Nimiri Yesus yubu laplopnepne sembe Paulusti ambarogha
4
Allah Yame Walingeri tibin uro yubu lelamlangena,
Yesus samoro yanep sum peram wamebeag,
nimi Yesusag sikne aro seneragtop nimi agha Yesus yubu lilobukang.
Yesus yubu lilobikti,
phia yubu ka'ebaukang.
Phia yongeri orolena yubu ambarelamsiikne ka'ebi agha nimiri sik senelamikti,
ina ka'eseptanep ina nelebaukang.
2 Phia yubu anekona,
“Wali sembanukang,”
aro orolena lerop nimi pere agha ambatsinepne wamla.
Orolena yubu ambatsirop nimina,
sindi wana seneragnaag sikne ka'eban koma phia yubu ambarelamsiang.
3-4 Orolena yubu ambatsirop nimi tanekori,
“Nengabo kelabo topsin koma mo-mo wamlulom,”
aro ambarelamsiang.
Tenaba sembe babe,
“Salik-malik ten koma,
kwaneng neneap,
neneap teheng kom,”
alamang.
“Nengabo kelabo top taheng komdi,
kwaneng teheng kom,”
alamang aghana,
Allahri nia mangkina sumbaogne wali sumbaog.
Nia mangkina sumbaog nena,
nimiri loba aro mo toboglopnepne nhon babe sumbaog kom.
Nia mangkina Allahri sumbongkia seneraghogti,
“Wali-walia sumbandi,
tarelamsinne ibikti,
sikne el taukang.
El taikti,
na Allah seneraglamneikti,
‘Naniong,
walia tarelamsilam,’
aro kiplamneikti tolamukang,”
sembaogti nia mangkina sumbaog.
Allahri nia mangkina sumbaogti,
nimi sumbahiogti,
5 “Naringe mo wamlange tane mog so'oag nimiag tarelamsin,”
aro yubu lero ambatsiog.a
Ane sembe Allahag molona moloropne toman agha,
“Nuba nuniong,”
aro kiplameberi,
tolamebe tanena,
Allahri wali sembalul.
“Kristus Yesus sembe awe toropne walinge wamlulam,” aro Paulusti ambarogha
6 Ni ambatkenne nene,
nungkabo tangtop nimi Yesusag seneragtop nimiag ambarelamsimen tanena,
anna Kristus Yesus sembe awe wali uro toro ul piro yeptopne wamlulam.
Allahag sikne aro wana paliropne sembe wali uro amoro ambatkebonge sunsunum uro wene ul palamlamdi,
nen tipto yubu sikne wali uro amoro ambarelamsululam.
Yubu sikne amoro ambatkebonge sunsunum uro ambarelamsimen tanena,
yubu eneko andamne wanaag meptaleri,
mikip nenelangkelul.
7 Yubu sik komne nuri seneragna inibin nembahinep yubu sembe babe,
sabal kelabo nenek salehirop kelabori neplamloa saog yubu kamolange sembe babe ka'eamlulam kom.
Yubu sik komne ka'ebahin koma kolop tangkapmendi,
“Andi wana seneragna Allahri seneragna sunsunum uro talul,”
aro el nenel dalapmendi,
seneragto ulamlulam.
8 Nimiri seneraglamangne,
“ ‘Nong mikip nenel dalamnun,’
aro a'un topseng kom,
teheng kom,”
alamanga sunsunum uro ulamangneri nimi nong olog yepsinep.
Nimi nong olog yepsinep aghana,
Allahri nunag salag lero ambatsiogti,
“Nari seneragna sunsunum uro seneragto ulapmun tanena,
wali wamlulom,”
aro salag lero pipsiog.
Ane sembe Allahri senenne sunsunum uro ul palamebe tanena,
wene ko'oag wamapne sembe babe,
amik ya'ag kamag uro wamebe ko'oag sembe babe,
nia mangkina ul palamapne sembe babe nundam nimi wali yeptangto ulamnepne wamla.
9 Yubu kiki otsikne agha lag phoro lemnuan.
Ane sembe wali uro ka'eapmendi,
mikip uro saelbamlulam.
10 Nuri Allah ya'ag kamag uropne ponekoag wana palilamap.
Elag wana palilamap nena,
“Mog so'oag nimi niri malia ulamapne sembe Allahri opsinep aghana,
elag sikne aro wana palirop nimi Allahri nu taulbahilul,”
aro nang-nangaro seneraglamap.
Nimi etneri Allahri wepto poghogne ponekoag sikne aro wana palilamleba,
Allahri nimi eneko taulbalul ane sembe,
nuri mikip uro whin seklero awe tolamap.
11 Nia ambarelangken yubu ane yog nimiag tipto,
“Saelbapmundi sunsunum uro ulamlulom,”
aro amoro ambarelamsululam.
12 Amoro ambarelamsimendi anna,
“Nimi nhondi babe na sembe,
‘Me ane kabuni weneog me ekon pog lelamla,’
sembaneikag,”
aro andamne yae up tangkamlulam.
Anna,
“Nimiri na sembe teba'en sapsabi na kembaneikag,”
aro andamneri agha,
“Nimiri kembaneikti,
sindi babe na lero ulamnange nelepto lero ulamukang,”
senelapmendi Yesusag seneragtop nimi whingag andi ul palamlulam.
Andi yubu lenneap,
andi ul piropneap,
o'ona senehinneap,
Yesusag sikne aro wana paliro seneragnangeap,
andi wanaag walingeog seneragtopneap,
nia mangkina lag phoro ul palapmendi,
“Nimiri imneikti,
sindi babe nari ulamnange nelepto ul palamukang,”
aro ul palamlulam.
13 Undo ul palapmendi,
na anag anam yan komag,
“Allah Yubu mome lilim ka'ebaukang,”
aro andi sol wali uro mome toro pairopneag agha kemero nimi whingag lero ambarelamsululam.
Allah yubu lelapmendi,
amoro ambarelamsimendi,
“Sindi babe saelbahengdi uaheng,”
aro nimi el nenero wenelamsululam.
14 Samenag Yesusag seneragtop nimi wenehirop nangdi anag sae pipkeongdi,
Allah yubu silimu tiptop yubu ambatkeongne pere agha Allah Yame Walingeri mikipne an nongag pipkeo.
Mikipne an nongag pipkeo ane sembe,
anag tatkeonge sembe teba'en semban koma nimi wenelamsululam.
15 Nia ane wana nhonog uro saelbapmendi,
sol wali,
wali uro sik uro tolamlulam.
Sol wali uro tolapmen andarina,
nimi niri an kembagheikti,
an sembe,
“Wana hekto el talamlari,
wali uro ambarelamsil,”
senelamnep.
16 Andamneri ul palamlamne babe yae up tangkapmendi,
andi pamag agha amolamsilamne nene babe,
“Sengkwanektop yubu ambatsineag” aro yae uptangto wapmendi,
amoro ambarelamsululam.
Papna koma wana khapto sikne aghabog lero ulapmen tanena,
andamneri wali nenep tangkapmendi,
andi yubu ka'erop nimi babe wali nenelamsululam.