2 Timotius 1

Timotius

Sembe

Paulusti Mome Toro Pibogha Phendepne

Paulusti Timotius kibogha

1-2 Timotius naba name wanaagne, na Paulusti an kiplangken. Nu Allahri wepto poghogne Kristus Yesus ponekoap ma'ap tangto wamap nimi sembe Allahri, “Kamag uro unne tatsinun,” aro salag lero pibog. Allahri salag pibogti, “Uro yabilul,” senelamogne sunsunum uro Kristus Yesus ponekori na Paulus wepto pogneogpa, eldi yubu ambatto tongolamsindi, mome ane an sembe toro palilamna.

“Nuni Allahap, nu Saelba Uhiropne Yesus Kristusap abenekori wana anag yororo walia ulangkirikti, yareagti yeplangkirikpa, wana aingniro wamlulam,” senelamnari an sembe molbarelangken.

Paulusti Timotiusag, “Ali semban koma nari yubu tipto ambarelamsululam,” aro ambarogha

3 Samenag nu Yahudi nimi nunisa yabori Allah sembe awe toro omeklamek saog uro, naba nari wanaag sembenga orog wamlangeag agha, “Walingeog ulamnari ulamnun,” aro seneraglamnari, nari babe Allah sembe awe toro omeklamna. Nari sop-sop Allahag molona mololamnari, sinag kweleknag an sembe ekon tan koma Allahag wana yororo el kiplamnari, an sembe Allahag molbarelangken. 4 Nu a'ep tanumu sum eneko an engkalumba, hail mag timbaghaeogne seneraglamnange nene sembe, “Anap haiptahanemeba, na wana awi sirik uanoho,” senelamna. 5 An sembe ekon tan koma seneraglamnangena, andi anau Loisap, anin Eunikeapti sam Yesusag sikne aro wana palilamdek saog uro, andi babe sik tapto Yesusag sikne aro wana palilamlam. 6-7 Ane sembe nari anag yubu ambarelangkenne ulamlulam. Samen Allahri an Timotius sembe, “Sae yan taleri, nari awe tolamlul,” sembaogpa nari sae andi nongag sae pipkenonge pere agha Allahri anag mikipne pipkeo. Allahri nunag mikipne palilamsil nena, “Log sembaukang,” aro palilamsil kom. Eldi nunag palilamsil nena, “Mikip wamikti, o'ona senel dalamikti, wana hekto wamukang,” aro nunag palilamsil. Allahri mikipne auk pog saog uropne anag pipkeo ane sembe nimiri, “Auk pog nubu talul,” aro yae pairo ulamang saog uro andi babe, “Allahri mikipne auk pog saog uropne nanag pipneonge oro niknibaneagti, nubu nembanun,” aro yae pairo up tangkamlulam.

8 Mikipne pipkeo ane sembe, nu Saelba Uhiropne Yesus poneko sembe ali semban koma lag phoro ambarelamsululam. Na babe Yesus yubu walinge ambarelamsinoba, nimiri na sae kaupto kop aeag tobongkimneong aghana, wamnange sembe babe ali sembaheng kom. Nari Yesus yubu walinge ambarelamsinne sembe seklelamna aghana, Allahri an seklelapmenag mikip nenelangkeleba, andi babe Yesus yubu walinge ambarelamsululam. 9 Allah nu taluro yopsiogne ponekori wana nunag yorolamsildi, “Nari weptop mabo taikti, nari senenne sunsunum uro ulamukang,” aro yopsiog. Nu yopsiogti, taulbahiog nena, nuri walia ulamapne agha yopsiog kom aghana, elba eldi wana yorolamsilneag agha, “Undo uanun,” sembaogne sunsunum uro yopsiog. Eldi anam imap so'oap sumban komag agha samenag el uro wamogti, wana waliri, “Nari wepto pognenge Kristus Yesus pere agha nari mabo nembahinun,” aro karepto pibog. 10 Yum-yum samenag karepto pibog aghana, wenena Allahri wepto poghogne Kristus Yesus nu Taulba Uhiropne yaog andarina, Allahri nunag wana yororo senelamsilne lag taog. Kristus Yesus, “Mog so'oag nimi taulbahinun,” aro yaogne pere agha nimi tepna mikipne neneko kom nembaog. Nimi tepna mikipne kom nembaogpa, nimi etneri Yesus yubu walinge sikne aro seneraglamleri, Yesusag wana palilamle tanena, ya'ag kamag wamleri, nen tebalul kom. 11 Yesus yubu walinge ambatsinne sembe, Allahri na toro sekitneogpa, Yesusti na wepto pogneogpa, na nimi amohinne tahiri, lag phoro ambarelamsin. 12 Yesus yubu ambarelamsinne sembe nimiri, “Karong,” aro malia ulamneangba seklelamna. Seklelamna aghana, nari wana Yesusag sikne aro paiamnari seneraglamna. Na el wamnangena, “Nari wana Yesusag paiamnaba, eldi na yae wamnele paghabog nen phendep sum, ‘Tam karebanun,’ aro yalul,” senelamnari seneraglamna. Ane sembe wene seklero wamnange sembe ali senel dalamna kom. 13 Nari anag sik yubu ambatkehinge wali uro seneragto saelbapmendi, sik yubu nene sunsunum uro tipto amoro ambarelamsululam. Amoro ambarelamsimendi, Yesusag sikne aro wana paliropne toman babe, nu Yesus Kristusap ma'ap tangtop nimi o'ona senelamsilne toman babe o'ona senero ambarelamsululam. 14 Nari Yesus yubu walinge sik uro ambarelangkenori, andi saeag nembaghenoba, nu Yesusag seneragtop nimi sembe Allah Eldamne Yame Walinge nu nongag ua ulamla. Allah Yame Walinge nenekori yeplangkeleba, sik yubu anag ambatkeno yubu eneko yae paiapmendi, sik uro tipto ambarelamsululam.

15 An el wamlamne, Asia so'oag wamang nimiri na laplopneong. Figelusap Hermogenesapti babe laplopnerong. 16 Laplopnerong aghana, Onesiforusti ik etpare na wana awi sirik nenelamneo. Ora nimiri na sae kaupto kop aeag tobongkimneong aghana, wamnoag na sae kaupto wamnonge sembe ali sembao komdi, na wana awi nenelamneo. Undo yeplamneoba, nari sembamnange, Onesiforus ponekoap, eldi ae lomag nimiap sembe nu Saelba Uhiropne ponekori yareag senelamsilneag agha yeplamsilul. 17 Roma wamnoag babe Onesiforus poneko piori, ta'ap sen koma na elamneori, na wamnoag imneoba haiptanomo. 18 An babe el wamlam nena, eldi na Efesus wamnoag maikno yeplamneo. Maikno yeplamneo ane sembe, el sembe molbarelamnange, nu Saelba Uhiropne ponekori tam karebale sum eneko, “Onesiforus sembe yareag sembalulam,” aro nu Saelba Uhiropne ponekoag molbarelamna.