“Nu wilindi nang sembe Allahag molbarelamsululom,” aro mome toro pibogha
3
Wene nungkabo,
nuri a'un sembe mome komoptopne palilamap nena,
nu sembe Allahag molona molbarelamsululom.
Allahag molona molbarelamsimun andarina,
nu Saelba Uhiropneri yubu elemag sabo tangto pileba,
samenag a'un Tesalonika nimiag uro yabiog saog uro wali uro ka'elamikti saelbaukang.
2 Nuri ambarelamsiap yubu neneko nimi niri sik senelamang kom ane sembe,
“Salik-malik urop nimi yo nimiri nu yubu nepto opsiikag,”
aro nu sembe Allahag molona molbarelamsimun andarina,
Allahri nu pelepto yae paiamsilul.
3 Nimi niri sik senelamang kom aghana,
nu Saelba Uhiropne ponekoag nuri wana pimnep.
Eldi a'un mikip nenelamsileri,
yongeri a'un sae kiliro yubu nepsinebag agha eldi yae paiamsileri,
a'un taluro pelebahilul.
4 Nuri a'un sembe wanaag sik senelamap nena,
nu Saelba Uhiropne ponekoap ma'ap tangtop nimi wamlom.
Ane sembe nuri a'unag,
“Undo-undo ulamlulom,”
aro ambatsibunge sunsunum uro ulamlomdi,
amik babe ulamlulom aro a'un sembe el uro wamapti,
nu Saelba Uhiropne ponekori saeag palilamsiap.
5 “Nu Saelba Uhiropneri a'un yeplamsilenge toman agha Allahri nu o'ona senelamsil saog uro a'undi babe wanaag agha o'ona senel dalamlulom.
Apna Kristusti wana khapto ulamog saog uro a'un babe wana khapto wamlulom,”
senelamapti a'un sembe nu Saelba Uhiropne ponekoag molbarelamsiap.
“Ambengka uro wamna koma sol wali uro awe tolamlulom,” aro wenero ambatsiogha
6 Nangkabo,
nu Saelba Uhiropne Yesus Kristus siag kekhaekto wamapneag agha nuri a'unag aruktop yubu ambarelamsiapne ane.
A'un Yesusag wana palirop nimi a'unkabo tangtop nimi anabiag agha,
nimi etne nuri amoro ambatsibu yubu salero ulamang komdi,
sol mali uro urop nimi ipsimun tanena,
“Sin nimi tanekoap ma'ap tangto wamlulom kom,”
aro ambarelamsiap.
7 Nu a'un anabiag wamuburi,
nuri awe tolamubunge ambengka uro wamna koma sol wali,
wali uro tolamubunge a'undi babe ipsilum.
Nuri senelamuburi,
“Nuri ul piropneag yog nimiri nelepto ul palamukang,”
aro ulamubu ane sembe,
a'undi babe otsik uro sol wali uro awe tomnepneog wamla.
8 Nu a'unap wamubungena,
kwaneng tena mo telolamubu kom.
“A'unag ikinne pipsibeag,”
aro nuri sinag kweleknag whin seklero,
“Yog nimi nuri tenaba sembe yubu nepsukap kom,”
aro nuri saeri ero awe tolamubu.
9 Nuri Allah yubu sikne a'unag poa ambatto tongolamsibu ane sembe,
nunag kwema ulamsinepne sembe a'unag sunsunum uro molbahinepneog wamog.
Nuri a'unag molbahinep aghana,
nuri seneragto ulamubungena,
“Sindi nu kemelamsiikpa,
nuri ul piropneag nelepto ulamukang,”
aro ulamubu.
Ane sembe a'unag molbahin koma nuri saeri ero awe tolamubu.
10 Nu saeri ero tolamuburi,
a'un anabiag wamuburi,
a'un sembe yubu sia nhon karepto pibubunge ane.
“Nimi etneri awe tomna koma ambengka uro mo wamle tanena,
nimi eneko kwaneng telamlul kom,”
aro karepto pibubu.
Paulusti lebe aroba kon mektopne agha kalun ae wetnero soropne wamog. (2 Tesalonika 3:10)
11 Nuri samenag,
“Awe weroan kom nimiri kwaneng telamlul kom,”
aro karepto pibubu aghana,
wene ka'elamapba,
a'un anabiag agha nimi etpare wamangdi,
awe weroan koma ambengka uro wamang.
Nimiri lelamang nena,
“Toro kokto ulamangdi,
sa'a-sa'a uan koma ulamang aghana,
ora nimiri tam ua ulamla tanena,
urukag wa'ina salel wa'alamang,”
alamangpa ka'elamap.
12 Nuri karepto pibubu saog uro,
nen sap sarikto arukto ambarelamsiap.
Nu Saelba Uhiropne Yesus Kristus ponekoap ma'ap tangto wamapneag agha sin awe weroan koma toro kokto wamang nimiag wenelamsiapti,
“Sin undop nimi aingnip taikti,
awe saeri weroaik taneogna,
tenaba telamukang,”
aro yubu mikip uro aruklamsiap.
13 Aghana a'un yog nimi,
nungkabo tangtop nimi wamlomne,
a'undi nimiag walia ulamlomne,
“Sololamnari ta'ap senun,”
semban koma nen tipto walia ulamlulom.
14 Nuri mome toro palilamapne neneag wamlange saelbamlulom.
Nimi nhon a'un anabiag agha nuri mome eneko sembe sik sembale komdi,
nelebale kom tanena,
nimi enekoap sae tiptangto wamlulom kom.
“Ali sembaleri,
yubu eneko ka'ebalul,”
aro a'un togtangto wapmundi,
elap sae tiptangto wamseng kom.
15 Aghana nimi eneko a'undi aisa nemban koma,
“Nungkae Yesusag wana paliropne,”
senelapmundi yubu agha wenelamlulom.
Paulusti mome komobanebag kiptop yubu mome toro pibogha
16 Nu Saelba Uhiropneri nu wana aingnilamsilne poneko eldamneri sop-sop a'undi wana babe aingnilamsilul.
Wali uro wapmunne babe,
eraruk uro wapmunne babe,
a'undi wana aingnilamsilul senelamapti,
a'un sembe elag molbarelamsiap.
A'un Saelba Uhiropne ponekori a'un nhin yae paiamsilul.
17 Na Paulusti a'un kiplamsin.
Yubu abene palilognange na Paulusti kipsirop yubu abene mo saeri toro palilamna.
Nari sop-sop mome tolamnange saog uro mome nenneag babe nari sae kekneba na keknel tananne sembe undo palilamna.
Ane sembe nimi etneri mome ene kembaikti,
“Paulusti tapto mome eneko toro pibog,”
aro el taukang.
18 A'un nhin sembe molbarelamsiap nena,
“Nu Saelba Uhiropne Yesus Kristus ponekori wana a'unag yorolamsileba,
walia ulamsilul,”
aro elag molbarelamsiap.
Abenda.