Wenehirop yubu komoptopne pibogha
13
“Naro naipsae” aro nen tipto o'ona senel dalamlulom.
2 Nimi nhon-nhondi ekonneag agha,
“Sekelingirop nimi kiplamsiap,”
senenne toman Allahri yubu poa yingkirop malaikat kipto topsiek.
Ane sembe sekelingirop nimi kipto tolamsimunne sembe ekon tan koma ulamlulom.
3 Sin haing sae kaupto kop aeag tobongkipsiek nimi taneko sembe a'undi wanaag,
“Nanap nikag kop aeag haing sae kaupto wamap,”
aro seneragto ulamsululom.
Apna ora nimiri yog nimi malia ulamsiekpa,
seklelamang nimi taneko sembe a'undi wanaag,
“Nong nhonog wamapti seklelamap,”
aro seneragto ulamsululom.
4 Nengabo kelabo haogha torop nimiap,
salik-malik walep tangtop nimiap Allahri tam karebatsileri pelengkatsilul.
Ane sembe nengabo kelabo top tangtoba wali aro paliag nenelapmundi,
elkel ela'angeap maptangto uanepne,
“Phibabeag,”
aro yae up tangkamlulom.
5 Allahri yubu lelamogti,
“Ik nhon babe an laplopkenun komdi,
ik nhon babe liangkenun kom,”
seog.a
Ane sembe a'un saeag wamlange,
“Sunurop,”
aro seneraglapmundi,
a'undi wana kal ma'alag palilapmunagti,
yae up tangkamlulom.
6 “Lipkenun kom,”
seog ane sembe,
nuri wana khapto lelamap nena,
“Nu Saelba Uhiropneri yeplamnelba,
mog so'oag nimiri nanag sa'a uanep?
Na log senelamnun kom,”
alamap.b
7 A'un saelba uhirop nang Allah yubu ambatsiek nang taneko ekon tahin koma seneraglamlulom.
Sindi Kristusag wana paliro ul palamekpa,
wana mauro yabalamlange seneraglapmundi,
sinag nelepto ul palamlulom.
8 Yesus Kristus samenag wamogha sumene babe undo wamlari,
amik babe undo wamle paghabog ya'ag wamlul.
9 Nimiri a'erop yubu nhon-nhon ambarelamsinep.
Aghana nimiri kwaneng tenepne iriksiropneag nelepto ul piropneri nimi wana mikip nenero yepsinep kom.
Ot Allahri nunag wana yorolamsilne toman agha nuri wana khapto ulameberi,
wali wamukap.
Ane sembe,
a'erop yubu ekel ina ambatsinep yubu enekoag kiliptangto neleplamsiseng kom.
10 Samenag Allah sembe awe toro mem ae kalun aeag yeplamsiek nangdi Allah sembe paliropneag agha toro telamek.
Ot wenena,
nu wali nembahinepne ponekori eldamne Allah sembe paip taog.
Allah sembe paip taogne neneko sin Allahri mem ae kalun aeag yeplamsiek nangdi saeag tanep kom.
11 Memnang Allah sembe palirop nang sikini ponekori nimiri malia uropne sembe,
“Allahri opsileag,”
aro lebe aroba olamlari,
eneng poa Memneri Memag wa'ina Allah sembe palilamla.c
Eneng poa wa'ilamla aghana,
lebe aroba teptoba poa kalun ae kanero solingkiek asag agha lanalamangdi,
paiag sip aukag tal palamang.d
12 Ane sembe Yesus tebaogne babe,
as kanero solingkiek leka ina toman nimiri Yesus poa lambaek.
Yesus poa lambaekpa eldi,
“Nari eneng lanaro tebanenge toman agha sin malinge lupto Allah whingag yanep nimi nembahinun,”
aro paiag sip seklero tebaog.
13 Ane sembe kalun ae solingkiekne neneko laplobi agha,
“Nimiri el san tilibaekne nunag babe tahile,”
aro lamba elag pukap.
14 Elag pukap nena,
nuri ya'ag urop as taneag wamla kom aghana,
amik uro yabilul as nang-nangaro tilamap.e
15 Ane sembe Yesus pere agha el si lag phoro,
“Ma'ap tanam,”
aro pamag agha lelamap yubu toman papna koma Allah sembe omektoba palilamukap.
16 Apna ora nimiag pogto walia ulamsiap nena,
Allah sembe palilamneba eldi wana yeng neneropne wamla.
Ane sembe ora nimiag pogto tatsinepneap,
walia ulamsinepneap lilopseng kom.
17 A'un saelba uhirop nangdi yae paiamsiangdi,
“Awe tolamapne ene amik Allahri tam karebatsilul,”
aro a'un wali wamnepne sembe tibarelamsiang.
A'un yeplamsiangne ikin nembamun tanena,
a'undam nimi sembe eraruk nenel dalamnep.
Ane sembe sindi yubu ka'elapmundi,
“Nu yae paiamsiangne sembe wana yeng senelamukang,”
aro a'undam nimi sin umag nenel dalamlulom.
18 Nuri wanaag,
“Sa'a-sa'a ulamnepneag walingeog ulamsebe,”
senelamap.
Nuri wanaag sik senelamap nena,
“Sikneog ulamap,”
aro seneraglamap.
Ane sembe,
Allahag nu sembe molbarelamsululom.
19 Tam nubunge Allahag na sembe molbarelamnululom nena,
“Na elem uro a'unap nen haiptahabe,”
senelamnange,
“Uro yabilul,”
aro Allahag molbarelamnululom.
20 Nari a'un sembe nimi wana aingniro ma'asinne poneko Allahag molbarelamsin.
Nu Saelba Uhiropne Yesus poneko pham domba wali uro yae paia uhiropne saog wamla.
Samenag,
“Allahap nimiap yubu nikne ya'ag uropne nembanun,”
aro eneng lanaro tebaogneag agha nu paiamsilne nubunge taogpa,
Allahri el teptopneag agha epto kamag nembaog.
Kamag nembaogne ponekoag a'un sembe molbarelamsin nena,
21 “Eldi senenne sunsunum uro ulapmunne sembe a'unag teko uahinepne ni walinge wero tarelamsilul,”
aro molbarelamsin.
Nunag ulamsildi,
eldi haingag wana yeng nenelamnepne Yesus Kristus pere agha nunag ulamsilul.
El paliag nenero omeklamebe paghabog ya'ag uro paliag nenero omeklamukap.
Sikne agha lebap.
22 Nangkabo,
olog yubu ene a'unag mome toro pimna ane sembe,
“Nari wenehirop yubu ene saelbamlulom,”
aro mololamsin.
23 A'un el tahom senelamnange,
nungkae Timotius haing sae lobong.
Elem uro nanag yaleba,
elap nhon haole uro a'unag yanunam.
24 A'un saelba uhirop nang niap,
Allahri wepsirop kelmabo me niap kipsululom.
Sin Italia siba yaong nimiri a'un kiplamsiang.
25 “Nu Saelba Uhiropne ponekori wana a'un nimi niag yorolamsileri,
yepto paiamsilul,”
aro a'un sembe molbarelamsin.
Abenda.