Imap so'oap komoptanep peramag uro yabilulne sembe ambarogha
3
Imap so'oap komoptanep sum peram tale tanena,
tam eraruk sirikne nhon saog,
nhon saog lag talulne tanekona an el uro wamlulam.
2 Undo uro yabinep sum eneko nimi wamik nimi tanekori sindam nimi sembe agha seneraghal dalamukang.
Tup tanebari wana tohirop nimi wamukang.
“Na paliag wamna,”
aro metmereng alamukang.
Sindam nimi maibil dalamukang.
Nimiag san tiliplamsukang.
Sikini sikinindi yubu ka'elamsukang kom.
Nimiri sinag mo tarelamsiikne sembe babe teba'en aro ingisaplolamukang.
Allahri senenne sunsunum uro seneraglamukang kom.
3 Nimi orange sembe o'ona senelamsukang kom.
Nimiri sinag malia uropne tam wailag nemban koma wanaag paia ulamukang.
Nimiag minirop yubu loloro ambarelamsukang.
Sin wanaag iba luknuro seneragnep koma wamukang.
Yonge aghabog ulamikti,
walinge sembe karong senelamukang.
4 Sikinkabo sembe wanaag agha aisanang nenelamsukang.
We uro seneragna koma ulamukang.
Sindam nimi omektangtopneri nenek salehirop nimi saog nenel dalamukang.
Allah sembe yeng semban koma “Uahabe,”
senenne agha ulamukang.
5 Nimiri sindi ul palamikne kembi agha,
“Allah yeng neneropne ulamang,”
sembanep aghana,
sin nimi tanekori Allahri senenne sunsunum uro ulamukang kom.
Eldi senenne sunsunum uro ulamsengpa,
Allahri mikip nembahinep aghana,
Allahri senenne saelba ul palamukang kom.
Nimi undop nimiap nikag ma'al dalamseng kom.
6 Sin undo unurop saog nimi anabiag agha ambatto poa tongolamsiangdi,
nimi ni ae lomag wamang nimi haing kunulamsiangdi,
nimiri ae lom toman wa'ina ae lomag kelabori wana tolamsiang.
Wana tolamsiangba,
wana mamnep kom kelabo tanekori,
“Na mon sek nenelamnelne nari wanaag walelalne nene salero uahane,”
senelamang.
Wene senelamangdi,
malia ulamangne sembe kelabo tanekori,
“Malia maikno ulamna,”
aro sindi seneragnep aghana,
sindi seneragnaap wanaap loba talamsil.
7 Kelabo tanekori sop-sop,
“El tahane,”
aro ulamang aghana,
yubu sikne sembe ililamang kom.
Undop saog nimi ae lomag wa'ina kelabori wana tolamsiang ane sembe,
haing kunuro ambatto poa tongolamsiang nang tanekoap ma'al dalamseng kom.
8 Sindi wene ulamangne saog uro samenag babe Allahri sik yubu Musa pere agha ambarelamsiog ko'o enekoag,
Yanesap Yambresapti torapto,
“Musari yubu ka'ebaheng kom,”
aro yubu sikne wa'eplamdek.a
Yanesap Yambresapti yubu sikne wa'eplamdek saog uro,
sin wene undo unulamang nimi tanekori babe sikne wa'epto naghi agha yubu toraplamang.
Sindi usog seneragna ya'ag maliri,
Allahap Yesusap abenekoag sikne aro seneragnep komne keknel dalamla.
9 Sindi haing kunuro ambatto poa tongolamsiangba,
nimiri sesog sembe sik senelamsiang.
Aghana amik sum lag tangto yabileba,
“Sinna ekon aghana,
el uro wamlori ambatsiloa saog uro amoro ambarelamsiang,”
aro nimi niri el taukang.
Paulusti wana khapto seklena seklebanepne sembe Timotiusag wenero ambarogha
10 Sinna undo unulamang aghana,
anna nari ambarelangken yubuag nelepto ul palamlam.
Nari ul piropne babe,
nari wanaag seneragtopne babe imneomdi,
nelepto ulamlam.
Nari Yesusag sikne aro wana paliro ul piropne babe,
nari o'ona senehiropne babe andi haingdi imneomdi,
nelepto ulamlam.
Sa'a-sa'a nanag uro yabalamoba,
nari wana paiamnori,
ta'ap sen koma wana khapto ulamnonge babe imneom.
11 Yesus sembe nimi ambatto tongolamsinoba,
nimiri as Antiokhia agha,
as Ikonium agha,
as Listra agha,
“Seklebale,”
aro ulamneongba,
seklelamnonge ni aneko andi haingdi imneom.
Seklelamno aghana,
nu Saelba Uhiropne ponekori nimi ni tanekori saeag agha taulbaneo.
12 Seklelamno aghana,
na mo seklelamna kom.
Nimi etneri Allahri wepto poghogne Kristus Yesusap ma'ap tangto,
“Allahri senenne sunsunum uro ulamsene,”
aro seneragto ul palamik tanena,
mog so'oag nimiri sin sembe karongdi,
“Seklebaik,”
aro ulamsukang.
13 Aghana nimi haing kunuro ambatsirop nimiap,
yonge urop nimiap nen ma'aro yo taikti,
mali-malia aghabog ulamukang.
Undo unulamik nimi tanekori nimiag haing kunuro orolenange ambarelamsukang aghana,
nen sap tangoro nimiri sinag orolenange ambarelamsiikpa,
sik senelamukang.
14 Haing kunuro ambarel dalamukang aghana,
an Timotiusag Yesus yubu sikne ambatkeek nimi sembe ekon tan koma el uro wamlulam.
El nenero yubu sikne ambatkeek ane sembe,
sik sembalumne neneko sae mikip uro saelbamlulam.
15 An me olog wamlumag agha Allah eldamneri ambatsiog yubu mome toro pibek yubu aneko el talamlum.
Allah Yubu mome toro pibekne nenekoag agha Allahri wepto pogtopne Kristus yanepne sembe ka'ebalum.
Ka'ebalumdi andi wana hekto yabalangkeogpa,
Yesus sembe,
“Allahri wepto poghogne Kristus wamla,”
aro el talum.
El talumdi,
elag sikne aro wana paliropne toman elap ma'ap tangto wamlamne sembe taluro ulangkel.
16 Allah Yubuag mome toro pairopne ni wamlange nenena,
Allah eldamneri haindi lag phoro ambatsiloa saog uro sikne wamlaba,
nimi yeplamsil.
Allah yubu sik yubu eneag agha nimi yepsinep nena,
nimiri sik yubu amoro ambatsinep.
Nimi wenero ambatsinep.
Tam nhon wamlange,
“Sikne to,
kom to,”
aro yubu mibil pina karebanep.
Nimiri wana porogneag agha ul pinepne sembe el nenero wembahinep.
17 Allah Yubu mome toro pairop mome eneri nu yeplamsileri,
mikip nenelamsilul.
Mikip nenelamsileba,
nu Allah elmabori sa'a-sa'a,
“Walinge unuahane,”
senelamebeba el nenero yeplamsileba,
Allahri senenne sunsunum uro ulamukap.