Filemon
Sembe
Paulusti Mome Toro Pibogne
El nenerop yubu
Yesusti samenag wepto poghogne Paulus ponekori mome nene toro pibog. Eldi mome nene anam tomna komag, yubu walinge Yesus sembe ambarelamsiogpa, ora nimiri san tiliplamekti, sae kaupto kop aeag tobongkibek. Kop aeag tobongkibekti, as soro kalurop as Roma poa piekpa, Paulus wamog. Tam nene sembe Lukas ponekori samenag mome toro pibog (Pogsiog Nang 22:1--28:31). Paulusti as Roma wamoghag, Onesimus haiptarek.
Onesimus poneko samenag nimi arukna tangtopne wamog aghana, Onesimus ili wamoghag agha tognoro lambaog. Roma nimi, mog so'o ngainangdi samenag ul palamek nena, nimi arukna tanekori kamna tomna koma yog nimi sembe awe tolamek. Roma nimi nubunangdi yubu sia pibekne sunsunum uro, nimi arukna tanekona, nimi wamek aghana, ora nimiri nimi arukna nene kamna kapto torobag pail palamsiekpa, “Nari awe tolamukang,” aro arukna nene kamna kapto tolamsiekti, sikini taek. Nimi arukna tane pham to, kam to nenelamsiloa saog uro kamna kapto tolamsiekti, sikini taekpa, nimi arukna tolamsiekne taneko sikiniri saeag aghabog wamek. Sikiniri arukna nene sembe, “Ya'ag obukap,” sembaho tanena, arukna neneko tebahoba, Roma nimi nubunangdi yubu sia pibekne sunsunum uro nimi nhondi babe arukna neneko pelebanep kom. Yubu sia pibekne neneko ko'oag, Onesimus poneko nimi arukna tangtopne wamog. Arukna wamogti, ili wamoghag agha tognoro lambaogpa, weag piogha nubu as Roma piogti wamog.
Onesimus poneko Roma wamoghag, Paulus babe yin salerop nangdi, “Ae anea lambaleag,” aro Paulus yae wamek. Ik nhon sum Paulusap Onesimusap haiptarekpa, Paulusti yubu pere agha Onesimus ponekori Yesusag sikne aro wana palilamog. Paulusap Onesimusap lelamdekag agha, Paulusti el taogti, “Nangkae Filemondinge arukna nene tognoro piori, nanag yaoba, Onesimus haiptanomo,” aro el taog. Paulusti samenag elkae Filemonag Yesus sembe yubu ambarogpa, Filemondi Yesusag sikne aro wana palilamog.
Filemondi Yesusag sikne aro wana palilamog aghana, nimi arukna tam nene anam seneragna koma, samenag nimiri ul palamekne sunsunum uro ul pinep. Filemondinge arukna Onesimus tognoro piogne sembe, ili Filemondi, “Tebalul,” seho tanena, Roma nimi nubunangdi yubu sia pibekne sunsunum uro, Paulusti babe Onesimus pelebanep kom. Pelebanep kom aghana, anamag Paulusti elkae Filemonag, “Onesimus anag yaleba, waban koma topsom,” aro molorop yubu nene mome toro pibog.
Paulusti Filemon sembe mome toro pibogha lomag wamlange
1-3 - Paulusti Filemon kibogha
4-7 - Filemon sembe Allah omekaogha
8-22 - Paulusti Onesimus sembe tiro molbarogha
23-25 - Mome komoptobag kipsiogha