Paulusti Yesusag wana paliro winip tangtop nimiri ulamnepne sembe ambatsiogha
2
Anamag ambarelamsinne o'omnena,
Allahag moloro lelapmundi,
teko wamsilea sembe molona molbarelamsululom.
Mololapmundi nimi ni sembe babe Allahag molona molbarelamsimundi,
Allahri tarelamsilne sembe babe,
“Naba naniong,
wali tarelamsilam” aro kiplamlulom.
2 Yubu sia lerop nangap,
nimi nubunang a'un sale-sale paiamsiang nangap sembe babe Allahag molona molbarelamsululom.
Molbarelamsimunne,
“Tam yogne-yogne orog wamleba,
aingniro wana wali uro wameberi,
Allahri senenne sunsunum uro malia uan koma wamukap,”
aro molbarelamsululom.
3 Undo ulapmunne agha Allah nu taulba uhiropne poneko wana wali nenelamukap.
4 Eldi senerop nena,
“Sin malia ulamang nimi ni taulbahisene ane sembe,
sikne neneko nimi ni el taheng,”
senelamla.
5 Sik yubu neneko nimi ni el tanep nena,
Allah ot nhonog wamlaba,
nunap Allahap sembe anabiag talamlari,
nu Allahap ma'abahinepne ot nhonog wamla.
El anabiag uropne ponekona,
Allahri wepto poghogne Kristus Yesus wamla.
6 El poneko,
“Mog so'oag nimiri mali-malia uropne sembe kamna top tanun,”
aro eldamne paip taog.
Yesusti undo unuaog nena Allahri,
“Nari wanaag senenne keknep taleba,
el taukang,”
senen ko'oag agha Yesusti uaogpa Allahri,
“Uanun,”
senelamogne lag taog.
7 Undo unuaogti,
Yesusti na wepto,
“Ambatto tongolamsululam,”
aro pogneog.
Na wepto poglamneogti,
“Yahudi sisa kom nimiag yubu walinge lag phoro sik uro ambatto tongolamsimenba,
sik seneraglamukang,”
aro Yesusti na pogneog.
Nari lemnange nene orolenange agha lemna kom.
Otsikne agha lemna.
8 Nari ulamnari,
“Uro yaboho,”
senelamnangena,
nimi nengabo tala-tala wamang nimi sindi wanaag,
“Allahri senenne sunsunum uro ulamukap,”
aro sae towalengero Allahag omekto molona mololamukang.
Nari yeng senelamnange,
“Allahri senenne sunsunum uro ulamikti,
nimiap-nimiap waptangkamna koma,
nimiap se'el nenep tangkamna koma Allah omekto mololamukang,”
senelamnari ulamna.
9-10 Kelabo sembe babe nari yeng senelamnangena,
Allah omektop kelabori ulamnepne sunsunum uro sindi nongag enekel dalamlonga saog uro ulamukang.
Ora nimiri a'un kelabo kembahiikti,
“Allah omeklamang kelabo wamangdi,
sunsunum uro enekel dalamang,”
senelamsinepne sembe na yeng.
Mog so'oag nimiri kibiang towalengelamang nena,
hong sangalo yarelamangdi,
kamna alikinag agha toroba mutiaraap,
emas agha sunurobaap wangalamangdi,
kamna alikinag agha toroba walinge aghabog nongag enekel dalamang.
Ot a'undina sinag nelepto,
“Haingdi kembaneikti kiplamnukang,”
aro ulamseng kom.
Allah omektop kelabori walia uropne maikno toman agha wali kemerop kelabo nenel dalamnepne agha sunsunum wamla.
11-12 A'un Yesusag seneragtop nimiap winil dalapmundi,
kelabori Allah yubu sembe nengabo amoro ambarelamsiseng kom.
Kelabo yubu koma wamikpa,
kabuniri yubu ambarelamsiikpa,
kelabori wana mamleba,
ka'elamikti el talamukang.
Allah yubu lero winip tangtobag kelabori nengabo,
“Undo-undo ualulom,”
aro mikipneag agha amohinne nene sunsunum kom.
13 “Kelabori nengabo amoro ambarelamsiseng kom,”
aro ambatsin nena,
tam nene sembe.
Allahri nimi sunulamsiogti,
Adam samenag sumbaogti,
Hawa amik sumbaog.
14 Allahri nimi sumbahiogpa,
Adam poneko irikna phibaog nena,
paghaeri yubu neptopne sik sembaog kom aghana phibaog.
Adam poneko paghaeri yubu neptopne yubu sik sembaog kom aghana,
Hawa kel eneko paghaeri yubu neptopne yubu sik sembaogti,
Allah yubu lebogne irikna phibaog.a
15 Undo lemna aghana,
kelabori Yesusag sikne aro wana palilamikti,
nimi o'ona senelamsiikti,
wana mombolag nenep tangto Allahri senenne sunsunum uro ulamik tanena,
kelabori me mangaropneri kelabo wali nenelamsil.