Allah elmabo paia uhirop nang tanepne sembe lebogha
3
Yubu kiki nene otsikne agha ambarelangken.
Nimi etneri,
“Allah elmabo paia uhiropnea tanun,”
senerop nimi enekori,
“Awe saelbahane,”
aro seneragtop nena,
“Awe toro welbana wali sirikne agha saelbahane,”
senerop.
2 Ane sembe nimiri yubu sikne agha,
“Malia ulamla” aro elag tam pimna koma wamle taneogna,
Allah elmabo paia uhiropne wamnep.
Allah elmabo paiamsinep nimi eneko kelabo ot nhonog toamnep.
Allah elmabo paia uhiropne tanep nimina,
eldi wana mamleba,
“Malia uanun,”
senelamlenge lirop.
Eldi wana hekto seneragha urop.
Nimi orangeri el sembe,
“Wali nimi,”
aro kiptop.
Eldi aeag nimi wa'al ananne sembe ina kuptop.
Eldi wali uro el nenero ambatsinep.
3 Mag yongeri el wana torop kom.
Nimiap kame tarop koma,
win-win aro lero urop.
Nimiap waptangtop yubu agha lep tangtop kom.
Kal ma'aldi wana torop kom.
Undop saog nimi wamle tanena,
“Allah elmabo paia uahirop nimi taho,”
sembanep.
4-5 Allah elmabo paia uhiropne tanep nimiri eldi kel,
eldi kelmabo meap wali uro o'oamsilul.
Wali uro o'oamsileba,
eldi kelmabo meapti sikini yubu ka'eamikti,
sikini sembe,
“Nuniong,”
aro kiplamikti,
sunsunum uro ulamukang.
Nimi nhondi eldi kelap,
eldi kelmabo meap wali uro o'obahinep kom aghana elag,
“Allah elmabo paia ulamsululam,”
aro eldi saeag paiamna tanena,
welaro Allah elmabo winil dalamang nimi taneko wali uro o'obahinep?
Ane sembe eldi kelabo meap wali uro o'oamsile kom tanena,
Allah elmabo paia uhiropne wamlul kom.
6 Allah elmabo paia uhinne tanep nimina,
weneog Yesusag sikne aro alniro seneraglamna nimi agha paia uhirop nimi tanep kom.
Weneog Yesusag seneraglamna nimi agha Allah elmabo paia uhiropne tan pagha tanena,
eldamne paliag nenep tangto metmereng senep.
Allahri samenag tam karebi agha phia sikini nubungeag uaog saog uro,
Allah elmabo paia uhirop nimiri eldamne paliag nenep tangto metmereng seleba,
Allahri elag babe tam pelengkanep.
7 Allah elmabo paia uhinne tanep nimina,
a'unap nikag winip tangtop kom nimiri babe eldi ul palamlange sembe,
“Nimi walinge,”
aro sikne lag nenero ambarel dalamik tanena,
el wali Allah elmabo paia uhinne wamnep.
Aghana Allah elmabo paia uhin nimi sembe yog nimiri san tilipnange na karong.
Ane sembe Yesusag seneragtop kom nimiri eldi ulamlange sembe mali alamik tanena,
nimi eneko,
“Phia sikiniri selbel werobag wa'ileag,”
aro Allah elmabo paia uhinne wamnep kom.
Allah elmabo agha nimi yepto tongohirop nimi sekitsinepne sembe ambarogha
8 Allah elmabo paia uhiropne tanep nimi sembe ambatsindi,
nen tipto ambarelamsin nena,
Yesusag wana paliro winil dalamang nimi anabiag agha,
“Teko ulamsileag,”
aro yepto tongohiropneb tanep nimi sembe ambatnuahin.
A'un Allah elmabo anabiag agha nimi yepto tongohiropne tanep nimina,
undop nimi agha tanep.
Sindi lero ul piropne agha ora nimiri maipsinep.
Sindi sikne aghabog lero urop nimi,
mag yongeri wana tohirop kom nimi,
kal ma'aldi babe haing suruhirop kom nimi wamnep.
Undop nimi wamik taneogna,
a'undi sin sembe,
“Yesusag wana paliro winil dalamang nimiri sae saog tahengdi,
yepto tongohirop nimi taheng,”
sembanep.
9 Sin yepto tongohiropne tanep nimina,
nimi wanaag sembenga orog nimi wamikti,
“Walinge agha ulamnari uanun,”
aro yubu sikne salero sik senelamang nimi agha wepsiro sekitsinep.
Yubu sikne Yesus sembe samenag tognoro saog wamog aghana,
wene el tabu.
El taburi,
Allah elmabo yepto tongohirop nimiri yubu sikne wali uro seneraglamikti,
kasmi agha saelbamik pagha tanena,
“Nuri sae saog tahengdi,
yepto tongohiropne taheng,”
aro seneragnep.
10 Sin Allah elmabo yepsin nimi anam wepsin komag sin mipsinba,
nimiri sinag tam pimnep kom taneogna,
sin hae Allah elmabo yepto tongohirop nimi wamnep.
11 Kelabo sikindinge babe sindi wana mamleba,
“Malia uaukap,”
seneropne libikti,
ora nimi sembe san tilipto lemna koma ulamukang.
Undo ulamikpa,
ora nimiri ililamsiikti,
yepto tongohirop nimi sikin kelabo aneko sembe,
“Sikneog lero urop kelabo wamang,”
aro maiplamsukang.
12 Allah elmabo yepto tongohiropne eldi kel ot nhonog toamnari,
eldi kelap,
kelmabo meap wali uro o'obahinepne agha wamlul.
13 Nimi etneri Yesusag seneragtop nimi sol wali,
wali uro yeplamsiikpa,
ora nimiri sin wali uro yeptop nimi sembe,
“Nimi walinge,
nani,”
aro maiplamsukang.
Nimi wali uro yeplamsiikti,
sindam nimi Kristus Yesusap ma'ap tangto elag wana paliro seneraglamangne nen ma'aro wana khapto elag seneraglamukang.
14-15 Nari an kemel aghenunne nen olog tane wamneri,
an as Efesus wamlamag men yanun.
“Men yanun,”
sembamna aghana,
men yane kom tanena,
“A'un ekon wamnep kom,”
sembamnari mome ane,
“El talulom,”
aro palilamna.
A'un Allah elmabo wamlom ane sembe,
Allahri eldamneri mabo sembe,
“ ‘Undo-undo ua ulamukang,’
senenne el wamlulom,”
sembamnari mome ane toro palilamna.
Allah ya'ag kamag uropne ponekori,
“Yubu sikne mikip uro saelbamlulom,”
aro a'un Yesusag seneragtop nimi poloro winilamsilba wamlom.
Allah yubu sikne yangan kirik mep tangtop kirik lebe senep komne saog yubu ambarelamsimunne toman agha,
“Ora nimi el taukang,”
aro Allahri a'un poloro winilamsildi sekelilamsil.
16 Sik uro lelamap nena,
Allahri senenne sunsunum uro ulamnepne sembe ambarelamsiap yubu nene samenag tognoro wamog.
Tognoro wamog aghana,
Yesusag lag taogpa,
sik uro nubu sirik wamla.
El poneko nimi saog uro lag taogpa,
Allah Yame Walingeri,
“El sikne,”
aro lag nenelamogpa,
Allah arukna imagnang malaikatti babe ibek.
Nimiri el sembe yubu poa Yahudi sisa kom nimiag babe ambarel pihiek.
Nimi mog so'oag nimi tala-tala wamangne agha el poneko sembe sikne aro seneraglamang.
Samenag mog so'oag nimi saog uro wamog aghana,
Allahri el poneko sembe,
“Nimiri omeklamukang,”
aro imag agha kiliro tobogpa,
paliag wamla.