,
Allah eldamne mikipne agha a'un yeplamsileba,
“Wali-walia ulamukap,”
senelapmunne sunsunum uro,
“Sik uro yabilul,”
aro a'un sembe Allahag molbarelamsiap.
12 Nuri a'un sembe Allahag molbarelamsiap nena,
“A'un nu Saelba Uhiropne Yesusap ma'ap tangto wamlomne toman agha el si paliag uropne lag taleba,
Nuni Allahap nu Saelba Uhiropne Yesus Kristus ponekoapti a'unag wana yorolamsilne toman agha a'un elap ma'ap tangto wamlom nimi babe kipto paliag nembahilul,”
aro a'un sembe molbarelamsiap.