Allah yubu ingisaplorop nimi nubunge yanepne sembe ambatsiogha
2
Nangkabo,
a'un Yesusag wana palilamlom nimi,
nu Saelba Uhiropne Yesus Kristus poneko nen amik yaleri,
nu poloro wimbahileba,
elap nikag wamukap.
Yalamleri nu poloro wimbahilulne sembe nari a'unag otsik uro mololamsinne ane.
2 Nimiri a'unag mome to,
yubu to poa yingkina Yesus nen yanepne sembe orolena ambatsiropne ka'ebi agha,
“Elem-elem otsik semban koma,
wana ophag aro wana tungmai nenelop taheng kom,”
aro a'unag mololamsin.
Nimiri orolena ambarelamsiikti,
“Allah Eldamne Yameri Paulusap elkaboap sinag yubu piboba,
nen yubu silimu tipto nunag ambatsiong.
Wene nuri a'unag ambarelamsiapne ane,”
aro yubu poa yalamik tanena,
“Sindi yubu sik to,
kom to?”
aro wali uro seneragto ka'elamsululom.
Sindi lelamikti,
“Nu Saelba Uhiropne poneko ik phendep sum nen samoro yaori,
elap ma'ap tangtop nimi wimbahioba,
nu tane wamap,”
alamik tanena elem-elem men phea otsik sembaheng kom.
3-4 Nimiri yubu nhon saog,
nhon saog yubu poa yalamikti,
Yesus eldamneri nimi winihiro yalamle sum eneko sembe orolena ambatsiikpa,
“Sik to,
kom to?”
aro ka'elapmundi,
orolenange sik sembahiseng kom.
Yesus anam samoro yan komag uro yabilul nena,
nimi maiknori,
“Allah umag wamukap kom,”
aro Yesus yubu eneko lililamsukang.
Lililamsiikpa Allah yubu ingisaplorop nimi nubunge nhon lag tangto waelbalul.
Waelbaleri ualul nena,
Allah yubu ingisaplorop nimi enekori ora nimiri mem phalamikneap,
ora nimiri Allah aro engero palilamikneap,
“Mombolag nembahukap,”
aro Allah yubu ingisaplorop nimi eneko agha Allahri Mem Ae nubungeag babe wa'ileri pukamlul.
Wa'ileri pukamleri,
eldamne sembe,
“Nanagha Allah wamna,”
aro omekel dalamlul.
Undo unualul aghana,
Allahri nimi eneko sembe samenag el wamogti,
“El luknubaneri,
kom nembanun,”
aro tam karepto pibog.
Ane sembe,
nimiri a'unag yubu nhon saog,
nhon saog poa yaikti,
Yesus nen amik yanepne sembe orolena ambarelamsiik tanena,
elem-elem men phea otsik sembahiseng kom.
5 Na samenag a'unap nhon wamsiri,
tam nene sembe a'un ni ambatsisinge a'un ekon taom kom sembamna.
6 Allah yubu ingisaplorop nimi nubunge neneko wene lag tanep aghana,
nhondi el salero iriklamlange neneko a'un el wamlom.
Wene el salero iriklamla aghana Allahri,
“Nimi yonge yubu ingisaploropne lag talul,”
sembaog sum eneko mo lag tangto yabilul.
7 Lag tangto yabilul aghana,
wene babe nimi maiknori,
“Na mori uanun senenne sunsunum uro uanun,”
aro seneragto ulamangdi,
Allah yubu ingisaplamang.
Allahri tognoroba nunag lag nembahiog yubu neneko nimi maiknori wanaag seneragna koma Allah yubu ingisaplamang.
Wene babe undo unulamang aghana,
Allah yubu ingisaplorop nimi nubunge neneko amik sum lag tanep nena,
wene nhondi el salero iriklamlange neneko amik Allahri toro kolbitlul.
8 Toro kolbitle taneogna,
Allah yubu ingisaplorop nimi nubunge neneko lag talul.
Lag talul aghana,
nu Saelba Uhiropne Yesus poneko nen yalamle sum eneko eldamne imang anekori malinge neneko kom nembaleri,
haindi pho aro malinge neneko oplul.
9 Allah yubu ingisaplorop nimi nubunge yalenge neneko sembe phia sikini nubungeri mikiba nimi eneko nongag lekneamleba yalul.
Phia sikini nubungeri mikibari uanepne kekneba maikno ulamlul.
Kekneba maikno ulamleri,
orolenange agha nimiri wana tolamsileba,
nimi maiknori,
“Yaghe,
mema mikibari uanepne el pere ual” sembaukang.
10 Allah yubu ingisaplorop nimiri undo unulamleri,
mali-malia maikno ulamleri,
orolenange lelamlul.
Orolenange maikno lelamle yubu neneko loba nenep tangtop nimiri sik sembaukang.
Loba nenep tangtop nimi tanekori Allah yubu sikne nimi taulbahinep yubu eneko karong senelamikti,
sikne neneko wa'eplamukang.
Yubu sikne neneko sembe sindi wanaag o'omne aro saelbanep aghana,
Allah yubu ingisaplorop nimiri lelamle yubu sik sembaukangne sembe nimi taneko loba taukang.
11 Nimi tanekori Allah yubu sikne karong aro seneragto ulamikne sembe Allahri sin nimi tanekoag seneragna loba nenero ulamsilenge nhon sinag pipsile andarina,
orolenange sik sembaukang.
12 Sik urop komne agha yeng senelamikti,
orolenange ka'esebel tanan yubu sik senelamikpa,
Allahri tam karebi agha tam ikinne sinag pelengero pipsilul.
“Allahri a'un, ‘Taulbahinun,’ aro wepsiog,” seogha
13 Nangkabo,
a'unna nu Saelba Uhiropne ponekori o'ona senelamsil nimi wamlom!
Allahri a'un o'om nimi nenero,
“Naringe taukang,”
aro a'un wepsiog ane sembe,
nuri Allahag sop-sop,
“Naba naniong,”
aro kipnepneog wamla.
Eldi samenag anam imap so'oap sumban komag agha a'un sembe,
“Sin taulbahineba,
namabo taukang,”
aro a'un wepsiog.
Wepsiogti Allah Eldamne Yame Walingeri a'undi wana seneragnaag malinge wa'epto naghi agha yag lanalamsilne toman babe,
a'undi Allah sik yubu nenekoag sikne aro wana palilamlomne toman babe a'un talulamsil.
14 Allahri a'un,
“Na namabo taukang,”
aro wepto talulamsil nena,
nuri Yesus yubu walinge a'un ambarelamsibunge pere agha Allahri a'un yopsiogti talulamsil.
Talulamsil andarina,
nu Saelba Uhiropne Yesus Kristus paliag uropne kiptoba nunag babe tahilul.
15 Ane sembe,
nangkabo a'un wana khapto sekamlulom.
Nuri pamag agha babe,
momeag agha babe ambarelamsibu yubu eneko wali mikip uro saelbamlulom.
16 Nu Saelba Uhiropne Yesus Kristus ponekoap,
Nuni Allahapti nu o'ona senelamsirang.
O'ona senelamsirangdi,
nunag wana yororo senehinneag agha wana aingnilamsirang.
Wana aingniro ya'ag wana mikip nenelamsirangba,
wana mikip uro wameberi,
“Allahri nunag walinge aghabog uahilul,”
aro nang-nangaro tibogto ulamap.
17 A'un Tesalonika nimi sembe Allahap Yesusap abenekoag molbarelamsiap nena,
“Nen ma'aro wana aingnilamsurumundi,
mikip nenelamsururom,”
aro molbarelamsiap.
“A'un Tesalonika nimi mikip nenelamsirikne toman agha,
walia aghabog ulapmundi,
pamag agha wali yubu lelapmundi wamlulom,”
senelamapti a'un sembe molbarelamsiap.