Nimi aruknari ul piropne sembe ambarogha
6
Yesusag seneragtop nimi,
nimi arukna sae kauploa saog uro awe ikinne torop nimi wamik tanena,
sikini sikinin yabori aruktop yubu ka'elamsiikti,
“Kipsinun,”
aro sunsunum uro tolamukang.
Tolamik abeneko pere sindi seneraglamikne,
“Nimiri na kembaneikti,
Yesus sembe ambarelamsiap yubu mali sembaikagti,
Allah omeklamapne poneko si san tiliplamikag,”
aro sol wali uro awe tolamukang.
2 Yesusag seneragtop nimi agha arukna tangtop nimi wamikpa,
sikini yabo babe Yesusag sikne aro wana palirop nimi wamik tanena,
arukna wamik nimi tanekori,
“Nu Yesusag seneragtop nimi wamnam,”
aro sikini yabo luknuro uahinepne ulamukang kom.
Undo luknuro uahinepne ulamukang kom aghana,
arukna wamik nimi tanekori sikini yabo sembe,
“Naba nani Yesusag sikne aro wana palilamlaba,
Yesusti o'ona seneropne wamlaba,
nari babe o'ona senero yepnun,”
senelamnepneog wamla.
Undo senelamikti,
“Wali uro yepnun,”
aro sikini yabo taneko sembe awe tolamukang.
Ni ambatkenne abene amoro ambarelamsimendi wenelamsululam.
Metmereng arop nimiap, kal ma'aldi haing suruhirop nimiap sembe ambarogha
3 Nuri ambarelamsiap yubu neneko Allahri senenne sunsunum urop yubu ambarelamsiap.
Nuri ambarelamsiap yubu nenekona,
nu Saelba Uhiropne Yesus Kristus ponekori yubu sikne sunsunum uropne agha ambarelamsiap.
Nimi nhondi yubu yogne nuri sik yubu ambarelamsiapne sunsunum urop kom yubu agha ambarelamsile tanena,
4 nimi eneko metmereng arop nimi sa'a-sa'a ekon nimi wamla.
Nimi undop nimina,
naikna salehirop nimi saog wamlari,
nimiap-nimiap loba nenep tanep yubu sirik agha leleng-lelenga lelamla.
Leleng-lelenga pan khelamsilba,
nimiri ka'el pina sin yubu nenep tangka sin waptangto lel dalamnari,
“Nu luknubahiikag,”
aro waptangto loba nenep tanep.
Sindi yubu pan khero suknulamang yubu sembe san tilipsirop yubuag agha waptangto lel dalamangdi,
“Nu luknubahiikag,”
aro wana mali nenel dalamang.
5 Undo unuropne agha nimiri seneragna loba nenel dalamangdi,
Allah yubu sikne seneragna koma yubu sik komne sembe nimiap-nimiap sop-sop waptangto yubu lel dalamang.
Undo unurop nimiri Allah yubu paliag nenero ambarelamsiseng aghana,
Allah yubu sikne seneragtopne sinag orog wamla.
Sin el wamsil nena,
“Allahri senenne sunsunum uro lero ambatsirop nimi tup tanep,”
aro seneragtopneag agha yubu ambarelamsiang.
6 Aghana tup tananne nubungena,
nuri saeag wamlange sembe,
“Allahri sunuropne tarelamsil,”
senenneag agha nuri Allahri senenne sunsunum uro ul palamebe tanena,
seneragto ul piropne nenena nu sembe tup tananne nubunge wamla.
7 Tup taneba nene sembe,
nu mog so'o eneag mangaro yingkibu sum eneko nia mangkina saelba yingkibu kom.
Amik mog so'o eneag agha lamba palamebe sum eneko babe sa'a-sa'a salero agha lambaukap kom.
8 Aghana nu sembe tenaba wamle tanena,
wamlenge agha,
“Sunuropne,”
aro telamukap.
Ag nongag wanganne wamle tanena,
wamlenge agha,
“Sunsunum,”
aro wangaro wamukap.
9 Ot sin,
“Tup tahabe,”
senerop nimiri sindam nimi loba nenep tanep.
Nimiri wanaag,
“Na tup tahane,”
aro seneragtopne nenekori eldamne selbel weptangtopne wamla.
Nimiri,
“Tup tahane,”
aro wanaag seneraglamnange nenekori nimi eneko poa kwerenag eba timbanep.
“Tup tahane” senenne nenekori nimi aneko eldamne wana saplamlari,
wana sao kauplamlaba,
nimi aneko eldamne loba nenep tanep.
10 Tam nena,
nimiri kal ma'alag wana somoropne yareng saog uro selelep aro pongolamlea agha nimiri yoaba maikno nia mangkina malia uroba maubanep.
Nimi etpare babe sindi samenag Yesusag sikne aro seneraglamong aghana,
kal ma'aldi sin wana tolamsioba,
Yesusag sikne aro seneragto ulamongne liloa tup taneba sembe sarekereplamangdi,
wene sin,
“Yaghe,”
aro seklero wamang.
Paulusti mome komobanebag Timotius wenero ambarogha
11 Aghana anna Allahringe wamlam,
ane sembe,
“Tup tahane,”
senenne nene lilobi agha andi sarekerepto elamlulam nena,
“Wana porogneag agha Allahri senenne sunsunum uro ulamsene,”
aro ulamlulam.
Yesusag sikne aro wana paliropneap,
o'ona senehinneap,
wana khapto ul pinepneap,
nimiag win-win aro ulamsinepneap,
“Uahane,”
aro sarekerepto elapmendi ulamlulam.
12 Andi ulapmenne Yesusag sikne aro wana paliro ulapmenba,
Allahri kamna tatkeleba,
ya'ag kamag uro wamlulam.
Ya'ag kamag uro wamnepne sembe Allahri an yopkeoba,
andi nimi maikno whingag agha,
“Na Yesusag sikne aro wana paliro ulamnun,”
aro lag phoro lebomba ipkeong.
Andi yubu lebomne sunsunum uro Yesusag sikne aro wana palilapmendi,
yin salerop nangdi wana nhonog uro mal talamloa saog uro andi wana nhonog uro,
“Allahri kamna tatnepne nanag talul,”
aro awe tolamlulam.
13 Yesus Kristus eldamneri samenag nimi nubunge Pontius Pilatus whingag yubu sikne lag nenero ambarelamogti,
walinge lag phoro lebog.
Wene ane Yesus Kristus poneko whingag agha,
Allahri nia mangkina kamag nenelamsilne poneko whingag agha babe,
nari anag “Ulamlulam,”
alamnange ane.
14 “Nimiri an sembe tam pipkeikag,”
aro nari anag,
“Ulamlulam,”
aro ambatken yubu ane salero ulapmendi,
Yesus anam samoro yan komag agha malinge saelban koma walingeog ulamlulam.
Nari lemnange papna koma sunsunum uro ulapmen paghabog,
nu Saelba Uhiropne Yesus Kristus poneko amik samoro yalul.
15 Yesus nen samoro yalulne neneko elba,
nia mangkina mikip uro Saelba Ulamsilne poneko el mori,
“Sumene sum yalul,”
seleri karebale sum eneko yalul.
Elna nuri,
“Wali,”
aro omeklamapne poneko wamla.
Yubu sia lerop nang sembe Yubu Sia Lenne paliagne wamla.
El ponekona,
mog so'oag nimi saelba uhirop nang Saelba Uhiropne nubunge wamla.
16 El agha tepnari babe kaolbanep komne.
El ua urobag imang wareropne haing omomne warerobag aneko nimi nhondi babe sekel pinep kom.
Mog so'oag nimiri haingag agha imnep komdi,
nimi nhondi babe el wamlange ilirop kom.
“El agha mikipne nia mangkina saelbamlange,”
aro el aghabog omekanepne ya'ag uro wamle paghabog wamlul!
Sikne agha saekag lebap.
17 Nimi mog so'o eneag wamangdi,
tup uro wamang nimiag el nenelamsululam nena,
sin metmereng aro sindi tuba ya'ag wamnep koma sembe metmereng aro wamukang kom.
Allahri nu sembe senelamsildi,
“Nari tarelamsinne salero tolamikti,
wana awi uro wamukang,”
aro nunag maiknoro tarelamsil.
Ane sembe sindi tuba anekoag wana pimna koma,
nia mangkina nu maiknoro tarelamsilne poneko Allahag aghabog wana palilamukang.
18 Sin wene tuba maikno salelamang nimiag,
“Walia ulamlulom,”
aro ambarelamsimenba,
sunsunum uro ulamik tanena,
sindi nimiag walinge ul pana maikno pairo ulamikneag agha tupne tapto wamukang.
Sindi wanaag agha,
“Ma'aro tatsisebe,”
aro awi uro pogto tarelamsukang.
19 Sindi undo seneragto unulamikneri sin amik wali uro unne sembe tup tananne Allah whingag pairo pololamukang.
Allah whingag sindi walingeag agha yangaro pololamikne neneko wamleba,
amik ko'oag sin tup nimi taptopne wamnebag wali uro tapto ya'ag kamag uro wamukang.
20-21 Timotius,
andi saeag pibobonge nene wali uro yae wapmendi saelbamlulam.
Yubu kamolange Allah yubu sunsunum urop kom yubu sembe,
nimiap yubu lenag babe,
nimiri yubu kilim-kilima sik komne sembe,
“El uro seneragnange,”
alamang yubu lenag babe wa'epto naghi agha togtangto wamlulam.
Nimi etpareri samenag Yesusag sikne aro seneraglamong aghana,
yubu sik komne neneko ka'ebaongdi,
sik senelamongdi,
sindi babe nimi tipto ambatsiong.
Undo unulamongneag agha samenag Yesusag sikne aro seneraglamong nimi taneko nen sap amik ina wag lerekaong.
Ane sembe anna,
yae togtangto wapmendi,
yubu ambatkebunge saelbamlulam.
A'un sembe molbarelamsin nena,
“Allahri a'unag wana yorolamsilneag agha a'un yepto paiamsilul,”
aro molbarelamsin.
Abenda.