4
Allahri wepto poghogne Kristus Yesus poneko nen amik mog so'oag yalul nena,
nimi saelba uhiropne yubu sia lerop nang nubunge saog uro lag taleri,
kamag urop nimiap teptop nimiap poloro wimbahileri,
“Tam karebanun,”
aro yalul.
Ane sembe nari Allah whingag agha,
Kristus Yesus poneko whingag agha anag wenero ambarelangken nena,
2 “Andi Allah yubu walinge nimiag ambarelamsululam,”
aro wenero ambarelangken.
Andi yubu ambarelamsimenne sembe nimiri,
“Ka'ebaukap,”
sembaika babe,
“Karong,”
sembaika babe andi,
“Allah yubu ambarelamsinun,”
aro wea ulamlulam.
Allah yubu ambarelamsimenba,
nimiri sik komne lero uroba sembe,
sikne lag nenero wenelamsululam.
Wenelamsimen abeneko pere andi wana paiapmendi,
“Sindi wana sesog urop nimi wana mikip nembahinun,”
aro yubu kiki telekto el nenero amolamsululam.
3-4 Amik sum andi yubu sikne Yesus sembe ambarelamsimenne sembe nimiri,
“Ka'ebaukap kom,”
aro wa'epto ulangkukang.
Yubu sikne ambarelamsimenne sembe ao leptaukang aghana,
kom nepna malinge saogne sembe ao taongkaukang.
Ambarelamsimenne neneko libikti,
sinba sindi wanaag,
“Uaukap,”
senenne sunsunum urop yubu agha,
“Ka'ebaukap,”
aro ekel ina amohirop nang maikno sirik poloro wimbahukang.
Ane sembe andi,
“Wana paia uro yubu sikne Yesus sembe ambarelamsinun,”
aro wea ulamlulam.
5 Sa'a-sa'a uro yabileba,
wana whi uro wapmendi,
seklelapmenag wana paiapmendi wamlulam.
Yesus yubu walinge ambatto poa tongolamsimendi,
Allah arukna wamlamne sunsunum uro andi ulamnepne ni sol wali uro awe tolamlulam.
6 Nari wene aro ambatken nena,
Yahudi nimiri,
“Allah sembe pham domba aukag tabukap,”
aro pham domba oropne nong alibag mag iklamang saog uro,
“Nari eneng babe Allah sembe iknun,”
aro ulamna.
Olog wamnea nu wamap mog so'o eneag agha na laploa pinepti,
tebanepne peram wamna.
7 Allahri awe walinge nari saeag pipneogne neneko na seklero kilim weang alamnori,
wana nhonog uro tobitnori wamna.
Allahri samenag nanag ambatneogti,
“Ina aneag merero ambarel phululam,”
aro ambatneogne ni sunsunum uro ambatto tongolamnori,
elag sikne aro wana paliro uitno.
8 Ane sembe nu Saelba Uhiropne ponekori wana porog nimiag tatsineba na sembe paiamlange aneko,
kamna kwiria elektoba nari usoghag elekatnelul.
Nu Saelba Uhiropne ponekori wana porogneag agha,
“Ni tam karebanun,”
aro yalamle sum eneko kamna nene tatnelul.
Yalamle sum eneko kamna nanag aghabog tatnelul kom aghana,
nimi etneri elag sikne aro wana palilamikti,
“El nen samoro yalul,”
aro yeng uro nang-nangalamik nimi sembe kamna kwiria elektoba aneko sindi usoghag babe elekitsilul.
Paulusti elkaboag kipsirop yubu pibogha
9 Na wamnaag elemag yalulam.
10 Demas poneko samenag nanap wamnomo aghana,
wene mog so'oag nimiri seneragto ul piropne eldi wanaag o'omne nembaori,
na laploa lemneori,
as Tesalonika pio.
Kreskes poneko babe Galatia pioba,
Titus poneko babe Dalmatia pio.
11 Ot Lukas aghabog nanap nhon wamnam.
Markus poneko nari yubu ambarelamsinne sembe,
“Wali uro yeplamnelul,”
sembamna ane sembe,
an yalapmen tanena,
Markus enero poa yalulam.
12 Tikhikus poneko,
“Efesus pululam,”
aro pogno.
13 Nari wangan ag,
“Mag son uaneleag,”
aro wanganne aneko as Troas Karpus ponekori aeag laplomno.
An yalapmen tanena,
wangan ag laplomnoa ane payalulam.
Nari mome toropne wa'amogtoba eldi aeag wamlange babe payalapmendi,
pham domba kon agha wetneropne mome toroba aneko ekon tan koma toro payalulam.
14 Aleksander,
besi nhon sao,
nhon sao agha sunuropne ponekori nanag yonge maikno ulamneo.
Eldi nanag ulamneonge sembe,
“Nu Saelba Uhiropne ponekori lunuro tam pelengkalul,”
sembamna.
15 Nuri yubu ambarelamsiboba,
eldi nunag maikno uro yubu toraplamsio.
Ane sembe eldi anag ualulne sembe wana whi uro wapmendi,
yae up tangkamlulam.
16 Na tam kareptobag ik alnirop sum eneko poa pineongba,
tam kareptop nimi whingag pelebel tanan yubu lelamno aghana,
nimi nhondi babe nanag sip tangto yubu lebong komdi laplopneong.a
Sindi na pelebaneong komne sembe sinag tam pipsiseng kom.
17 Aghana imap so'oap Saelba Uhiropne ponekoap sae tiptangto seknomo.
El na peramag sekori,
mikip nembaneoba,
yubu walinge ambatsinonge nimi sisa Yahudi kom nimi niri ka'ebaong.
Na tam kareptobag aneko si yoaba singari na omneloa saog uro na tebanebag wamno aghana,
nu Saelba Uhiropneri pelebaneo.
18 Nimi maiknori na,
“Obukap,”
aro ulamneang aghana,
nu Saelba Uhiropne ponekori sin saeag agha taulbanelul.
Ya'ag omneika babe,
el ya'ag uro imag agha saelba uhirobag na pelepto payanelul.
El poneko paliag nenero kiplameberi,
ya'ag uro omeklamebe paghabog omeklamukap.
Sikne agha saekag lebap.
Mome komoptobag kipsiogha
19 Nari Priskilaap,
Akwilaap,b
Onesiforus eldi kelabo meap kiplamsinne ambatsululam.
20 Erastusc as Korintus wamlaba,
Trofimus naikna wamo aghana,
as Miletus liloa yanonge wamla.
21 An elemag son li nene anam waelban komag yalulam.
An sembe “Nangkae,”
aro kiplangkeang nimi,
Ebulusap,
Pudesap,
Linusap,
Klaudiaap,
nungkabo tangtop nimi Yesusag wana palirop nimi niri babe an kiplangkeang.
22 Nari a'un sembe molbarelamsin nena,
“Nu Saelba Uhiropne ponekori an wana nong ningkiap paiangkelul.
Eldi a'unag wana yororo walia ulamsilul,”
aro elag molbarelamsin.
Sikne agha lemna.
Abenda.