Yakobus
Ponekori Mome Toro Pibogne
El nenerop yubu palilamap
Yakobus ponekona, Yesus ilipsae taptopne nhon wamog. Maria kel enekori me nhon Yesus mangkaogti, amik Yesus ilipsae nhon Yakobus babe mangkaog. Yesusap Yakobusap maum nhon terekpa, Yesus nubu taogti, kalag tebaogti, kamag taog. Kamag taogpa, as soro kalurop as Yerusalem nimiri Kristusag wana paliro winip tangtop nimi sembe Yakobus poneko paia uhiropne nubunge taog. Kristusag wana palirop nimiri, “Tam nubunge karebaukap,” aro ulamekpa, Yakobus ponekori sop-sop wana heklamsiogti wenelamsiog. Eldi wenelamsiog yubu eneko nimiri ka'elamekti, el maiplamek (Pogsiog Nang 15:13-21). Yakobusti nimi wenero ambarelamsiog yubu eneko, “Yahudi nimiri Kristusag wana palirop nimi wembahinep yubu mome toro pimnun,” sembaog.
Wene sembaogti, as Yerusalem wamog aghana, Roma nimiri tala-tala mog so'o saelbamsiekti, Yahudi nimi maikno talup lambahiek. Talup lambahiekpa, Yahudi nimiri Kristusag wana palilamek nimi maikno babe tala-tala taek. Sin Yahudi nimiri Kristusag wana palilamekti, tala-tala taek nimi sembe Yakobusti, “El taukang,” aro mome toro pibog. Sin Yahudi nimi tala-tala taek nimi sembe mome toro pibog aghana, yubu ene babe Kristusag wana palirop nimi ni sembe wana hekahinep yubu wamla. Yakobusti mome toro pibog yubu nene a'undi yubuag tipto mome toro palilamap.
Yakobusti nimi wana heksirop yubu enekoag tam nhon-nhon wenero pibog nena, saeagha orog nimi yepsinepne sembe, tup nimiri walia ulamnepne sembe, wali uro seneragnari yubu lemnepne sembe, Allahri seneropne sunsunum uro walia ulamnepne sembe, Kristusag wana palirop nimi mamun ma'ap tangtopne sembe wenero mome toro pibog. Tam nubunge nhon wenero pibog nena, seklenne seklelamnebag wana khapto ulamnepne sembe wenero mome toro pibog.
Yakobusti mome toro pibogha lomag wamlange
1:1 - Yakobusti kipsiogha
1:2-8 - Allahag wana palirop nimi wana hekahinepne sembe ambatsiogha
1:9-11 - Saeagha orog nimiap, tup nimiap sembe ambatsiogha
1:12-18 - Nimiri, “Malia uahane,” aro wana aluktopne sembe ambatsiogha
1:19-27 - Allah yubu sunsunum uro ul piropneap, aori ka'eloropneap sembe ambatsiogha
2:1-13 - “Nimi nhon paliag nenero, nhon umag nenero nenel dalamseng kom,” aro wenero ambatsiogha
2:14-26 - Sik seneropne sunsunum uro ul piropne sembe ambatsiogha
3:1-18 - Kristusag wana palirop nimiri yubu pamag agha lambanepne sembe ambatsiogha
4:1—5:6 - Mog so'oag nimiri ul piropneap, Kristusag wana palirop nimiri ul piropneap sembe ambatsiogha
5:7-20 - Eraruk urobag wana khapto Allahag wana paliro moloropne sembe ambatsiogha