1 Timotius 5

Yog nimiag lero ulamsinepne sembe Paulusti ambarogha

An kabuniri nong nimi saogne nhon wenelapmen tanena, yubu mikip uro waban koma yubu yangaro, “Nani,” aro wenerop yubu lelamlulam. Kabuni maboag babe, “Nangkabo,” senelamsimendi wembamsululam. 2 An kabuniri kelabo nong nimi saog kelabo wenelamsimen tanena, “Nanin yabo,” senelamsimendi wembamsululam. Kelmaboap saren kelaboap, “Naipsa'el yabo,” senelamsimendi wanaag, “Saelbahane,” semban koma walinge aghabog ulamsimendi wembamsululam.

Kaldam kelabo sembe mome toro pairoba

3 Kelabo sin mo urop kaldam kelabo whingag nenero kiplamsululam. 4 Aghana kaldam kelabo sikin mabo to, sikinau yabo to wamik tanena, sikin maboag samenag wenelamsululam. Sikinin kaldam kel taonge sembe wenelamsimendi, “A'undi ae lomag nimi, ‘Teko wamikag,’ aro o'ona senero kemelamsimunne agha Allah wana yeng nenelamlulom. A'uni a'unindi samenag a'un wana wali uro mo'olamsiek ane sembe, a'uni a'uninap abenekoag tangoro walia ulamsimundi yeplamsululom,” aro wenelamsululam. Undo unulamikne nene agha Allah yeng sirik neneropne wamla. 5 Kelabo kaldam kelabo otsik uro kaldam kel elmo urop kel enekori, eldi seneragna Allahag wana paia nang-nangaro uropti, teko elag ualne sembe sinag kweleknag, “Allah yepnelul,” aro molona moloro ua urop. 6 Aghana kelabo kaldam kelabo agha wana sesog uro seneragto nia mangkina sembe, “Naringe wamsori, yeng nembanoho,” senerop kelabo babe wamang. Kelabo undop saog kelabo hain epto kon kamag ua urop aghana, wana seneragna loba taloa saog uro seneragtop.

7 Kaldam kelabo sembe, “Undo-undo ulamlulom,” aro yubu tam ambarelangken nena, “Ora nimiri Allah elmaboag tam pipsiikag,” aro ambatnuaghen. Ambatnuaghen yubu nene nen tipto ambarelamsululam. 8 Yesusag wana palirop nimiri sin nik nimiap, sindi ae lom nimi babe yepsin kom tanena, mali sirik urop nimi sembanep. Sin Yesusag sikne aro seneragtop kom nimiri sin nik nimiap, sindi ae lom nimiap wali uro yae paiamsinep. Wali uro paia ulamangne nene nimi niri babe unuaheng aghana, Yesusag sikne aro seneragtop nimi nhondi el nik nimiap, eldi ae lom nimi babe wali uro yae paiamsile kom tanena, nimi eneko agha sik mali sirik. Undop saog nimiri pamag agha, “Yesusag sikne aro wana palilamna,” arop aghana, sindi ul piropne neneag agha Yesus wa'ebaloa saog urop.

9 “Kaldam kelabo yepsukap,” aro mome si tolamsimun tanena, salik-malik uro si topsiseng kom. Kaldam kelabo agha mome siag tobongkipsinep kelabona, ela'ange ot nhonog torop kelabo agha, hengkun-kunne teng phende eptopneap saog (60) phiro wamik kelabo agha mome siag tobongolamsululom. 10 “Yepsukap,” aro mome siag tobongkiamsimunne, kaldam kelabori walinge maikno ulamikpa, nimiri iamsiikti, “Walia ulamla,” aro sikne lag nenero ambatkeik tanena, kaldam kel eneko mome siag tobongolamsululom. Kaldam kelabo agha mome siag tobongkipsinep kelabori wali-walia ulamang nena, elmabo wali uro mo'osirop, yingkirop nimi wali uro toro kipsirop, Yesusag seneragtop nimi sembe wana mamleba yepsirop, nimi kwema wamsil nimi yepsirop, sol wali, wali uro nia mangkina walia urop. Undo unurop kaldam kelabo si agha mome siag tobongkipsimundi yepsululom.

11-12 Kaldam kelabo saren saog wamik kelabo mome siag tobongkipsiseng kom. Saren saog wamik kelabo agha tobongkipsimun tanena sindi, “Nengabo nen nhon tomna koma, Kristustinge wamnun,” aro salag lero pimnep. Wene aro salag pimnep aghana, amik sindi kon kemeptaikpa, sin kon eren wamsileri, ulogsilenge sembe, “Nu nengabo toro aukap,” senep. Sindi samenag Kristusag wana paliropne toman agha, “Nengabo nhon tomna koma Kristustinge mo wamnun,” selenge phibaleri, Kristus poneko laplobi agha nengabo tomnep. Salag leropne phibaleri, nengabo topleba, “Allahri elag tam ikinne pipleag,” aro anamag sin kon eren wamsile kelabo mome siag tobongkipsiseng kom. 13 Apna saren saog wamik kelabo agha tobongkipsimundi, yepsimun tanena, sindi saeri sa'a-sa'a uan koma, nimi yepsinep kom yubu agha tipto ambatto tongolamikti, sunsunum urop kom yubu agha lero ae nhonag wa'ang, nhonag wa'ang ulamukang. Sindi ae eneag wa'ang, ae eneag wa'ang ulamikpa, ora nimiri tam ua ulamle tanena, urukag wa'ina salel wa'alamukang. 14 Ane sembe nari senelamnangena, “Kaldam kelabo saren saog wamik kelabo agha, ‘Yepsukap,’ aro mome siag tobongkipsiseng kom,” sembamna. Kaldam kelabo sin saren saog wamik kelabo wenelamsimenne, nengabo toro aikti, me mangaro sindi aeag wamikne, “O'olamsululom,” aro wembamsululam. Undo ambareamsimenba wamikti, walinge ulamik andarina, nunag aisa nenelamsiang nimiri nu san tilibahinep kom.

15 Kaldam kelabo etpare ina walinge laplobi agha phia sikini nubunge yubuag nelebaong ane sembe, kaldam kelaboag, “Undo-undo ulamlulom,” aro ambatsululam yubu nene ambatken. 16 Yesusag wana paliro winil dalamang nimiri yog nimi babe yepsinepneog wamla. Ane sembe Yesusag seneragtop nimiri ae lom nimi agha kaldam kelabo taik tanena, ae lom eneko wamik nimiri kaldam kel eneko yeplamukang. Sindi ae lom nimi agha kaldam kelabo undo yeplamik tanena, Yesusag wana paliro winil dalamang nimiag ikin tale kom andarina, yog kelabo sik uro mo urop kaldam kelabo yeplamsukang.

“Undo-undo ulamlulam,” aro wenerop yubu ambarogha

17 Allah elmabo wenehirop nangdi wali uro saelbamsindi, wali uro o'olamna tanena, “Nu wali uro saelbamsildi, wali o'olamsil,” aro kamna kipto tatsimunne nene sunsunum wamla. A'un Allah yubu ambatto wenehirop nangdi a'un wenelamsiangdi, amolamsiang ane sembe, a'undi sin wenehirop nang sembe amik nembahin koma sin nimi whingagne nembamsimundi tatsululom. Undopne agha sunsunum. 18 Kamna tatsiikne neneko sembe Musari samenag Allah Yubu mome toro pibogne nhon wamlangena,

“Gandum yongol torop nimiri pham sapi kerekamnari, ‘Kwaneng roti sununa gandum wana kolopto yingkileba, poloro anun,’ aro pham sapi yagto pabalamna.

Pham sapi yagto pabalamnange abeneko pere, ‘Yo'oag ingirop pham sapiri roti wana teleag,’ aro pham ua'al aroro kauptop saog uro kaupseng kom,”

aro mome toro pibog. Pham sapi sembe mome tobog aghana, “Nimi nhondi awe toamnari, eldi kamna torop taneogna sunsunum,” aro mome toro pibog.

19 Allah yubu amoro wenehirop nang kiplamsimunba, nimi nhondi a'un wenehirop nangag tam palilamsiikti, “Eldi malia undo unual,” aro ot nimi nhondi leplenge sembe sik sembaheng kom. Nimi phende wilindiri, “Eldi malia undo unuaoba ibobo,” aro lebik taneogna, “Sik to, kom to,” aro tam lelekto kembalulom. 20 A'un wenehirop nangdi malia uropne sembe winil dalamang nimi ni whingag agha wembahimenba, nimi orange babe, “Malia ulamebeag,” aro log senelamikti, walinge aghabog ulamukang. 21 Ni tam lemnange sembe wenero ambarelangkenne sunsunum uro sik uro ul palamlulam. Anna, “Nimi nhonag sip tanun,” semban koma nimi anabiag sikne agha ulamlulam. Nari, “Undo-undo ulamlulam,” aro ambatkenne Allahap, Kristus Yesusap, Allah arukna imagnang malaikat walinge wepsirop nangap whingag agha andi sa'oag palilamnaba kemelangkukang. 22 Andi elemag abeneko nimi nhonag sae paliro, “Allah elmabo saelba uhiropne wamlul,” aro sekiro sae pipseng kom. Ekonne agha elemag nimi nhonag sae pipmendi, sekitmen tanena, nimi enekori malia ulamleba, anap elap sae tiptangto wamtumunne sembe andi babe malia uanep. Ane sembe, “Malia uan koma wamnun,” aro andi, “Allah elmabo saelba uhiropne talul,” aro nimi elemag sekitsululam kom.

23 An sop-sop mon og aghabog telangkelba, naiklamlamdi pesa ulangkel ane sembe, mag aghabog tero wamseng kom. Anggur wana lolterop mag ologha telapmenba, an mon telangkelne nene yepkelul.

24 Nimi etpareri malinge uroba sembenga saogne paliropne anam tam lelekto kareptobag agha kemban kom aghana, lag wamla. Yog nimi etpareri malia uropne anam tognorop saog wamla aghana, amik lag talul. 25 Undo saog uro babe nimiri walinge ul piropne lag wamla. Nimiri walinge tognoro ul piropne wene wamlaba, iamap kom aghana, walinge ul piropne neneko tognorobag wamnep komdi, lag ua ulamlul.