2 Timotius 2

“Seklelapmenag babe wana khapto awe tolamlulam,” aro wenero ambarogha

Timotius, naba name! Kristus Yesus ponekori nu elap ma'ap tangtop nimi wana yororo senelamsil. Eldi wana nunag yororo senehinneag mep tangkapmendi, mikip talulam. 2 Yesusag wana paliro winil dalamang nimi anabiag agha sin kembahimenba, wana hekamikti, sol wali uro amoro ambatsinep nimi sikne wamikpa, ipsimen tanena, sin anabiag agha kabuni etpare wepsululam. Wepsimendi amoro ambatsululam nena, na Paulusti samenag nimi maikno whingag agha Allah yubu ambarelamsisi yubu ka'ebalumne eneko, nen tipto andi wepsimen nang tanekoag amoro ambatsululam. Amoro ambarelamsimendi, sindi saeag piplulam nena, “Nari sik uro sol wali uro a'un ambarelamsinne sunsunum uro nen tipto yog nimi sik uro ambarelamsululom,” aro sindi saeag piplulam. 3-4 Nu wene seklelamap saog uro an babe, “Kristus Yesusag nelepto seklebanun,” senelapmendi wana khapto wamlulam. Yin salerop nangag sunumna tol pina ambatkenun. Yin salerop nang, “Mal tabaukang,” aro pogna pogsiropba, sa'a-sa'a nia mangkina eldamneringe sembe seneragna koma, “Na saelbamnelne poneko wana awi nembanun,” senelamla. Andi babe yin salerop nangdi seneragtopne saog uro, “Na saelbamnelne Kristus Yesus wana awi nembanun,” senenne sunsunum uro seneraglapmendi, seklenne lag talamlea babe wana khapto wamlulam.

5 Sunumna nen nhon sumbanun. Nimiri lelamnari, “Mipsukapti a'un merero pimunne etne samenag talul,” aro wene senep. Wene senepti, sinag yubu ambarelamsindi, “Inaag merero palapmuna ina aneag mo pululom,” sendi ambatsinep. Aghana nimi nhondi ina lambandi, nhonag sip tan tanena, samenag talea babe, nimi eneko sembe mikipne senep kom. Samenag yubu karepto pimnange nelebandi, sam sekel pin nimi eneko sembe el agha mikipne senep. El sam sekel pile nimi eneko sembe kwiria elektoba walinge nhon eldi usoghag elekirukang.

6 Nen sunumna nhon ambatkenun. Awe sae mikip uro wero meltorop nimi eneko eldamne saeri samenag yongoro aleri teleba, nimi orange amik tukang. 7 Nari ni yubu lero palilamnange nene sembe imag agha nu Saelba Uhiropne ponekori el nenelangkeleba, an el talulam. Ane sembe, nari ambatkenne sembe seneraghal pina el talulam.

8 Nari yubu walinge ambatto poa tongolamsin yubu ekon tan koma el uro seneraglamlulam. Yubu anena, Yesus Kristus Daudti likto palamog nimi anabiag agha lag taogti, tebaogti kamag taog. Yesus Kristus yubu walinge neneko ambatto poa tongolamsin. 9 Yubu walinge ambatto poa tongolamsinne neneko sembe wene seklelamnangena, na nimi yonge agha ulo saog uro nimiri na saelbaneongdi, besi agha sunurop haingdi na sae kaupneong. Sae kaupto wamna aghana, Allah yubu nimiri haing sae kaupnep kom. 10 Ane sembe ni ane seklelamnange wana khabamnaba, tipto ulamna. Seneragto ulamnangena, “Allahri samenag agha wepsiog nimi ni yubu sikne ka'ebi agha sik senelamikti, Kristus Yesusap ma'al dalamikpa, sin babe taulbahilul. Taulbahileba el imang warero ya'ag ua uropne nenekoag nhon wamukap,” aro seneraglamnari, Yesus yubu walinge ambatto tongolamsin. 11 Yubu kiki nene otsikne andagha ambatnuaghen.

“Nun agha elap tebabe pagha tanena,

elap babe nhon kamag wamukap.

12 Nu seklelamebenge wana khapto ulamebe tanena,

el umag nhon wameberi, elap nhon yubu sia lelamukap.

Nuri el sembe ekonne alamebe tanena,

eldi babe nu sembe ekon sehilul.

13 Yesus eldamne wanaag agha, ‘Undo unuanun,’ seogne sembe eldi nimi haing kunulamsil kom.

Ane sembe, nuri elag sikne aro seneragnange kom nembabe tanena,

eldamneri nunag lebogne sik uro yabilul.”

“Allah sembe awe toropne undo wamleba, Allahri el sembe walinge sembalul,” aro ambarogha

14 Ni lelamnange nene sembe nimi ni ambarelamsululam. Allah whingag agha sin wenero ambatsimen andarina, sin mamun yubu kiki lelekto waptangto loba nenep taheng kom. Undo unulamikne neneri nimi yepsinep komdi, waptangtop yubu ka'erop nimi babe loba nenep taukang. 15 Anna, andi nia mangkina ul palapmendi, “Allahri na kemelamnelba, nari Allah yubu sik yubu eneko wali uro yubu kiki lelekto seneraglamneri, sik uro ambarelamsinun,” aro tolamlulam. Undo tolapmen tanena, Allahri andi ul palapmenne ililangkeleri, an sembe, “Nari awe wali uro toropne miptopne wamla,” sembangkelul. Undo sembangkeleba, andi ali semban koma tolapmendi, Allah whingag wali wamlulam. 16 Nimiri yubu kamolange lero Allahri senenne sunsunum urop kom yubu lelamik tanena, undop yubu lelamikneag agha kolop tangkamlulam. Yubu undo lelamikpa, nimiri nelepto ka'elamikpa, Allahri senenne wailag nembi agha yo maikno tangto ulamukang. 17 Nimi taneri undop yubu nimi ambarelamsiangne meneng nimiag singina singihinne saog talul. Sin lelamang nimi taneko anabiagna Himeneusap Filetusap wamdang. 18 Sin abenekori ina sikne laplobi agha lerekarongdi, orolena yubu ambarelamsirang. Nimi teptopne nen kamag tanepne sembe orolenange amoro ambarelamsiang nimi tanekori, “Yesusti elag seneragtop nimi teptop nimi kamag nembahiori, wimbahio aghana, tane wamap,” aro ambarelamsiang. Undo ambarelamsiangne sembe Yesusag sikne aro wana palirop nimi wana ophag alolamsiang. 19 Undo wene aro ambarelamsiang aghana, Allah yubu yangan kirik mep tangtop kirik lebe senep komne saog wamla. Mebog kirik eneko alibag yubu sikne mome toro pibogne lilimna ane. “Nu Saelba Uhiropne ponekori eldi mabo el wamsildi wamla.” Apna, “Nimi etneri eldamne sembe, ‘Imap so'oap Saelba Uhiropne siag kekhaektopne wamna,’ al dalamle tanena, nimi eneko eldi malia uropne laplopnepneog wamla.”

20 Ae walinge nubu uro sorop ae eneko lomag mag tero liroba emas agha to, perak agha to sunuropne babe urop. Mag liroba kal agha to, so'o agha to sunuropne babe urop. Mag liroba nhon wamnep nena, “Ot mag liroba anda wamla,” aro sembanep. Mag tero liroba nhon wamnep nena, “Wali sirikne o'omne wamla,” aro sembanep. 21 Allahri ae lomag urop nimi babe nhon sao, nhon sao wamang. Yesusag seneragtop nimiri malinge eldi wanaag wamlange sae liliro a'alep taleba, el Saelba Uropne ponekori nimi eneko sembe, “Walinge,” aro kipnep. El Saelba Uropne ponekori nimi eneko sembe, “Nari wali sirikne o'omne wamla. Nari awe tomnepne ni sembe nari arukna anekori, ‘Wali uro tomnun,’ aro wea ulamla ane sembe, nimi eneko sembe na yeng sirik,” sembalul.

22 Name Timotius, kabuni mabori seneragna sunsunum uro, “Wanaag bobonge agto yaboho,” senenne andi wanaag waelbale tanena, elem uro togtangto kolop tangom sululam. Togtangto kolop tangom semenba, yog nimi wanaag agha nu Saelba Uhiropneag tapto, “Yepsi,” aro yoplamang nimi tanekoap nikag ma'al dalamlulom. Ma'al dalapmundi, sinap nhon sae tiptangto wana porogne ul piropneap, Yesusag sikne aro wana paliropneap, o'ona senehinneap, wana aingniro nenehinneap, “Uahabe,” aro sarekerepto elapmundi ulamlulom. 23 Ekon urop nimiri, “Yubu nembahabe,” aro seneragna koma lelamik nimiag nelebahiseng kom. An el wamlamne, ekon urop nimiri yubu tam ero lelamikneag agha nimiap-nimiap waptangtopne maikno waelbanep. 24 Nu Saelba Uhiropneri arukna el sembe awe torop nimina, nimiap waptangto yubu nenep tanep kom. Eldi arukna aneko tam samenne wanaag paia urop komne wamleri, nimi ni sembe, “Nangkae,” aro walia ulamsileri, nimiag wali uro amoro el nenelamsilul. 25 El ponekori sik yubu ambarelamsileba, nimiri elag yubu torapto lero ulamikne sembe sinag yo pimna koma, win-win aro el nenero wenelamsilul. Sin el nenelamsile andarina, Allahri sin wana hekamsileba, sindi malia seneragto uropne lilobi agha Allahri seneragna sunsunum uro seneraglamikti, sikne el taukang. 26 Yesus yubu ambatsiropneag yubu torapto lero urop nimi tanekona, phia sikini nubungeri wana toro sae kiliro sae kaubamsindi, “Undo-undo ulamukang,” senenne sunsunum uro ul pirop nimi mo wamnep. Sin nimi taneko sembe nu Saelba Uhiropneri arukna nhondi senelamnep nena, “El nenelamsineba, el taikpa, phia sikini nubunge nenekori selbel weamsinag agha sae loptangka wamukang,” senelamsinep. Undo senelamsileri, waptangto koma win-win aro wenero el nenelamsilul.